+0 به‌ین
یئنی پول بیریمی: تیریق
دوكتور جئری
نئچه آی بوندان اؤنجه، پول بیریمی نین دییشمه سینه داییر،اورتالیقدا قیزیل- دولار بازاریندان قیزغین تارتیشمالار گئتمكده ایدی. چئشیدلی بیریملر اؤنریلیركن آریاچی یوردداشلاریمیز ، هخامنشی دؤنمینده یورولوكده اولان دئریك و یا تئریك بیریمینی، ایران پولونا ان اویغون بیر آد اولاراق ساووندولار آنجاق تاسفله او زامان كیمسه بو كؤكنلی بیریمین اؤنمینه وارمادی.
بوگونلر، "ریال"ین ، "دولار" و باشقا ارزلر قارشیسیندا زیریقلاماسی، خالقی پول بیریمی نین " تیریق " آدلاندیرماسینا گتیریب چیخاردیب دیر. گؤروندوگو كیمی " تیریق" ایله " دئریك و تئریك" سس و اویوم باخیمیندان اوست اوسته دوشمكده دیر. بو اولای، بیر داها آریاچی لاریمیزین اولاغان اوستو اوسلو و اوزاق گؤرن اولدوقلارینی گؤسترمكده دیر.
ائتیمولوژیك آچیقلاما:
زیریقلاماق: زئرو ، صیفیر دئمكدیر. بانك سیستئمینده، پولون صیفیرلاری نین چوخالماسینا ، زئرولاما دئییلیر. خالق دئییشینده زئرولاماغا ، زیریقلاماق دئییلیر. البته زیریقلاماغین شیددتی آرتیجا خالق بو بانك تئرمینلرینی زیریخلاماق و تیریخ كیمی ده سسلندیریرلر!
بؤلوم: ساتیریک یازیلار
+0 به‌ین
ایبیش مجلس سئچكی لرینه آدای اولدو...
مخبریمیز، والی لیك قاباغیندا مجلس سئچكی لرینه آدای اولماق ایسته ین دانا باش كندی نین باش بیله نی؛ ایبیش دانا باشلی ایله بیر سؤیله شی آپاریب دیر. بیرلیكده اوخویاق...
جئری نیوز: سیزدن خواهیش ائدیریك اؤزونوزو تانیتدیردیقدان سونرا دئیه سیز نییه سحر ساعات آلتی دان فرمانداری نین قاباغینی كسیب سیز؟
ایبیش: بیسمئللاهئل رحمانئل رحیم
توانا بود هركی "دانا " بود
اولن من بوتون مسئول لاردان تشكور ائدیرم كی بو انتخاباتی قوبوبلار. ایكیمجن من مسئوللاردان خواهیش ائدیرم بو انتخاباتین مددتینی بیر یا ایكی ایله یئندیرسینلر تا بلكه به حول قوه خدا هامییا نوبه یئتیشه و اما بعد، من ایبیش داناباشلی بنا به حسی مسئولییتی كی در قبال قارداش ، باجی ، قارداش اوغلو ، قارداش قیزی، باجی اوغلو ، باجی قیزی ، عمی ، عمی اوغلو،عمی قیزی ، عمی آروادی و اقوام سببی - نسبی عمی آروادی، خالا، خالا اوغلو ، خالا قیزی ، خالا اری و اقوام سببی - نسبی خالا اری ، عمه ، عمه اوغلو ، عمه قیزی ، عمه اری و اقوام سببی - نسبی عمه اری و طایفانین بوتون كوركن ، باجاناق ، بالدیزلاری و بخصوص میللتی شریفیمیز ائله دیم در امری خطیری حضور در صحنه انتخاباته اقدام ائله دیم.
جئری نیوز: انتخاباتدا چیخاساز میلتیمیزه نه ایشلر گؤره جك سیز؟
ایبش: اگر میللتی شریفیمیز منی لایق گؤروب اؤز خدمتگزارلیقلارینا قبول ائتسه لر تصمیم توتموشام داناباش كندینده اولان بوتون مال و املاكیمی ساتیب اونون پولو ایله شهرده بیر قیر یا قوم كارخاناسی جهت اشتغال زایی جوانان عزیز ایجاد ائله یم و اما بعد، مجلسده ، جاده لرمیزین گئنیشلندیریب و آسفالت اولونماسی اوچون الیمدن گلن قدر اقدامات لازیمی گؤروب بودجه یی لازیمه نی بو امری خطیره اخذ ائله یم. چون بیلدیگیز كیمی جاده لریمیزین دار و خاراب اولدوغو اوچون گونده اونلار نفر جانلارینی بو یوللاردا الدن وئرمكده دیرلر.
جئری نیوز: بیلدیگیز كیمی اورمو گؤلو قوروماقدادیر. وكیل سئچیلسه ز بو معضله گؤره نه ایشلر گؤره جكسیز؟
ایبیش: اورمو گؤلونون قورماسی یكی از بلایای طبیعی دیر كی هئچ ایش گؤرمك اولماز و گؤرمكده لازیم دئییل و اؤزوده چوخ اهمیت سیز بیر مسئله دیر . بو موضوعون بؤیوتمه سینده بی شك دست اجانبی خارجی نومایان دیر. آمما بیز واختی گلنده، بوتون گوجوموزله طرح های كویرزدایینی منطقه ده اجرا ائله یه جه ییك. مردم نیگران اولماسینلار.
جئری نیوز: قانون اساسی نین 15 نجی ماده سینه گؤره فیكیرلریز نه دیر؟
ایبیش: باغیشلایین ! من قانونی اساسی نین بوتون اصل لرنینی ازبرله میشم آنجاق بیلمیرم نییه بو اصل منیم هئی یادیمدان چیخیر زحمت اولماسا اونو منه بیر كره ده اوخویاسیز.
جئری نیوز: زبان و خط رسمی و مشترك مردم ایران فارسی است . اسناد و مكاتبات و متون رسمی و كتب درسی باید با این زبان و خط باشد ولی .....
ایبیش : هه ! به نظرمن، بیز گره ك در جهت پاسداشت زبان فارسی بو اصلین "باید"-ینین گوجلنمه سینه وار گوجوموزله چالیشاق و الیمیزدن گلنی اسیرگه مه یك و گلمیییه جه ییك ده!
جئری نیوز: جاوانلاریمیزین ایشسیزلیگینه نه ایشلر گؤره جكسیز؟
ایبیش: آغایی محترم، بیزیم مملكتده ایشسیزلیك آدیندا بیر موشكول یوخدور . بیلدیگیز كیمی محترم رئیس جمهوروموز هامینی ایش باشینا قویوب اگر بیر نفری پیدا اولا بونون خلافینی ثابیت ائله یه من حاضیرام اونون الینی داییمین یانیندا بند ائله یم.
جئری نیوز: دایی نیز نه ایش گؤرور؟
ایبیش : داییمدا داییسی نین یانیندا چالیشماقدادیر.
جئری نیوز: موصاحیبه میز قورتولماقدادیر اگر سون سؤزوز وار و مشت محكمیزی ایستیكباری جهانی نین آغزینا وورماق ایسته ییرسیز بویورون.
ایبیش : من از كلیه همكندی و همشهریان عزیز درخواست و خواهش ائلیرم ال- اله و سس سسه وئریب منی مجلسه گؤندرمك له بو حقیری در امر خدمتگزاری به مردم فهیم منطقه یاری ائله سینلر و من قول وئریرم بعد از انتخاب شدن در مجلس هر گون مشت محكم لریمی حواله دهان ایستیكبار جهانی ائله یم. آللاه قیامتده سیزین عوضیزی وئرسین. والسلام.
.......
سؤیله شی سونراسی
قبیش ایبیشی بیر یانا چكیب حیرصلی – حیرصلی:
-اده ! او نه چئشید دانیشماق ایدی لاپ ائله عبارتی قیریلدادیردین ؟!
ایبیش ماییل – ماییل :
-واللاه منده تاخصیر یوخدو هر نه وار او میراتا قالمیش میكروفوندادیر، آدامین قاباغینا توتاندا سؤزلر ائله او سایاق آغیزدان چیخیر...
بؤلوم: ساتیریک یازیلار
+0 به‌ین
آغلاما!
یازان :دوکتور جئری
محرملیک آیی دیر و آغلاما بازاری چوخ قیزغین.کیمی نین اورگی آغلاییر، کیمی نین سؤزو ، کیمی نین ایسه گؤزو. آغلاماق یاشامین آیریلماز بیر کسیمی دیر. اینسانین اولومو آغلاماقلا باشلاییب اؤلومو ایسه آغلاماقلا بیتیر. اولوملا اؤلومون آراسی یئنه دولودور آغلامالار ایله. بیری ممه اوچون آغلاییر، بیری دیش ، بیری دیل، بیری … بیریده حسین (ع) اوچون آغلاییر. کیمی نین بیر گؤزو آغلایاندا اوبیری گؤزو گولور ، کیمی نین ایسه گؤزلری آغلایاندا بیغی گولور. آتالاریمیز ” اؤلویه آغلامازلار، دیریه آغلایارلار ” دئیبلر آنجاق بیزیم ان بَتر آغلامالاریمیز اؤلولر اوچوندور . دئییرلر اؤلو اؤلنده شئیطان نم هاراسینا بیر بارماق بال یاخار بلکه بو اوزدندیر. آغلاماغین اؤزونه اؤزگو قوراللاری وار. ” آغلاماغین باجارمایان اؤلوسونو تون به تون سالار” دئمیشلر یئنه آتالاریمیز. آِغلاملارین بیر بؤلومو ایچدن گلیر یعنی ذاتی دیر.اؤرنک اوچون: کؤرپه نین ممه اوچون آغلاماسی و یا اوشاغین اویونجاق دوکانی نین قاباغیندا یئره سریلیب زیرین – زیرین اؤکوتمه وورماسی.
و ایکینجیسی ایسه ، اؤیرنملی و قازانمالیدیر کی اؤزونه اؤزگو اوخوللاردا اؤیره دیلیر. نئجه آغلایاسان ،نئجه غش ائله یه سن ، نئجه سسی یوخونلادییب نازیکله ده سن ، نئجه گؤزلریندن پیر- پیر یاش اله یه سن ونئجه….
محرملیک آیی دیر و آغلاماغین بازاری چوخ قیزغین. آتالاریمیز ” حسینه آغلاییرسان ، یزیده ده آغلا ” دئییبلر. ایشده ائی بئش میلیون آلیب اون گون روضه دئینلر، ائی نوحه آغاجیندان پارا درنلر، ائی زینجیر ، دؤیول ساتلانلار، ائی چین- ژاپوندان طبیل و قارا پارچا ایدخال ائدنلر، ائی مذهبی دیزیلر ( سریال) دوزلدنلر، ائی میللتین وار- یوخوندان ائحسان وئرنلر ، ائی یزیدین ایش تؤرتمه (اشتغال زایی) فورصتیندن یارارلانانلار و ائی …
بیرآزدا یزیده آغلایین. اشی ! یزید اولماسایدی هارادان امام حسین(ع) دوکانی آچاجاق ایدینیز. هارادان بیر ایلین گلیرینی بیر آیدا قازاناجاق ایدینیز؟ هارادان….
محرملیک آیی دیر وآغلاماغین بازاری چوخ قیزغین. بیز امام حسینه آغلاییریق حسینه ایسه بیزه….
1389/9/20
بؤلوم: ساتیریک یازیلار
+0 به‌ین
بارماق ائله مك!
سانجی آمانینی كسمیشدی. بَلَن-بَلَن گئدیردی. آتا قیزغین - قیزغین:
-سنه الینه گئچنی قارنینا تیخما دئمه دیمی ؟! بارماقلا تؤك ائشیگه، یوخسا اؤله جكسن! – دئدی.
اوغول آتانین نه دئدیگی ائشیتمه سه ده دونیانین او بیری اوجوندا ، فوتبال مئیدانیندا ، بیری بونو ائشیتدی. بارماق ائله دی. بارماقدان ، ایللر بویو اوتدورولان مؤهور – تسبئح ، موللا-مونبر ، دین – مذهب قوسولدو قامو اویونون اوزونه...
بؤلوم: ساتیریک یازیلار
+0 به‌ین
اوزو قارالار اورمو گؤلونون اوزونو آغارتدیلار
اورمو گؤلون گونئی بؤلویونون یوزده یئتمیشی قورویوب دور. یایینلانان یئنی خبرین آردینجا سورملولار ، ایكی سئمیناردا بو یوزده نی یوزه یئتیرجكلرینه سؤز وئردی لر....
اورمو گؤلوندن سون شكیل
بؤلوم: ساتیریک یازیلار
+0 به‌ین
آذربایجان اوخوللاریندا توركجه اوخوناجاق!
جئری نیوز: اوخوللارین آچیلماسی عرفه سینده ایران رسمی لری آنایاسانین 15 نجی ماده سی نین یورولوگه كئچه جگینه توخوناراق بیلدیریب لر: " آنا دیللرینده اوخوللاری اولان 100 مین ائرمنینی گؤز اؤنونه آلاراق اؤلكه ده یاشایان 30 میلیون توركون اؤز آنادیللرینده اؤیرتیم آلماماسی بیزیم اوچون اوتاندیریجی بیر دوروم دور بو اوزدن بو ایلدن اعتبارن آذربایجانین بوتون اوخوللاریندا تورك دیلی اوخوتدورولاجاقدیر".
بو بیلدیریشین یایینلانماسی نین آردینجا، اؤفكه لنن آذربایجان تورك لری، "بیز شیرین – شكر فارس دیلینی بوراخیب تورك دیلینده اوخوماق ایسته میریك " دئیه چیغیر- باغیر سالاراق بوتون شهرلرده خیابانلارا تؤكولوبلر. وئریلن بیلگی لره گؤره پولیس شیددت ایشله ده رك گؤستریجی لری داغیتماغا چالیشیر....
بؤلوم: ساتیریک یازیلار
+0 به‌ین
اورمو گؤلونون آدالاری
یازان : دوكتور جئری
بیلمیرم یادینیزدادیر یا یوخ ؟ بئش – آلتی ایل بوندان اؤنجه نی دئییرم. اورمو گؤلو هله بو آجیناجاقلی دوروما دوشمه میشدی. او ایللرده ، شیرین دیللی لر، اورمو گؤلو آدالاری نین توركجه آدلارینی دییشدیریب آرش ، اردشیر، ایران نژاد، پیشوا، برزو، سروش، مهرداد و ... كیمی فارسجا آدلار قویدولار. بو عاغلی دیلی- شیرین لر سئچدیكلری بو آریانه آدلاری " جغرافیای استان آذربایجان غربی " درس لیگینه سوخوشدوراراق اوشاقلاری چاش- باش سالماغا باشلادیلار. بایاق فیكرله شیردیم ، ایندیكی هامی ؛ كیمی لری خسته خانادا ، كیمی لری دوستاقخانادا، كیمی لری یئرین اوستونده ، كیمی لری یئرین آستیندا بو قونو ایله اندیشه له نیرلر گؤره سن بو آغالار نه قاییریرلار؟ گؤره سن بونلاری ، قوراشدیریقلاری فارسجا آدلارین ایشلم دن دوشمه سی بئله قایغی لاندیرمیرمی؟ نییه لال اولوبلار؟ اونلارینكی دیللری و عاغیلاری شیرین دیر؟ اولمایا اورمو گؤلوندن قالخاجاق دوز قاسیرغالارینا اصیل فارسجا آدلار سئچمكده دیرلر؟!
بؤلوم: ساتیریک یازیلار
+0 به‌ین
"یگان ویژه" اورمو گؤلونون یاردیمینا قوشدو...
یازان : دوكتور جئری
آذربایجان میللتی ، اورمو گؤلونون قورتماسینا اعتراض لارینی بیلدیرمك اوچون شهرلرده ، "گلین گئده ك آغلایاق ، اورمو گؤلون دولدوراق " دئیه خیابانلارا تؤكولدولر. بو گؤستریلردن احساسات آتینا مینن یگان ویژه قووه لری ، گؤستریجی لرین آراسینا گؤز یاشاردیجی بومبالار آتماقلا خالقین آغلاماسینا سرعت باغیشلادیلار. وئریلن راپورت لار گؤره، بو آغلامالار سونوجوندا ، اورمو گؤلون سویو چوخالیب دؤولتین توپوغونا چیخماقدادیر....
گلن راپورت لارادك : آغلایا ، آغلایا
بؤلوم: ساتیریک یازیلار
+0 به‌ین
خلیج همیشه فارسین باشی ساغ اولسون اورمو گؤلو اؤلدو
یازان : دوكتور جئری
خبر :ایران مجلیسی ایكی فوریتلی " اورمو گؤلون قورتولوش لایحه سینی" رد ائتمك له خیلاص گوللـه سینی گؤلون باشینا سیخدی.
یاس تؤره نی :
او مرحومون یاس تؤره نی جمعه آخشامی گونو سهند ایستادیوموندا كئچیریله جك. بوتون دوست تانیش لاردان ریجا اولونور بو تؤرنده شیركت ائتمكله او مرحومون روحونو سولاندیرسینلار.
اؤرمو گؤلو نییه قورودو؟
چوخلاری اورمو گؤلونون قورماسینی دؤولتین بوینونا آتیرلار. دؤولت ، چایلارین قاباغینا سد وورما ، كؤرپو آدینا گؤلو داش- قوملا دولدوروب گؤزه لری كور ائلمه ، بؤلگه نین یئر آلتی سولارینی حدسیز حسابسیز چیخاردیب باشقا یئرلره چكمه و ... كیمی ائیلملر ایله سوچلانیر. آنجاق بیز اورمو گؤلونون قورماسینی نین ندنلرینی آراشدیردیقدا ، بو فاجیعه ده دؤولت یوخ بلكه عرب اؤلكه لری نین الی اولدوغونو اؤیرندیك. ایران تاریخ و مدنیتینه غنیم كسیلن عرب لر ییرمی ایل بوندان قاباق ،اؤز یانلاریندان خیلج فارس آدیینی دییشدیریب خیلج عربی قویدولار. بو گؤز گؤره سی تجاووزا قارشی ، آذربایجانین غئیرتلی مجلیس نوماینده لری، آذربایجانین مئشه لریندن قلم و اورمو دریاسیندان موركب دوزلده رك خلیجین همیشه فارس اولدوغونو بوتون دونیایا اعلان ائتدی لر . بئله لیك له اورمو گؤلو عرب لرین بوش ائدیعاسی اوزوندن قورودو.
آذربایجان مجلیس نوماینده لری نییه ایكی فوریتلی اورمو گؤلون قورتولوش لایحه سینه سس وئرمه دیلر؟
آذربایجان مجلیس نوماینده لری نین فیكرینجه ، اورمو گؤلونون قورماسی و آذربایجانین كویرلشمه سی میللت اوچون بؤیوك بیر نعمت اولاجاق . چونكو سابقه گؤستریب دؤولت كویرلرین آبادانلیغیندا الدن گلنی اسیر گه مه ییب دیر. بونا گؤره آذربایجان میللتی بیر آز دؤزوملو اولمالی دیرلار.....
گؤیدن اوچ داش دوشدو . بیری....
1390/5/30
بؤلوم: ساتیریک یازیلار
+0 به‌ین
ایرانین یئنی پول بیریمی : قارا
یازان : دوكتور جئری
سوبسیدلرین هدفلی لندیرمه سیله باشلادیلان ایقتیصادی ایصلاحاتین اولوملو سونوجلاری اؤزونو گؤسترینجه ، دؤولت بو پروسه نین سون آشاماسینا كئچمكده دیر.
دوزلدی هر جور یاراغی
بیر قالدی ساققال داراغی
توكانینی بانكایا دؤنوشدورن محله نین اسكی باققالی مشدی غضنفرین وئردیگی خبره گؤره دؤولت، كاغیذین باهالاشدیغینا گؤره ،اؤلكه نین پول بیریمینی دییشدیره جكدیر. یئنی بیریم حاققیندا چئشیدلی اؤنریلر ایره لی سورولمكده دیر. فارس لار: پارسی ، تورك لر : تومن، عرب لر : دینار، لورلار : لوریك ،كورد لر : كورون و… بیریمینی اؤلكه پولونا اویغون گؤرورلر................
بؤلوم: ساتیریک یازیلار
+0 به‌ین
افساریخ
یازان : دوكتور جئری
۱. ائپیزود
بیر گون وار ایدی بیر گون یوخ ایدی. بیرشاه وار ایدی. آدی كورش ایدی. كورش بیلمیردی آریایی دیر چونكو آریا سؤزو هله دوزلمه میشدی. بیر گون یهودی لردن بیر نئچه سی كوروشون یانینا گلیب، ” بخت النصر بیزی اؤلدورور، دریمیزه سامان تپیر، گل بیزی قورتار” دئیه اونا یالواردیلار. كورش سانكی یاتمیش ایدی اویاندی. نئچه واخت ایدی اؤلكه ده سامان قیتلیغی باش وئریب قوشونون آت – ائششگی آجیندان قیریلیردی. كورش اؤفكه ایله یئریندن قالخیب بابیله سالدیری بویروغو وئردی.بابیل ایشغال اولونوب یهودی لر آزاد ، سامانلار ایسه موصادیره اولوندو.
بؤلوم: ساتیریک یازیلار
+0 به‌ین
بالالار سؤزو
جیزما قاراچی : دوكتور جئری
Balalar Sözü
Cızma qaraçı: Dr.Jery
هم میللتدن یئییر هم دؤولتدن
Ham millətdən yeyir hə dövlətdən
ایگید اؤلر بورجو قالار
İgid ölər borcu qalar
شئوئنیسته دئدیلر شاهیدین كیمدیر فاشیستی گؤستردی
Şevenistə dedilər şahidin kimdir? faşisti göstərdi
مقام منصب وار ایدی بلی قوربان وارایدی، مقام منصب قورتولدو بلی قوربان قورتولدو
Məqam mənsəb var idi bəli qurban var idi məqam mənsəb qurtuldu bəli qurban qurtuldu
بؤلوم: ساتیریک یازیلار
+0 به‌ین
قوردباشی ایقتیصادیات
جیزما- قاراچی : دوكتور جئری
سوسیولوقلار دونیادا كومونیزم ، سوسیالیزیم ، كاپیتالیزیم آدلی اوچ چئشید ایقتیصادیاتین اولدوغونو سؤیله ییرلر. اونلار، توپلومدا یاشایان اینسانلاری الین بارماقلارینا اوخشاتاراق، كمونیزمی بؤیوك بارماقلاری كسیب كیچیك بارماق دوزه یینه چاتدیرماق، سوسیالیزمی ، كیچیك بارماقلاری چكیب بؤیوك بارماقجا اوزاتماق ، كاپیتالیزمی ایسه بارماقلاری اؤز حاللارینا بورخماق كیمی بَتیم له یه رك۱ آچیقلاییرلار.آنجاق بوگونلر ایران اؤلكه سینده قورد باشی آدی وئریلن دؤرودونجو چئیشد ایقتیصادیات اورتایا چیخماقدادیر.
قورد باشی ایقتیصادیات نه دئمكدیر؟
بؤلوم: ساتیریک یازیلار
+0 به‌ین
دئمقیراسی
یازان : دوكتور جئری
آچار سؤزلر : قیرا ،دئمقیراسی ،سولو قیراسی ، دیكتاتور
یازیمیزا گئچمدن اؤنجه سایقیلی اوخوجولار قیفیللاماسینلار دئیه آچار سؤزلری بیر آزجیق آچیریق.
قیرا : قارپیزگیللردندیر ، قووونون اوگئی باجی اوغلوسو ساییلیر.
دئمقیراسی : دئمده اكیلن قیرایا دئییلیر. دئمقیراسی چوخ شیرین اولوب اكمه سینده هئچ قایدا - قانون یوخدور و اؤزباشینا یئتیشر .
سولو قیراسی : سولو یئرلرده قایدا- قانونلا و مكانیزه اولاراق اكیلیب كیمیوی كودلار گوجونه یئتیش قیرادیر. بو قیرا سولو اولار آنجاق شیرین اولماز.
دیكتاتور( دیكده +اوتور ) : دیك ده اوتوران ، باشدا اوتوران دئمكدیر .
بؤلوم: ساتیریک یازیلار
+0 به‌ین
موللانصرالدین و آرپانی هدفلی لندیرمه حیكایه سی
یازان: دوكتورجئری
كئچمیشلرده ،دونیا چاپیندا تاخیل فییاتی نین آرتدیغیندان موللانصرالدین آرپانی هدفلی لندیرمك فیكرینه دوشور. بو اوزدن ائششگی نین گونده لیك آرپا جیره سینی یارییا كسیر. بیر ایكی گون كئچیر. موللا ائششگین حالیندا بیر دگیشیكلیك گؤرمه یینجه دوشونور هدفلی لندیرمه نین آردینی توتسون.......
بؤلوم: ساتیریک یازیلار