دوکتــــور جـئــــــری
ساتاشما ادبیاتی
گؤروشلر : 0
تاريخ : جمعه 25 فروردین 1391 | یازار : دوکتور جئری
+0 به‌ین

حامام سویوندان فردوسی یه دك!

آی مَشَدی غضنفر، بونلار هامیسی سنین حامامی نین سویونون تاثیریندن دیر!- مَشَدی عباد

   سایغی دگر جومهورباشقانی، تاجیكیستاندا ایرانلی لار ییغینجاغیندا،  فردوسی نین اسلام دینینه اولان درین تاثیریندن دانیشاراق، "فردوسی اسلام مكتبینی قورتاراق بو آغیر یوكو، یوك گؤتورمزلرین سیرتیندان گؤتوروب ایرانلی لارین بئلینه یوكله میش، بو میللت ایسه اولدوقجا یاخشی بو یوكوملولوگون عؤهده سیندن گله بیلمیش دیر" دئمیش .

 بو سؤزلر سرت تپكی لرله قارشیلاشسادا دئمه لی ییك: ائورنده فردوسی نین تاثیریندن آماندا اولان بیر شئی تاپماماق مومكون دئییل . آشاغیدا گتیردیگیمیز بیر نئچه اؤرنك بونون آیدین قانیتی دیر. یاخشیسی بودور، تپكی چیلر جومهور باشقانینی قیناماق یئرینه گئدیب بو قونودا اوزمانلارلا فیكیر آلیش وئریشی ائتسینلر!

ایشده، فردوسی نین تاثیراتیندان اؤرنكلر:

 بیر تیكه حلال یارانه ائو اوشاغینیزین سوفراسینا آپاریرسیزسا فردوسی نین تاثیریندن دیر یوخسا ایشسیزلیك بونالیمی دونیانی چولقالاییب هامی آجیندان اؤلمكده دیر.

قار- یاغیش یاغیرسا؛ فردوسی نین تاثیریندن دیر یوخسا آفریقادا ایللر بویودور یاغینتی یوخدور.

اؤلكه دوشمن لری، سینیرلاریمیزا گؤز تیكمكدن چكینیرلرسه، فردوسی نین تاثیریندن دیر، آرش كمانگیری بیز تانیمیرساقدا اونلار تانیییرلار.

دونیادا، هامی  بیزی بارماغی ایله گؤستریب پیچی- پیچی دانیشیرسا، فردوسی نین تاثیریندن دیر؛ اونون یاشاتدیغی عجم دن شاشقیلیق دویورلار.

دونیادا بوقدر دوستوموز وارسا، فردوسی نین تاثیریندن دیر؛ شاهنامه اولان یئرده كیمدیر نفت- گازین اوزونه باخان.

دوشاب آلیریق موراببا چیخیرسا  فردوسی نین تاثیریندن دیر؛ فرانسادا كونسئرو آلیرلار ایچیندن قورباغا چیخیر.

رسمی دیلیمیز فارسی سا، فردوسی نین تاثیریندن دیر یوخسا بیربیریمیزله گؤروشنده لال اویون گتیره جك ایدیك.

اؤلكه ده هئیكل تراش لیق و سیمینت صنعتی گؤنو گوندن گلیشیرسه ، فردوسی نین تاثیریندن دیر؛ فردوسی نین هئیكلی كند- شهرلرین میئدانلارینی فتح ائتمكده دیر.

هامی گئری له ییركن، ایره لی له ییریك سه، فردوسی نین تاثیریندن دیر؛ رخشه مینمیشیك؟

آمریكا اؤلكه میزه سالدیرماقدان قورخورسا فردوسی نین تاثیریندن دیر؛ اسفندیارین سیرری كیمی، سیررینی بیلیریك.

كندلرده سامانلیق لار دانیشگاه آزاد ائدیلیب زبان و ادبیات فارسی لیسانس- دوكتوراسی وئریلیرسه، فردوسی نین تاثیریندن دیر؛ بو گونلر مدرك سیز آدامی توالئته بوراخمیرلار هارادا قالسین بعضی- بعضی یئرلره.

دوكتور جئری یازیرسا ، فردوسی نین تاثیریندن دیر یوخسا او گئدیب قاز اوتارمالی دیر هله هله!

 





    بؤلوم: ساتیریك یازیلار
گؤروشلر : 0
تاريخ : سه شنبه 22 فروردین 1391 | یازار : دوکتور جئری
+0 به‌ین

گوله گوله دوكتور!

اَت باهادیرمی ؟

 یئمه یین !

بیلین!   اَت، خرچنگ(سرطان) خسته لیك لری نین باشلیجا ندنی دیر.

تویوق باهادیرمی؟

یئمه یین!

بیلین !  تویوقلارین هورمونو اولدوغوندان بدنیزده چئشیدلی چاتیشمازلیقلار اؤزونو گؤستره جك .

گؤی گؤیرنتی باهادیرمی؟

یئمه یین!

بیلین! گؤی گؤیرنتیلر، شهرلرین آیاق سولاری (فاضلاب) ایله یئتیشدیریلیر بونا گؤره قیرلاغان (وبا) قورخوسو وار.

یئر- یئمیش باهادیرمی؟

یئمه یین!

بیلین ! یئر-یئمیشی كسیب  سویاركن بارماغینیزی كسسه نیز  قاقشال (كزاز) دان اؤله بیلرسینیز.

نور- نوخود باهادیرمی؟

یئمه یین!

بیلین!  بو اؤلدوروجو دنه لر گؤنده بوغازا دیغیرلاناراق یوزلر كیشینی بوغورلار.

دویو باهادیرمی؟

یئمه یین!

بیلین!  دویوده اولان آغی (سم) قارین- قورساغینیزی قیسسا سوره ده دارما داغین ائده جكدیر.

سود اورونلری باهادیرمی؟

یئمه یین!

بیلین! آغارانتی (لبنیات) اوره تیجیلری(تولید ائدنلری) اورونلرینه(محصوللارینه) واجیب اولمایان واجیبی لری قاتماقلا ساغلیغینیزی هده له ییرلر.

چؤره ك باهادیرمی؟

یئمه یین!

بیلین!  چؤره كچیلر خمیره قابارتما توزو (شیرین جوش) قاتماقلا آش قازانیزی (معده) دلیك دئشیك ائدیب اوزون سوره ده سیزی اؤلدوره جكلر.

اویاریلاریمیزا اویسانیز...

بیلین ! 

 ساغ - سلامت اؤله بیلرسینیز.

اونوتمایین!

دؤولت، گئجه گوندوز سیزین ساغلیغینیزی دوشونور؛  باهالیقلار ندن سیز دئییل!

دوكتورونوز :  دوكتورجئری

سیز ساغ من سلامت

17/1/1391





    بؤلوم: ساتیریك یازیلار
گؤروشلر : 0
تاريخ : یکشنبه 7 اسفند 1390 | یازار : دوکتور جئری
+0 به‌ین

تویا گئدن رای صاندیغی!

دوكتور جئری

 

رای صاندیغی كبین كسمه تؤره نینده

عاقید، اوزونو گلینه توتوب دئییر:

-         گلین خانیم ، منی وكیل ائدیرسیز، بیر عدد قورآنی كریم سی دی سی و 12 كیلو زنگین لشدیریلمیش اورانیوم قارشیلیغیندا سیزیین دائمی عقدیزی آغایی داماده اوخویام ؟

گلینین باشی اوسته قند اووان قیزلار:

-         گلین گئدیب رای سالا.

عاقید ایكینجی كز اولاراق سوروشور:

-         گلین خانیم ، من وكیلم؟

یئنه قیزلار:

-         گلین رایینی سالیر.

عاقید اوچونجو كز اولاراق:

-         گلین خانیم من وكیلم؟

گلین اوتانا – اوتانا:

-         " شورای نگهبان" – نین نوماینده لری نین ایجازه سی ایله ، بلی.

 

رای صاندیغی حنا گئجه سینده

حنا گئجه سی دیر. آشیق سازی باغرینا باسیب بیگی تعریف ائتمكده دیر. بیردن، سئچكی لرین گزر صاندیق چیلاری ایچری گیریرلر. آشیق ساز- سؤزونه سئچكی رنگی قاتیر:

 

"انرژی هسته ای" – نین صداسی

دوغونو(شرقی)، باتینی(غربی) ائدیب دی عاصی

گلسین رایین وئرسین بیگین آتاسی

دئییم آی بیگ تویون موبارك اولسون

گلن قوناقلارین ، جانی ساغ اولسون

 

هامی یاتیب بیزلر آییق قالاسی

" بیداری اسلامی " – یه چاتاسی

گلسین رایین وئرسین بیگین آناسی

دئییم آی بیگ تویون موبارك اولسون

ائللرین داماغی بوتون چاغ اولسون

 

لیمانا دایاندی ایران گمیسی

اسدین سولاندی باغی زمیسی

گلدی رایین وئردی بیگین عمیسی

دئییم آی بیگ تویون موبارك اولسون

قورودون دببه ده دؤنوب یاغ اولسون

 

توپ توفنگیمیزین  ساییلماز سایی

دونیادا تاپیلماز شهابین تایی

رایینی گؤندردی آغایی دایی

دئییم آی بیگ تویون موبارك اولسون

تپه لر اوجالسین بؤیوك داغ اولسون

 

گؤیده بیر اویدو(ماهواره) وار آدی نوید دیر

او شؤوقونو بو مجلیسه سالیب دیر

هامی رایین وئریب داماد قالیب دیر

دئییم آی بیگ تویون موبارك اولسون

ساغدیشین سولدوشون اوزو آغ اولسون

 

 گلین ماشینی نین قاباغینی كسمه

سئچكی لرین گزر صاندیق چیلاری گلین آپاران ماشینین  قاباغینی كسیرلر. بیگ گوله – گوله :

-         شیرینلیك ایسته ییرسیز؟!

-         یوخ ! رای لریزی.....





    بؤلوم: ساتیریك یازیلار
گؤروشلر : 0
تاريخ : یکشنبه 30 بهمن 1390 | یازار : دوکتور جئری
+0 به‌ین

آنادیلی بایرامی اویونلاری

دوكتور جئری

  21 فوریه، (2 اسفند) اولوسلار آراسی آنادیلی بایرامی دیر. بوتون بایراملاردا اولدوغو كیمی ، آنا دیلی بایرامی نین دا اؤزنه اؤزگو اویونلاری واردیر. بو اویونلار چوخراق شهر و كندلرین كوچه – خیابانلاریندا اوینانیر. بو اویونلاردان : باتوم اویونو، سو فیشقیرما اویونو(سو آیدینلیق سیمگه سی دیر) ، قووالا- قاچدی اویونو، اوچدو- اوچدو اویونو، كار- كور اولما اویونو، لال اویونو، اؤیرنجی- پولیس اویونو و نئچه نئچه آیریسینی آد آپارماق اولار. آنا دیلی بایرامی  اویونلاری، رسمی دیللری بیریجیك اولان چوخ اولوسلو اؤلكه لرده سیجاق قارشیلانیر.

         آنا دیلی بایرامی نین گلیب چاتماسینی قوتلایاراق سیزلری، اؤزلیك له گول بالالاریمیزی ائو- اوخولدا اوینانا بیله جك  " اوچدو، اوچدو " اویونو ایله تانیش ائدیرم.  بو اویوندا، دیلی رسمی لر اویون چیخارتماسالار اولدوقجا اگلنجه لی   بیر اویونا تانیق اولاجاقسینیز.

-          اوچدو، اوچدو، كیتاب اوچدو!

-          اوچدو!

-          اوچدو، اوچدو، اوخول اوچدو!

-          اوچدو!

-          اوچدو، اوچدو، موسیقی اوچدو!

-          اوچدو!

-          اوچدو، اوچدو، سینما اوچدو!

-          اوچدو!

-          اوچدو، اوچدو ، تیاتر اوچدو!

-          اوچدو!

-          اوچدو، اوچدو، آنا دیلی اوچدو!

-          اوچدو!

-          آنادیلی اوچماز فاشیست، سن یاندین ؛ چیخ قیراغا....

-          اوچدو، اوچدو.....

 



آچار سؤزلر : بایرام,

    بؤلوم: ساتیریك یازیلار
گؤروشلر : 0
تاريخ : یکشنبه 30 بهمن 1390 | یازار : دوکتور جئری
+0 به‌ین

۲۱ فئورال(2اسفند) دونیالیق آنادیلی گونو قوتلو اولسون

دیل و دیش گونو

یازان : دوكتور جئری

۲۱ فئورال ،دونیالیق آنادیلی گونودور.  ۱۹۹۹ اینجی ایلدن بری بوتون دونیا میللت لری ایله بیرگه بیزیم اؤلكه ده ده بو گون  زوپا – دگنك ائشلیگینده   قوتلانماقدادیر. دیلین اؤنمی هر كیمسه یه بللی دیر .  من بو دوغرولتودا موباریزه آپاران بوتون چالیشقانلاریمیزین اللرینی بیر- بیر سیخیب باشلاری نین یاشیل قالماسینی اولو تانری دان دیله ییرم. آنجاق چالیشقان قارداشلار ! منجه بو موباریزه ده تكجه دیله یوخ ، دیشه ده دیققت یئتیرمه لی سینیز. بیزیم ایراندا تكجه دیلیمیز یوخ بلكه دیشلریمیزده آرادان گئتمكده دیر. شاشیرمایین! بیر آزآجیق دؤزسه نیز قونونو بیر دوكتور اولاراق بیلیمسل آچیدان آچیقلایاجاغام.  بیلدیگینیز كیمی مملكندین ایرسمی دیلی فارسجا دیر و یئنه  بیلدیگینیز كیمی ده “‌ فارسی شكر است “ . یانی فارسی شكر دیر ؛ یانی  فارسی شیرین دیر ، یانی فارسی شربت دیر  بالدیر! …

بیلیم آداملارینی آراشدیردیقلارینا گؤره شیرینین دیشه ضرری اولوب دیشین چورومه سینه ندن اولار. بو گون فارس دیلی نین شرینلیگیندن دیلداشلاریمیزین دیشلری قورخونج بیر بیچیمده چورومكده دیر.  تاسفله بو اولای گؤزلردن یایینمیش كیمسه بونون فرقینده دئییل. بو گئدیشین قاباغی آلماق اوچون،  چالیشقانلار، دیلداشلاری   فارسجا قونوشدوقدان سونرا و یا فارسجا كیتاب اوخدوقدان سونرا دیشلرینی توركجه ایله میسواك وورمالاری قونوسوندا اویارمالی دیرلار. باری دیل گئدسه ده دیشلر یئرینده قالسین…

1389/11/28

 

جئری نیوز خبر آژانسی مملكندده گزه رك دیل و دیش  و بو گون حاقدا  بیر گؤرسل راپورت حاضیرلاییب . بیرلیكده  باخالیم:

 

شاهنامه فردوسی  ناققالی نین دیشلری

بسی رنج بردم در این سال سی

نه دیشلر ایتیردیم  بدین پارسی

فارسجا گوگول

 بیر شوونیست : مزدور اجنبی! چرا دروغ می گی؟

 

فرهنگستان فارسی  ایشچیسی

آرخالوقلار (باستان شوناسلار) هخامنیشی تمدونون ایزلرینی آختاریرلار

اصیل ایران پیشیگی  و مسواك سورونو

بابا ! ماما! دیشلریمه یازیغینیز گلسین

 كلاس سیز فارسی بیلمه ین كندلی قیزی

من دیشلریمی چوخ سئویرم ، ائشیدیرسنمی ؟

من دیشلریمی چوخ سئویرم ، ائشیدیرسنمی ؟

من دیشلریمی چوخ سئویرم ، ائشیدیرسنمی ؟



آچار سؤزلر : دیل,

    بؤلوم: ساتیریك یازیلار
گؤروشلر : 0
تاريخ : یکشنبه 23 بهمن 1390 | یازار : دوکتور جئری
+0 به‌ین

دانا باش كندی نین فولكلوروندا یارانه لر

یازان : دوكتور جئری

یارانه لرین نقدی اولاراق اؤدنمه سی،  داناباش كندی نین  ایقتیصادیاتینی آلت اوست ائتمكله یاناشی  زنگین بیر یارانه سل  فولكلورون یارانماسینا ندن اولموشدور. عؤمورلرینده نقدی یارانه گؤرمه ین داناباشلی لار، اكینچی لیك و مالدارلیغا باشی سویوقلوقلا یاناشیب یارانه پوللارینی بولون - سولون خرجله یرك واخت لارینی قهوه خانالاردا شفاهی ادبیاتیمیزین گلیشمه سینه حصر ائتمیشلر. بو مئیمون اولایین ایل دؤنومونده، داناباش كندینده گئدیب، خالق یاردیجیلیغیندان بیر چلنگ حاضیرلامیشیق یارانه نین باعث و بانی لری نین بوینونا آسماق اوچون . بیرلیكده اوخویاق:

 

آردیندا اوخویون


آردینی اوخو/Ardını oxu


    بؤلوم: ساتیریك یازیلار
گؤروشلر : 0
تاريخ : چهارشنبه 28 دی 1390 | یازار : دوکتور جئری
+0 به‌ین

یئنی پول بیریمی: تیریق

دوكتور جئری

    نئچه آی بوندان اؤنجه، پول بیریمی نین دییشمه سینه داییر،اورتالیقدا  قیزیل- دولار بازاریندان قیزغین تارتیشمالار گئتمكده ایدی.  چئشیدلی بیریملر اؤنریلیركن  آریاچی یوردداشلاریمیز ، هخامنشی دؤنمینده یورولوكده اولان دئریك و یا تئریك بیریمینی، ایران پولونا ان اویغون بیر آد اولاراق ساووندولار آنجاق تاسفله  او زامان كیمسه بو كؤكنلی بیریمین اؤنمینه وارمادی.

بوگونلر، "ریال"ین ، "دولار" و باشقا ارزلر  قارشیسیندا زیریقلاماسی، خالقی پول بیریمی نین " تیریق " آدلاندیرماسینا گتیریب چیخاردیب دیر. گؤروندوگو كیمی " تیریق" ایله " دئریك و تئریك" سس و اویوم باخیمیندان اوست اوسته دوشمكده دیر. بو اولای، بیر داها آریاچی لاریمیزین اولاغان اوستو اوسلو و اوزاق گؤرن اولدوقلارینی گؤسترمكده دیر.

 

ائتیمولوژیك آچیقلاما:

زیریقلاماق: زئرو ، صیفیر دئمكدیر. بانك سیستئمینده، پولون صیفیرلاری نین چوخالماسینا ، زئرولاما دئییلیر. خالق دئییشینده زئرولاماغا ، زیریقلاماق دئییلیر. البته زیریقلاماغین شیددتی آرتیجا خالق  بو بانك تئرمینلرینی  زیریخلاماق و تیریخ كیمی ده سسلندیریرلر!

 



آچار سؤزلر : پول,

    بؤلوم: ساتیریك یازیلار
گؤروشلر : 0
تاريخ : دوشنبه 5 دی 1390 | یازار : دوکتور جئری
+0 به‌ین

ایبیش مجلس سئچكی لرینه آدای اولدو...

مخبریمیز، والی لیك قاباغیندا مجلس سئچكی لرینه آدای اولماق ایسته ین دانا باش كندی نین باش بیله نی؛ ایبیش دانا باشلی ایله بیر سؤیله شی آپاریب دیر. بیرلیكده اوخویاق...

 

جئری نیوز: سیزدن خواهیش ائدیریك اؤزونوزو تانیتدیردیقدان سونرا دئیه سیز  نییه سحر ساعات آلتی دان فرمانداری نین قاباغینی كسیب سیز؟

ایبیش: بیسمئللاهئل رحمانئل رحیم

توانا بود هركی "دانا " بود

اولن من بوتون مسئول لاردان تشكور ائدیرم كی بو انتخاباتی قوبوبلار. ایكیمجن من مسئوللاردان خواهیش ائدیرم بو انتخاباتین مددتینی بیر یا ایكی ایله یئندیرسینلر تا بلكه به حول قوه خدا هامییا نوبه یئتیشه و اما بعد، من ایبیش داناباشلی  بنا به  حسی مسئولییتی كی در قبال قارداش ، باجی ، قارداش اوغلو ، قارداش قیزی،  باجی اوغلو ، باجی قیزی ، عمی ، عمی اوغلو،عمی قیزی ، عمی آروادی و اقوام سببی - نسبی عمی آروادی،  خالا، خالا اوغلو ، خالا قیزی ، خالا اری و اقوام سببی - نسبی خالا اری ، عمه ، عمه اوغلو ، عمه قیزی ، عمه اری و اقوام سببی - نسبی عمه اری و طایفانین بوتون كوركن ، باجاناق ، بالدیزلاری و بخصوص میللتی شریفیمیز ائله دیم در امری خطیری حضور در صحنه انتخاباته اقدام ائله دیم.

جئری نیوز:  انتخاباتدا چیخاساز میلتیمیزه نه ایشلر گؤره جك سیز؟

ایبش: اگر میللتی شریفیمیز منی لایق گؤروب اؤز خدمتگزارلیقلارینا قبول ائتسه لر تصمیم توتموشام داناباش كندینده اولان بوتون مال و املاكیمی ساتیب اونون پولو ایله شهرده بیر قیر یا قوم كارخاناسی جهت اشتغال زایی جوانان عزیز ایجاد ائله یم و اما بعد، مجلسده ، جاده لرمیزین گئنیشلندیریب و آسفالت اولونماسی اوچون الیمدن گلن قدر اقدامات لازیمی گؤروب  بودجه یی لازیمه نی بو امری خطیره اخذ ائله یم. چون بیلدیگیز كیمی جاده لریمیزین دار و خاراب اولدوغو اوچون گونده اونلار نفر جانلارینی بو یوللاردا الدن  وئرمكده دیرلر.

جئری نیوز: بیلدیگیز كیمی اورمو گؤلو قوروماقدادیر. وكیل سئچیلسه ز بو معضله گؤره نه ایشلر گؤره جكسیز؟

ایبیش: اورمو گؤلونون قورماسی یكی از بلایای طبیعی دیر كی هئچ ایش گؤرمك اولماز و گؤرمكده لازیم دئییل و اؤزوده چوخ  اهمیت سیز بیر مسئله دیر . بو موضوعون بؤیوتمه سینده بی شك دست اجانبی خارجی نومایان دیر. آمما  بیز واختی گلنده، بوتون گوجوموزله طرح های كویرزدایینی منطقه ده اجرا ائله یه جه ییك. مردم نیگران اولماسینلار.

جئری نیوز:  قانون اساسی نین 15 نجی ماده سینه گؤره فیكیرلریز نه دیر؟

ایبیش: باغیشلایین ! من قانونی اساسی نین بوتون اصل لرنینی ازبرله میشم آنجاق بیلمیرم نییه بو اصل منیم هئی یادیمدان چیخیر زحمت اولماسا اونو منه بیر كره ده اوخویاسیز.

 

جئری نیوز: زبان و خط رسمی و مشترك مردم ایران فارسی است . اسناد و مكاتبات و متون رسمی و كتب درسی باید با این زبان و خط باشد ولی .....

ایبیش : هه ! به نظرمن، بیز گره ك در جهت پاسداشت زبان فارسی بو اصلین "باید"-ینین گوجلنمه سینه  وار گوجوموزله چالیشاق و الیمیزدن گلنی اسیرگه مه یك و گلمیییه جه ییك ده!

جئری نیوز: جاوانلاریمیزین ایشسیزلیگینه نه ایشلر گؤره جكسیز؟

ایبیش: آغایی محترم، بیزیم مملكتده ایشسیزلیك آدیندا بیر موشكول یوخدور . بیلدیگیز كیمی محترم رئیس جمهوروموز هامینی ایش باشینا قویوب  اگر بیر نفری پیدا اولا بونون خلافینی ثابیت ائله یه من حاضیرام اونون الینی داییمین یانیندا بند ائله یم.

جئری نیوز: دایی نیز نه ایش گؤرور؟

ایبیش : داییمدا داییسی نین یانیندا چالیشماقدادیر.

جئری نیوز: موصاحیبه میز قورتولماقدادیر اگر سون سؤزوز وار و مشت محكمیزی ایستیكباری جهانی نین آغزینا وورماق ایسته ییرسیز بویورون.

ایبیش : من  از كلیه همكندی و همشهریان عزیز درخواست و خواهش ائلیرم ال- اله و سس سسه وئریب منی مجلسه گؤندرمك له بو حقیری در امر خدمتگزاری به مردم فهیم منطقه  یاری ائله سینلر و من قول وئریرم بعد از انتخاب شدن در مجلس هر گون مشت محكم لریمی حواله  دهان ایستیكبار جهانی ائله یم. آللاه قیامتده  سیزین  عوضیزی  وئرسین. والسلام.

.......

سؤیله شی سونراسی 

 قبیش ایبیشی بیر یانا چكیب حیرصلی – حیرصلی:

-اده ! او نه چئشید دانیشماق ایدی لاپ ائله عبارتی قیریلدادیردین ؟!

ایبیش ماییل – ماییل :

-واللاه منده تاخصیر یوخدو هر نه وار او میراتا قالمیش میكروفوندادیر، آدامین قاباغینا توتاندا سؤزلر ائله او سایاق آغیزدان چیخیر...





    بؤلوم: ساتیریك یازیلار
گؤروشلر : 0
تاريخ : شنبه 5 آذر 1390 | یازار : دوکتور جئری
+0 به‌ین

آغلاما!

یازان :دوکتور جئری

محرملیک آیی دیر و آغلاما بازاری چوخ قیزغین.کیمی نین اورگی آغلاییر، کیمی نین سؤزو ، کیمی نین  ایسه گؤزو. آغلاماق یاشامین آیریلماز بیر کسیمی دیر. اینسانین اولومو آغلاماقلا باشلاییب اؤلومو ایسه آغلاماقلا بیتیر. اولوملا اؤلومون آراسی یئنه دولودور آغلامالار ایله. بیری ممه اوچون آغلاییر، بیری دیش ، بیری دیل، بیری … بیریده حسین (ع) اوچون آغلاییر. کیمی نین بیر گؤزو آغلایاندا اوبیری گؤزو گولور ، کیمی نین ایسه گؤزلری آغلایاندا بیغی گولور. آتالاریمیز ” اؤلویه آغلامازلار، دیریه آغلایارلار ” دئیبلر آنجاق بیزیم ان بَتر آغلامالاریمیز اؤلولر اوچوندور . دئییرلر اؤلو اؤلنده شئیطان نم هاراسینا بیر بارماق بال یاخار بلکه بو اوزدندیر. آغلاماغین اؤزونه اؤزگو قوراللاری وار. ” آغلاماغین باجارمایان اؤلوسونو تون به تون سالار” دئمیشلر  یئنه آتالاریمیز. آِغلاملارین بیر بؤلومو ایچدن گلیر یعنی ذاتی دیر.اؤرنک اوچون: کؤرپه نین ممه اوچون آغلاماسی و یا اوشاغین اویونجاق دوکانی نین قاباغیندا یئره سریلیب زیرین – زیرین اؤکوتمه وورماسی.

و ایکینجیسی ایسه ، اؤیرنملی و قازانمالیدیر کی اؤزونه اؤزگو اوخوللاردا اؤیره دیلیر. نئجه آغلایاسان ،نئجه غش ائله یه سن ، نئجه سسی یوخونلادییب نازیکله ده سن ، نئجه گؤزلریندن پیر- پیر یاش اله یه سن ونئجه….

محرملیک آیی دیر و آغلاماغین بازاری چوخ قیزغین. آتالاریمیز ” حسینه آغلاییرسان ، یزیده ده آغلا ” دئییبلر. ایشده ائی بئش میلیون آلیب اون گون روضه دئینلر، ائی نوحه آغاجیندان پارا درنلر، ائی زینجیر ، دؤیول ساتلانلار، ائی چین- ژاپوندان طبیل و قارا پارچا  ایدخال ائدنلر، ائی مذهبی دیزیلر ( سریال) دوزلدنلر، ائی میللتین وار- یوخوندان ائحسان وئرنلر ، ائی یزیدین ایش تؤرتمه (اشتغال زایی) فورصتیندن یارارلانانلار و ائی …

بیرآزدا یزیده آغلایین. اشی ! یزید اولماسایدی هارادان امام حسین(ع) دوکانی آچاجاق ایدینیز. هارادان بیر ایلین گلیرینی بیر آیدا قازاناجاق ایدینیز؟ هارادان….

محرملیک آیی دیر وآغلاماغین بازاری چوخ قیزغین. بیز امام حسینه آغلاییریق حسینه ایسه بیزه….

1389/9/20

 


آچار سؤزلر : محرم, محرم‌لیک,

    بؤلوم: ساتیریك یازیلار
گؤروشلر : 0
تاريخ : پنجشنبه 12 آبان 1390 | یازار : دوکتور جئری
+0 به‌ین

بارماق ائله مك!

یازان : دوكتور جئری

سانجی آمانینی كسمیشدی. بَلَن-بَلَن گئدیردی. آتا  قیزغین - قیزغین:

-سنه الینه گئچنی قارنینا تیخما دئمه دیمی ؟! بارماقلا   تؤك ائشیگه، یوخسا اؤله جكسن! – دئدی.

اوغول آتانین نه دئدیگی ائشیتمه سه ده  دونیانین او بیری اوجوندا ، فوتبال مئیدانیندا ، بیری بونو ائشیتدی. بارماق ائله دی. بارماقدان ، ایللر بویو اوتدورولان  مؤهور – تسبئح ، موللا-مونبر ،  دین – مذهب قوسولدو قامو اویونون اوزونه...





    بؤلوم: ساتیریك یازیلار
گؤروشلر : 0
تاريخ : دوشنبه 9 آبان 1390 | یازار : دوکتور جئری
+0 به‌ین

اوزو قارالار اورمو گؤلونون اوزونو  آغارتدیلار

 

 اورمو  گؤلون گونئی بؤلویونون یوزده یئتمیشی قورویوب دور. یایینلانان  یئنی خبرین آردینجا سورملولار  ، ایكی سئمیناردا  بو یوزده نی  یوزه یئتیرجكلرینه سؤز وئردی لر....

 

اورمو گؤلوندن سون  شكیل

 



آچار سؤزلر : اورمو,

    بؤلوم: ساتیریك یازیلار
گؤروشلر : 0
تاريخ : جمعه 25 شهریور 1390 | یازار : دوکتور جئری
+0 به‌ین

آذربایجان اوخوللاریندا توركجه اوخوناجاق!

 

جئری نیوز: اوخوللارین آچیلماسی عرفه سینده ایران رسمی لری آنایاسانین 15 نجی ماده سی نین یورولوگه كئچه جگینه توخوناراق بیلدیریب لر: " آنا دیللرینده  اوخوللاری اولان 100 مین ائرمنینی گؤز اؤنونه آلاراق اؤلكه ده یاشایان 30 میلیون توركون اؤز آنادیللرینده اؤیرتیم آلماماسی بیزیم اوچون اوتاندیریجی بیر دوروم دور  بو اوزدن بو ایلدن اعتبارن آذربایجانین بوتون اوخوللاریندا تورك دیلی اوخوتدورولاجاقدیر".

 

بو بیلدیریشین یایینلانماسی نین آردینجا، اؤفكه لنن آذربایجان تورك لری، "بیز شیرین – شكر فارس دیلینی بوراخیب تورك دیلینده اوخوماق ایسته میریك " دئیه چیغیر- باغیر سالاراق بوتون شهرلرده خیابانلارا تؤكولوبلر. وئریلن بیلگی لره گؤره پولیس شیددت ایشله ده رك گؤستریجی لری داغیتماغا چالیشیر....

 



آچار سؤزلر : تورکجه, آذربایجان,

    بؤلوم: ساتیریك یازیلار
گؤروشلر : 0
تاريخ : جمعه 11 شهریور 1390 | یازار : دوکتور جئری
+0 به‌ین

اورمو گؤلونون آدالاری

یازان : دوكتور جئری

 

    بیلمیرم یادینیزدادیر یا یوخ ؟ بئش – آلتی ایل بوندان اؤنجه نی دئییرم. اورمو گؤلو هله بو آجیناجاقلی دوروما دوشمه میشدی. او ایللرده ، شیرین دیللی لر، اورمو گؤلو آدالاری نین  توركجه آدلارینی  دییشدیریب آرش ، اردشیر، ایران نژاد، پیشوا، برزو، سروش، مهرداد و ... كیمی فارسجا آدلار قویدولار. بو عاغلی دیلی- شیرین لر سئچدیكلری بو  آریانه آدلاری  " جغرافیای استان آذربایجان غربی " درس لیگینه  سوخوشدوراراق   اوشاقلاری چاش- باش سالماغا باشلادیلار. بایاق فیكرله شیردیم ، ایندیكی هامی ؛ كیمی لری خسته خانادا ، كیمی لری دوستاقخانادا، كیمی لری یئرین اوستونده ، كیمی لری یئرین آستیندا بو قونو ایله  اندیشه له نیرلر گؤره سن بو آغالار نه قاییریرلار؟ گؤره سن بونلاری ، قوراشدیریقلاری فارسجا آدلارین ایشلم دن دوشمه سی بئله قایغی لاندیرمیرمی؟ نییه لال اولوبلار؟ اونلارینكی  دیللری و عاغیلاری شیرین دیر؟ اولمایا اورمو گؤلوندن قالخاجاق دوز قاسیرغالارینا اصیل فارسجا آدلار سئچمكده دیرلر؟!

جزیره‌ای كوچك در دریاچه ارومیه



آچار سؤزلر : اورمو,

    بؤلوم: ساتیریك یازیلار
گؤروشلر : 0
تاريخ : یکشنبه 6 شهریور 1390 | یازار : دوکتور جئری
+0 به‌ین

"یگان ویژه" اورمو گؤلونون یاردیمینا قوشدو...

یازان : دوكتور جئری


آذربایجان میللتی ، اورمو گؤلونون قورتماسینا اعتراض لارینی بیلدیرمك اوچون شهرلرده ، "گلین گئده ك آغلایاق ، اورمو گؤلون دولدوراق " دئیه خیابانلارا تؤكولدولر. بو گؤستریلردن احساسات آتینا مینن  یگان ویژه  قووه لری  ، گؤستریجی لرین آراسینا گؤز یاشاردیجی بومبالار آتماقلا خالقین آغلاماسینا سرعت باغیشلادیلار. وئریلن راپورت لار گؤره، بو آغلامالار سونوجوندا ، اورمو گؤلون سویو چوخالیب دؤولتین توپوغونا چیخماقدادیر....

گلن راپورت لارادك : آغلایا ، آغلایا



آچار سؤزلر : اورمو,

    بؤلوم: ساتیریك یازیلار
گؤروشلر : 0
تاريخ : یکشنبه 30 مرداد 1390 | یازار : دوکتور جئری
+0 به‌ین

خلیج همیشه فارسین باشی ساغ اولسون اورمو گؤلو اؤلدو

یازان : دوكتور جئری

خبر :ایران مجلیسی  ایكی فوریتلی " اورمو گؤلون قورتولوش لایحه سینی" رد ائتمك له خیلاص گوللـه سینی گؤلون باشینا سیخدی.

 یاس تؤره نی : 

    او مرحومون یاس تؤره نی جمعه آخشامی گونو سهند ایستادیوموندا كئچیریله جك. بوتون دوست تانیش لاردان ریجا اولونور بو تؤرنده شیركت ائتمكله او مرحومون روحونو  سولاندیرسینلار.

 اؤرمو گؤلو نییه قورودو؟

چوخلاری اورمو گؤلونون قورماسینی دؤولتین بوینونا آتیرلار. دؤولت ، چایلارین قاباغینا سد وورما ، كؤرپو آدینا گؤلو داش- قوملا دولدوروب گؤزه لری كور ائلمه ، بؤلگه نین یئر آلتی سولارینی حدسیز حسابسیز  چیخاردیب   باشقا یئرلره چكمه و ...  كیمی ائیلملر ایله سوچلانیر. آنجاق بیز اورمو گؤلونون قورماسینی نین ندنلرینی آراشدیردیقدا ، بو فاجیعه ده  دؤولت یوخ بلكه عرب اؤلكه لری نین الی اولدوغونو اؤیرندیك. ایران تاریخ و مدنیتینه غنیم كسیلن عرب لر ییرمی ایل بوندان قاباق ،اؤز یانلاریندان خیلج فارس آدیینی دییشدیریب خیلج عربی قویدولار.   بو گؤز گؤره سی  تجاووزا قارشی ، آذربایجانین غئیرتلی مجلیس نوماینده لری،  آذربایجانین مئشه لریندن قلم و اورمو دریاسیندان  موركب دوزلده رك خلیجین همیشه فارس اولدوغونو بوتون دونیایا اعلان ائتدی لر . بئله لیك له اورمو گؤلو عرب لرین بوش ائدیعاسی اوزوندن قورودو.

آذربایجان مجلیس نوماینده لری نییه ایكی فوریتلی  اورمو گؤلون قورتولوش لایحه سینه سس وئرمه دیلر؟

آذربایجان مجلیس نوماینده لری نین فیكرینجه ، اورمو گؤلونون قورماسی و آذربایجانین كویرلشمه سی میللت اوچون بؤیوك بیر نعمت اولاجاق . چونكو سابقه گؤستریب دؤولت كویرلرین آبادانلیغیندا الدن گلنی اسیر گه مه ییب دیر. بونا گؤره آذربایجان میللتی بیر آز دؤزوملو اولمالی دیرلار.....

گؤیدن اوچ داش دوشدو . بیری....

1390/5/30





    بؤلوم: ساتیریك یازیلار
یارپاق لار: [1] [2] [3] [4]
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :