+0 به‌ین
تویا گئدن رای صاندیغی!
دوكتور جئری
رای صاندیغی كبین كسمه تؤره نینده
عاقید، اوزونو گلینه توتوب دئییر:
- گلین خانیم ، منی وكیل ائدیرسیز، بیر عدد قورآنی كریم سی دی سی و 12 كیلو زنگین لشدیریلمیش اورانیوم قارشیلیغیندا سیزیین دائمی عقدیزی آغایی داماده اوخویام ؟
گلینین باشی اوسته قند اووان قیزلار:
- گلین گئدیب رای سالا.
عاقید ایكینجی كز اولاراق سوروشور:
- گلین خانیم ، من وكیلم؟
یئنه قیزلار:
- گلین رایینی سالیر.
عاقید اوچونجو كز اولاراق:
- گلین خانیم من وكیلم؟
گلین اوتانا – اوتانا:
- " شورای نگهبان" – نین نوماینده لری نین ایجازه سی ایله ، بلی.
رای صاندیغی حنا گئجه سینده
حنا گئجه سی دیر. آشیق سازی باغرینا باسیب بیگی تعریف ائتمكده دیر. بیردن، سئچكی لرین گزر صاندیق چیلاری ایچری گیریرلر. آشیق ساز- سؤزونه سئچكی رنگی قاتیر:
دوغونو(شرقی)، باتینی(غربی) ائدیب دی عاصی
گلسین رایین وئرسین بیگین آتاسی
دئییم آی بیگ تویون موبارك اولسون
گلن قوناقلارین ، جانی ساغ اولسون
هامی یاتیب بیزلر آییق قالاسی
" بیداری اسلامی " – یه چاتاسی
گلسین رایین وئرسین بیگین آناسی
دئییم آی بیگ تویون موبارك اولسون
ائللرین داماغی بوتون چاغ اولسون
لیمانا دایاندی ایران گمیسی
اسدین سولاندی باغی زمیسی
گلدی رایین وئردی بیگین عمیسی
دئییم آی بیگ تویون موبارك اولسون
قورودون دببه ده دؤنوب یاغ اولسون
توپ توفنگیمیزین ساییلماز سایی
دونیادا تاپیلماز شهابین تایی
رایینی گؤندردی آغایی دایی
دئییم آی بیگ تویون موبارك اولسون
تپه لر اوجالسین بؤیوك داغ اولسون
گؤیده بیر اویدو(ماهواره) وار آدی نوید دیر
او شؤوقونو بو مجلیسه سالیب دیر
هامی رایین وئریب داماد قالیب دیر
دئییم آی بیگ تویون موبارك اولسون
ساغدیشین سولدوشون اوزو آغ اولسون
سئچكی لرین گزر صاندیق چیلاری گلین آپاران ماشینین قاباغینی كسیرلر. بیگ گوله – گوله :
- شیرینلیك ایسته ییرسیز؟!
- یوخ ! رای لریزی.....
بؤلوم: ساتیریک یازیلار
+0 به‌ین
ایبیش- ین تبلیغاتی
دوكتور جئری
سیاسی بیلینجین آزلیغی
میللت وكیلی آدایی ایبیش، داناباش كندی نین مسجیدینده دانیشیغینی قورتاریب ائشیگه چیخدیغیندا باشماقلاری نین اوغورلاندیغینی آنلاییر. قیزقین – قیزقین داناباشلی لارا :
- باخین میللت لرین سیاسی شعورو(بیلینجی) بو كیمی یئرلرده بللی اولور، آیری اؤلكه لرده میللت وكیل لرینه باشماق تولازلاییرلار، بیزیمكینده ایسه باشماقلارینی اوغورلاییرلار!
سیجاق قارشیلاما
یوخاری داناباش كندیندن اولان میللت وكیلی آدایی ایبیش، تبلیغات اوچون آشاغی داناباشا گئدیر. آشاغی داناباشلی لار، ازیك بامادور و لاخ یومورتا ایله اونو قارشیلایینجا اؤزونو سیندیرماییب گولومسه ییرك دئییر:
- سیز هاردان بیلدیز منیم اومئلئت دن خوشوم گلیر؟!
یالان قیتلیغی
دانا باش كندی نین مسجیدینده ،میللت وكیلی آدای لاری سیرا ایله گلیب گؤره جكلری ایشلردن دانیشیردیلار. نوبت ایبیشه چاتیر. او میكروفونون آرخاسینا گئچینجه سؤزون اوجو الیندن چیخیب بیر سوره هوروت- هوروت خالیقین اوزونه باخیر.
داناباشلی لاردان بیری:
- آغایی داناباشلی نییه دانیشمیرسیز؟ - دئیه سوروشور.
ایبیش اوزونتو ایله یانیتلاییر:
- واللاه، عاغیلا چاتان هر نه قدر یالان وار ایدی بو قارداشلار سؤیله دیلر منه بیر شئی قالمادی!
مجلیس یوخسا پارلامئنت ؟!
میللت وكیلی آدایی ایبیش، داناباش كندی نین آزاد دانیشگاهیندا سوركلی اولاراق مجلیس یئرینه پارلامئنت سؤزونو ایشله دیردی. اؤیرنجی لردن بیری، بونون ندنینی سوروشونجا او دئدی:
- میللت ائوینه ، پارلامئنت سؤزو مجلیس دن داها اویغون گؤرونور چونكو مجلیسه یول تاپان هر میللت وكیلی بیر ایكی آیین ایچینده پارلاییر، نومونه سی سیزین گئچمیش میللت وكیلیز خودوش ، ائششگی ایله مجلیسه گئتدی ایكی آیا سونرا پرشیا ایله قاییتدی.
بؤیوك ایش!
داناباشلی لار، توالئتین آزلیغیندان میللت وكیلی آدایی ایبیشه شكایت له نیرلر. ایبیش قاشلارینی چاتاراق خالقا دئییر:
- سیز منی مجلیسه گؤندرین؛ سؤز وئریم داناباشین باشا باشینی توالئت ائله یم.
غئیبی ایمداد
میللت وكیلی آدایی ایبیشی مسجیددن چیخاندا بارماق ائله ییرلر. او دؤنوب كیمسه نی گؤرمه یینجه، اللرینی گؤیه قالدیراراق دئییر:
- آللاهیم سنه مین شوكور، ایمدادهایی غئیبینی صحنه یی انتخاباتدا دا بیزدن اسیرگه میرسن!
انتخاباتین شور و نشاطی!
داناباش كندی نین گئچمیش میللت وكیلی خودوش ایله میللت وكیلی آدایی ایبیش دانا تی وی ده تارتیشیردیلار. خودوش بارماغینی ایبیشه ترپه ده رك دئییر:
- بللی دئییل " شورای نگهبان " نئجه سیزی انتخابات صحنه سینه بوراخیب ائشیتدیگیمه گؤره سیز جاوانلارین آراسیندا ائكستازی قورص لاری پایلاییرسیز.
ایبیش دریندن بیر سولوق آلاراق یانتیلاییر:
- اولن ، من گؤز – گؤز ائله دیم نگهبان توالئته گئدنده صحنه یه وارید اولدوم. ایكیمجن، دئدیگیز قورص لاری پایلاماقدان مقصدیم انتخاباتا شور و نشاط گتیرمكدیر...
هاله یی نور!
قبیش ، میللت وكیلی آدایی ایبیش دن سوروشور:
- دونن گئجه، مسجیدده دانیشاندا اطرافیندا نور هاله سی كیمی بیر شئی گؤردوم. او نه ایدی؟
ایبیش اوزگون – اوزگون باشینی ترپه دیب دئییر:
- بیزده او شانس باشیمیزا هاله یی نور دولانا؛ بیلمیرم هانسی كؤپك اوغلی كؤپك جیبیمه یانیق سیگار آتمیشدی!
یا مجلیس یا زیندان!
میللت وكیلی آدایی ایبیش دن سوروشورلار مجلیسه گئده بیلمه سن نه ائدجكسن؟
دئییر: - مجلیسه گئتمه سم زیندانا گئده جم.
- نئجه ؟
- هئچ ... كابابچی، چاپخاناچی و تالارچیلار چك لریمه برگشت ووراجاقلار.
بؤلوم: حیكایه و گولمه‌جه‌لر
+0 به‌ین
آنادیلی بایرامی اویونلاری
دوكتور جئری
21 فوریه، (2 اسفند) اولوسلار آراسی آنادیلی بایرامی دیر. بوتون بایراملاردا اولدوغو كیمی ، آنا دیلی بایرامی نین دا اؤزنه اؤزگو اویونلاری واردیر. بو اویونلار چوخراق شهر و كندلرین كوچه – خیابانلاریندا اوینانیر. بو اویونلاردان : باتوم اویونو، سو فیشقیرما اویونو(سو آیدینلیق سیمگه سی دیر) ، قووالا- قاچدی اویونو، اوچدو- اوچدو اویونو، كار- كور اولما اویونو، لال اویونو، اؤیرنجی- پولیس اویونو و نئچه نئچه آیریسینی آد آپارماق اولار. آنا دیلی بایرامی اویونلاری، رسمی دیللری بیریجیك اولان چوخ اولوسلو اؤلكه لرده سیجاق قارشیلانیر.
آنا دیلی بایرامی نین گلیب چاتماسینی قوتلایاراق سیزلری، اؤزلیك له گول بالالاریمیزی ائو- اوخولدا اوینانا بیله جك " اوچدو، اوچدو " اویونو ایله تانیش ائدیرم. بو اویوندا، دیلی رسمی لر اویون چیخارتماسالار اولدوقجا اگلنجه لی بیر اویونا تانیق اولاجاقسینیز.
- اوچدو، اوچدو، كیتاب اوچدو!
- اوچدو!
- اوچدو، اوچدو، اوخول اوچدو!
- اوچدو!
- اوچدو، اوچدو، موسیقی اوچدو!
- اوچدو!
- اوچدو، اوچدو، سینما اوچدو!
- اوچدو!
- اوچدو، اوچدو ، تیاتر اوچدو!
- اوچدو!
- اوچدو، اوچدو، آنا دیلی اوچدو!
- اوچدو!
- آنادیلی اوچماز فاشیست، سن یاندین ؛ چیخ قیراغا....
- اوچدو، اوچدو.....
بؤلوم: ساتیریک یازیلار
+0 به‌ین
۲۱ فئورال(2اسفند) دونیالیق آنادیلی گونو قوتلو اولسون
دیل و دیش گونو
یازان : دوكتور جئری
۲۱ فئورال ،دونیالیق آنادیلی گونودور. ۱۹۹۹ اینجی ایلدن بری بوتون دونیا میللت لری ایله بیرگه بیزیم اؤلكه ده ده بو گون زوپا – دگنك ائشلیگینده قوتلانماقدادیر. دیلین اؤنمی هر كیمسه یه بللی دیر . من بو دوغرولتودا موباریزه آپاران بوتون چالیشقانلاریمیزین اللرینی بیر- بیر سیخیب باشلاری نین یاشیل قالماسینی اولو تانری دان دیله ییرم. آنجاق چالیشقان قارداشلار ! منجه بو موباریزه ده تكجه دیله یوخ ، دیشه ده دیققت یئتیرمه لی سینیز. بیزیم ایراندا تكجه دیلیمیز یوخ بلكه دیشلریمیزده آرادان گئتمكده دیر. شاشیرمایین! بیر آزآجیق دؤزسه نیز قونونو بیر دوكتور اولاراق بیلیمسل آچیدان آچیقلایاجاغام. بیلدیگینیز كیمی مملكندین ایرسمی دیلی فارسجا دیر و یئنه بیلدیگینیز كیمی ده “ فارسی شكر است “ . یانی فارسی شكر دیر ؛ یانی فارسی شیرین دیر ، یانی فارسی شربت دیر بالدیر! …
بیلیم آداملارینی آراشدیردیقلارینا گؤره شیرینین دیشه ضرری اولوب دیشین چورومه سینه ندن اولار. بو گون فارس دیلی نین شرینلیگیندن دیلداشلاریمیزین دیشلری قورخونج بیر بیچیمده چورومكده دیر. تاسفله بو اولای گؤزلردن یایینمیش كیمسه بونون فرقینده دئییل. بو گئدیشین قاباغی آلماق اوچون، چالیشقانلار، دیلداشلاری فارسجا قونوشدوقدان سونرا و یا فارسجا كیتاب اوخدوقدان سونرا دیشلرینی توركجه ایله میسواك وورمالاری قونوسوندا اویارمالی دیرلار. باری دیل گئدسه ده دیشلر یئرینده قالسین…
1389/11/28
جئری نیوز خبر آژانسی مملكندده گزه رك دیل و دیش و بو گون حاقدا بیر گؤرسل راپورت حاضیرلاییب . بیرلیكده باخالیم:
شاهنامه فردوسی ناققالی نین دیشلری
بسی رنج بردم در این سال سی
نه دیشلر ایتیردیم بدین پارسی
فارسجا گوگول
بیر شوونیست : مزدور اجنبی! چرا دروغ می گی؟
فرهنگستان فارسی ایشچیسی
آرخالوقلار (باستان شوناسلار) هخامنیشی تمدونون ایزلرینی آختاریرلار
اصیل ایران پیشیگی و مسواك سورونو
بابا ! ماما! دیشلریمه یازیغینیز گلسین
كلاس سیز فارسی بیلمه ین كندلی قیزی
من دیشلریمی چوخ سئویرم ، ائشیدیرسنمی ؟
من دیشلریمی چوخ سئویرم ، ائشیدیرسنمی ؟
من دیشلریمی چوخ سئویرم ، ائشیدیرسنمی ؟
بؤلوم: ساتیریک یازیلار
+0 به‌ین
دانا باش كندی نین فولكلوروندا یارانه لر
یازان : دوكتور جئری
یارانه لرین نقدی اولاراق اؤدنمه سی، داناباش كندی نین ایقتیصادیاتینی آلت اوست ائتمكله یاناشی زنگین بیر یارانه سل فولكلورون یارانماسینا ندن اولموشدور. عؤمورلرینده نقدی یارانه گؤرمه ین داناباشلی لار، اكینچی لیك و مالدارلیغا باشی سویوقلوقلا یاناشیب یارانه پوللارینی بولون - سولون خرجله یرك واخت لارینی قهوه خانالاردا شفاهی ادبیاتیمیزین گلیشمه سینه حصر ائتمیشلر. بو مئیمون اولایین ایل دؤنومونده، داناباش كندینده گئدیب، خالق یاردیجیلیغیندان بیر چلنگ حاضیرلامیشیق یارانه نین باعث و بانی لری نین بوینونا آسماق اوچون . بیرلیكده اوخویاق:
آردیندا اوخویون
بؤلوم: ساتیریک یازیلار
+0 به‌ین
بیر نومره بؤیوك شئعیر
دوكتور جئری
بایرام قاباغی، آتا- بابالاریمیز اوشاقلارینا پالتار- باشماق آلاندا،"گلن ایلده گئیه بیله سن" دئیه بیر نومره بؤیوگونو آلاردیلار. بیر نومره بؤیوك پالتار- باشماقلارین ایچینده بؤیویوب زنگین ادبیاتیمیزلا تانیشدیقدا آنلادیم، آتالاریمیز ،"بیر نومره بؤیوك" یؤنتمیندن تكجه اگین-آیاق دئییل بلكه باش- بئیین قونوسوندا ایسه یارالانیبلار. دونن درگیلرین بیرینده، اولو میرزه علی اكبر صابرین، بیر نومره بؤیوك شئعیری ایله راستلاشدیم. شئعیرین اوستوندن یوز ایل گئچسه، بئله كی تاس گؤستریر، هله – هله بئینیمیزه چوخ یئكه دیر. بیرلیكده اوخویاق:
سوال- جواب
میرزه علی اكبر صابر
-گؤرمه! – باش اوسته یومارام گؤزلریم.
-دینمه! مطیعم، كسه رم سؤزلریم.
-بیر سؤز ائشیتمه ! – قولاغیم باغلارام.
-گولمه !- پكی شام و سحر آغلارام.
-قانما! – باجارمام ! منی معذور توت!
بؤیله جه تكلیف محالی اونوت!
قابل امكانمی اولور قانماماق؟!
مجمر نار ایچره اولوب یانماماق؟!
ائیله خموش آتش سوزانینی
قیل منی آسوده ، هم اؤز جانینی.
شئعیرین سربست چئوریسی، سید اشرف الدین حسینی( نسیم شمال)-دن
سوال – جواب
دست مزن!- چشم- ببستم دو دست
راه مرو!- چشم- دوپایم شكست
حرف مزن!- قطع نمودم سخن
نطق مكن!- چشم- ببستم دهن
هیچ نفهم!- این سخن عنوان مكن
خواهش نافهمی انسان مكن
لال شوم، كور شوم ، كر شوم
لیك محال است كه من خر شوم
چند روی همچو خران زیر بار!
سر ز فضای بشریت برآر!
بؤلوم: ساتیریک شعرلر
+0 به‌ین
بویاقچی آدای
دوكتور جئری
كؤنلومه كاباب دوشموشدو. میللت وكیلی آدایلاری نین ، رای قازانماق اوچون كاباب قوناقلیغی وئردیكلرینی ائشیتمیشدیم . اؤز- اؤزومه دئدیم :
- گئدیم گؤروم بیزیم بو ایبیش تبلیغات ایشینی هارا چاتدیریب بلكه ده كاباب اوستونه چیخدیم.
ایبیشین دفتری نین قارشیسیندا تاكسی دان ائنینجه، اونو وانئت دن بویاق قوتوسو بوشالتماقدا گؤردوم.
- خوش گؤردوك ایبش بَی ! نه قاییریرسان اَشی ؟- دئدیم
- اوووه .. بیزده سنی خوش گؤردوك آاا ..دوكتور ! تام زامانیندا گلمیشسن ، كؤمكلیك ائله بویاقلاری دفتره داشییاق، منیم بئلیم آغریییر- دئدی.
زیققانا- زیققانا قوتولاری ایچری داشیركن سوروشدوم:
- بویاقلاری نئیله ییرسن ؟ تبلیغات اوچوندورمو؟...
- یووووخ! بونلارلا دوشمنلرین ساواشینا گئده جَگم...
شاشیردیم دوغروسو.
- اولمایا بویاق قوتولاریندا پارتلاییجی ماده وار، رقیب لرینی می اؤلدورمك ایسته ییرسن ؟!
یئنه یوووخ دئین ایبیش، بویاق قوتولارینی ، دفترین بیر بوجاغیندا اوست اوسته قالادیقدان سونرا چاینیكی الیمه وئریب ائكله دی:
- اوّل گئت وانئتچینی یولا سال ، سونرادا بونو قارشیداكی قهوه خانادان دولدور، اوندان سونرادا گل دئیم بونلارلا نئیله یه جگم.
جیب لریمی وانئتچی ایله قهوه خاناچی نین اتگینه بوشالتدیقدان سونرا دفتره قاییتدیم. ایبیش هره میزه بیر چای سوزدو. ماراقلا دانیشیغین آردینی توتدوم:
-هه دئییردین، سانكی فیرچا- بویاقلا دوشمن ساواشینا گئده جكدین؟
ایبیش قندی آغزینا آتیب چایی ایچه – ایچه :
-مسئوللارین دئدیگینه گؤره، دوشمنلر میللتین حوضورونو انتخاباتدا "كمرنگ" ائتمك ایسته ییرلر. بونا گؤره، منده بو بویاقلارلا "كمرنگ" اولان یئرلری " پُررنگ " ائدیب دوشمنلرین آرزوسونو گؤزونده قویماق ایسته ییرم.
ساتاشاراق دئدیم:
-گؤزله چوخ "رنگلی " اولماسین الینه ایش وئره رسن ها!
ایبیش گولومسه یَرك دئدی:
-یووو... قورخما بیز آتا بابادان بویاقچی دونیایا گلمیشیك رنگلرین اؤلچوسونو یاخشی بیلیریك.
بوم- بوز اولموش چاییمی میزین اوستونه بوراخالی آیاغا قالخدیم. ایبیشده آیاغا قالخیب یولو گؤستره رك:
-به هارایا؟ هله تزه اگلشمیشدیك ؛ دوغرودان دئمه دین نه یاخشی بویانلاردان؟
-هئچ ، كاباب ایگینه گلمیشدیم ، گؤردوم ائششك داغلاییرلار! – دئییب دفتردن ائشیگه چیخدیم.
12/11/1390
بؤلوم: حیكایه و گولمه‌جه‌لر
+0 به‌ین
بیر آزدا بیز اَییلمیشیك!
دوكتور جئری
بالانصرالدین یئنه آتاسی سورغویا توتموشدو:
- هئچ اولارمی آزینلیق چوخونلوغون چاناق – بوشقابینی دامدان یئره تؤكسون؟
- اولار اوغلوم اولار! - دئیه موللانصرالدین باشی ایله ده اونایلادی.
- هئچ اولارمی آزینلیق چوخونلوغون آغزینا قیفیل وورسون ؟
-اولار اوغولوم اولار!
- هئچ اولارمی آزینلیق چوخونلوغو هایانا ایسته سه سورسون؟
- اولار اوغلوم اولار!
- اولار، اولار ، دئییرسن آتا، آخی نئجه اولار؟
موللا، پروفئسوری ساققالینی تومارلایاراق:
- اوغول! من دئییرم اولار سنده دئ اولار!
- آخی نئجه؟
موللا كؤكسونو آریتلادیقدان سونرا:
- گئچنلرده "زینب باجیلاری" بیر كیشی ایله قادینی اؤپوشمك سوچونا ، محكمه یه گتیرمیشدیلر. قادین ایدیعا ائدیردی كوچه ده گئدركن كیشی اونا سؤز آتیب سونرا ایسه اونو اؤپوبدور. قادیندان سوروشدوم :
- بو آغانین نردیوانی وار ایدی؟
- یوخ!
- بو آغا چارپایه گتیرمیشدی؟
- یوخ !
بو یانیتلاری ائشیدینجه شاشقینلیقلا :
- خانیم! ماشاآللاه سیزین ایكی مئتر بویونوز وار؛ یانیندا نردیوان ، چارپایه سی اولمایان بو بیرمئتریاریم آغا نئجه سیزی اؤپه بیلدی آخی؟
قادین گؤزلرینی سوزه رك:
- بو آغا آیاقلاری نین اوجونا قالخدی بیر آزدا من اَییلدیم! – دئدی
بالانصرالدین سؤزه آتلاندی:
- سونوندا نئجه اولدو؟!
- كیم ، چوخونلوقلا آزینلیق؟
- یوخ قادینلا كیشی؟
- هئچ! او راضی بو راضی نه غلط ائله سین قاضی ؛ بوراخدیم گئتدیلر.
بؤلوم: حیكایه و گولمه‌جه‌لر
+0 به‌ین
دولار ایله ریال
دولار ایله ریال بازاردا گؤروشورلر. دولار بیغ آلتی گوله رك ریالا ساتاشیر:
- ریال قارداش! آللاه یامانلیق وئرمه سین نییه رنگین سارالیب، اولمایا تیریق – میریغا دوشموسن؟
ریال دریندن بیر آه چكیب دئییر:
- دردیمی دئشمه دولار قارداش حالیم بتر یاماندی، بیر كیلو مینلیگیمه یاریم كیلو سوزو ( سبزی- گؤی) وئرمیرلر!
دَییش توققوش
قوزو قولتوغوندا بیر كندلی، داواخانایا گیریب نوسخه سینی دوكتورا وئریر. دوكتور نوسخه یه باخمادان گولومسه یه رك:
-عمی ! مال- داوار داواخاناسی ایكی توكان آشاغیدادیر یانلیش گلمیسیز- دئییر.
پرت اولان كندلی:
-نوسخه قوزونون نوسخه سی دئییل منیم نوسخه م دیر. بازارچیلارین ریالا جینس وئرمه دیكلری اوچون بو قوزونو گتیرمیشم داوالارلا دَییش توققوش ائله یم!
ریالین انگی
ریال یامان خسته لنمیشدی. یولداشلاری؛ دولار، یورو و لیره حالینی سوروشماغا گئدیرلر. ریال نفس وورا - وورا قویودان چیخان سسی ایله میزیلداییردی :
-دولار مین تومن اولاجاق؛ دولار مین تومن اولاجاق...
دولار ، الینی ریالین آلنینا قویوب سونرا اؤزونتو ایله دئییر:
-انگینی چكین ساییر باییر ائله ییر!
ریالی قورتارماغین یوللاری
مجلیسده ریالین دگری نین الدن وئرمه سی نین قاباغینی آلماق اوچون جلسه قورولموشدو. میللت وكیللری اؤنریلرینی سونماقدا ایدیلار.
بیرینجی میللت وكیلی : منجه، ریالی دوندوروجویا قویوب ایندیكی دگرینی دوندورمالی ییق.
ایكینجی میللت وكیلی : یوخ ! بو اولاسی دئییل ، بیز گره ك دولارین دگری نین آرتماسی نین قاباغینا شاتیر اوزاداق.
اوچونجو میللت وكیلی : قارداشلار! اؤنریلرینیزه سؤز اولا بیلمز آنجاق خاریجه دن دوندوروجو و شاتیر آلماق اوچون یئترینجه دولاریمیز یوخدور بونا گؤره بو دورومدا هامیمیز باشیمیزی كهلیك كیمی قارا سوخساق یاخشی دیر.
بوتون میللت وكیللری هامیسی بیرلیكده : دوغرودور ! دوغرودور!....
مجلس باشقانی : اوی بیرلیگی ایله اوچونجو میللت وكیلی نین اؤنریسی اونایلانیر.
بؤلوم: حیكایه و گولمه‌جه‌لر
+0 به‌ین
یئنی پول بیریمی: تیریق
دوكتور جئری
نئچه آی بوندان اؤنجه، پول بیریمی نین دییشمه سینه داییر،اورتالیقدا قیزیل- دولار بازاریندان قیزغین تارتیشمالار گئتمكده ایدی. چئشیدلی بیریملر اؤنریلیركن آریاچی یوردداشلاریمیز ، هخامنشی دؤنمینده یورولوكده اولان دئریك و یا تئریك بیریمینی، ایران پولونا ان اویغون بیر آد اولاراق ساووندولار آنجاق تاسفله او زامان كیمسه بو كؤكنلی بیریمین اؤنمینه وارمادی.
بوگونلر، "ریال"ین ، "دولار" و باشقا ارزلر قارشیسیندا زیریقلاماسی، خالقی پول بیریمی نین " تیریق " آدلاندیرماسینا گتیریب چیخاردیب دیر. گؤروندوگو كیمی " تیریق" ایله " دئریك و تئریك" سس و اویوم باخیمیندان اوست اوسته دوشمكده دیر. بو اولای، بیر داها آریاچی لاریمیزین اولاغان اوستو اوسلو و اوزاق گؤرن اولدوقلارینی گؤسترمكده دیر.
ائتیمولوژیك آچیقلاما:
زیریقلاماق: زئرو ، صیفیر دئمكدیر. بانك سیستئمینده، پولون صیفیرلاری نین چوخالماسینا ، زئرولاما دئییلیر. خالق دئییشینده زئرولاماغا ، زیریقلاماق دئییلیر. البته زیریقلاماغین شیددتی آرتیجا خالق بو بانك تئرمینلرینی زیریخلاماق و تیریخ كیمی ده سسلندیریرلر!
بؤلوم: ساتیریک یازیلار
+0 به‌ین
میللت وكیل لری احوالاتی
دوكتور جئری
لالجا
ایبیش میللت وكیلی آدایی اولماق ایسته میش . آد یازدیرماق اوچون والی لیگه گئتمیش . سوركلی توركجه قونوشدوغونو گؤرن اورداكی لار:
-قارداش! بونو بیل مجلیسده توركجه دانیشا بیلمزسن ها! - دئمیشلر اونا.
ایبیش گولومسه یه رك :
-سیز منیم آدیمی یازین سؤز وئریرم چیخسام ، مجلسده لال اولام!- دئمیش.
بیر آللاه بیلیر
سئچیملر یاخینلاشینجا ، میللت وكیلی آدایی ایبیش، بیر قونوشما متنی حاضیرلاییب داناباش كندی نین مسجیدینه گئدیر. میكروفونون آرخاسینا گئچینجه قونوشما متنی نین ایتیلدیگینی آنلاییب خالقا سسله نیر:
-داناباش كندی نین هوشلو باشلی اهالیسی! بورایا گلمه میشدن اؤنجه سیزه وئرجگیم وعده لری بیر من ، بیر آللاه بیلیردی آنجاق ایندی بیر آللاه بیلیر!
مجلیسه بیمه اولماق!
كئچمیش دؤوره لرین مجلیس وكیلی بو كز، اؤزونه ولیعهد سئچن شاهلار كیمی، اوغلونو میللت وكیلی اولماغا حاضیرلاشدیردی. اوغول آتادان سوروشور:
-آتاجان باغیشلایین! مجلیسده لایحه لره نئجه رای وئرمه لی یم؟
آتا قاشلارینی چاتاراق :
-مجلیسده كورسونو عؤمورلوك اولاراق قوروماق ایسته سن ، لایحه لرین تصویبینده اكثریت الینی گؤیه قالدیراندا سنده قالدیر اكثریت الینی آشاغی سالاندا سنده سال !
اللری آغریماسین
مجلیس سئچیملری یاخینلاشینجا ، میللت وكیلی آدایی ایبیش داناباش كندی نین اهالیسینی چیلووكابابخانا قوناق ائله ییر. چیلووكابابی یئییب ائشیگه چیخانلار بیربیرلرینه :
-كابابچی نین اللری آغریماسین چوخ یئمه لی پیشیرمیشدی- دئییرلر.
بو سؤزلری ائشیدن ایبیش خالقا سسله نیر:
-بس منیم اللریم!
كسرلی تبلیغات
میللت وكیلی آدایی ایبیش تبلیغات لاری نین آشاغیسیندا یازمیشدی:
- چیلووكابابیمی یئییب رقیبه رای وئرینلرین بورنوندان گلسین
"كاباب چیلار گونو" قوتلاماسی
مجلیس سئچیملری نین گلیب چاتماسی بوتون كابابچی لارا موبارك اولسون
كابابچی لار اتحادیه سی
میللتی سئویندیرمه
قبیش اوتوبوس شوفئری ایمیش . بیر گون یئنی سئچیلمیش میللت وكیل لرینی مجلیسه آپاریرمیش. میللت وكیل لری گؤره جكلری ایشلردن دانیشماغا باشلامیشلار.
بیرینجیسی : من ایش تؤرتمكله 5 میلیون ایشسیزین اورگینی سئویندیره جگم .
ایكینجیسی : من اعتیادین كؤكونو قازماقلا 15 میلیون معتاد عائله سینی نین اورگینی سئویندیره جگم.
اوچونجوسو:من ائوسیزلره ائو تیكمكله20 میلیون ائوسیزین اورگینی سئویندیره جگم.
...
بو سس- كوی و گوپلاردان حیرسلنمیش قیبیش، آیاغینی قازا باساراق قیشقیرمیش:
-منده اوتوبوسو دره یه سورمكله 75 میلیونون اورگینی سئویندیره جگم....
بؤلوم: حیكایه و گولمه‌جه‌لر
+0 به‌ین
برق ، سئچكی و لامپا پوفله مه
دوكتور جئری
مشروطه انقلابییندان قاباق برق یوخ ایدی چونكو مجلس یوخ ایدی. مجلس اولسایدی ، خالق نوماینده سئچیب مجلسه گؤندرمكله ، مركزدن برق ایمتیازی آلابیلردی ؛ نئجه كی ایندی بیز نوماینده لرمیزین قول- بیلگی نین گوجونه دؤولتدن سو ، برق ، گاز و یا كارخانا ایمتیازلارینی قوپاردیریق.
او قارانلیق دؤنمده ، داناباش كندینده دؤولت خانیم آدلی بیر قاری ایله اوغلو یاشاییردی. دؤولت خانیم، ائو – ائشیگین بوتون ایشلرینی اؤزو گؤره ردی آنجاق گئجه ، یئرلری سالیب یاتماق واختی گلنده اوغلونا دئیردی:
-آی آغیللی بالام! دور لامپانی پوفله .
اوغولون دوداغی میریق ایدی. بو اوزدن پوفله مكده زورلوق چكیردی . او چوخلو پیرتا-پیرتدان سونرا گیلئیله دؤولت خانیما دئیَردی:
-باشینا دؤندوگوم آی گول اوزلو ننه ! سن نییه هرنه چتین ایش وار منه دئییرسن!...
....
بو حیكایه دن ایللر اؤتدو. مشروطه انقلابی اولدو. مجلس یاراندی. برق گلدی. آیدینلیق دؤنمینده ، دؤولت خانیم، ائو- ائشگین ایشلرینی آرتیق اوغلونا تاپشیرمیشدی .تكجه دئییردی:
- او ایشی گؤرمه ، بو ایشی گؤر؛ اورایا گئتمه بورایا گئت؛ اونو گئیمه ، بونوگئی؛ اونا باخما ، بونا باخ؛ اونو اوخوما ، بونو اوخو ؛ اونو یازما ، بونو یاز؛ اونو یئمه بونو یئه ....
برقین گلیشیندن، اوغولون جانی لامپا پوفله مكدن قورتولموشدو آنجاق جمهوری مشروطه یی مشروعه نین ایلكه لریندن بیری سئچیب – سئچیلمه زورلوغو ایدی. سئچكی لرین سیراسی گلنده دؤولت خانیم او- بو ائله مه دن اوغلونا دئییردی:
- آی آغیللی بالام! دور نوماینده نی سئچ!
جانینا لامپا پوفله مه قورخوسو دوشن اوغول رنگ آلیب رنگ وئره رك گیلئیله آناسینا :
-آی گول اوزلو ننه! سن نییه هر نه چتین ایش وار منه دئییرسن!...
بؤلوم: حیكایه و گولمه‌جه‌لر
+0 به‌ین
ایبیش مجلس سئچكی لرینه آدای اولدو...
مخبریمیز، والی لیك قاباغیندا مجلس سئچكی لرینه آدای اولماق ایسته ین دانا باش كندی نین باش بیله نی؛ ایبیش دانا باشلی ایله بیر سؤیله شی آپاریب دیر. بیرلیكده اوخویاق...
جئری نیوز: سیزدن خواهیش ائدیریك اؤزونوزو تانیتدیردیقدان سونرا دئیه سیز نییه سحر ساعات آلتی دان فرمانداری نین قاباغینی كسیب سیز؟
ایبیش: بیسمئللاهئل رحمانئل رحیم
توانا بود هركی "دانا " بود
اولن من بوتون مسئول لاردان تشكور ائدیرم كی بو انتخاباتی قوبوبلار. ایكیمجن من مسئوللاردان خواهیش ائدیرم بو انتخاباتین مددتینی بیر یا ایكی ایله یئندیرسینلر تا بلكه به حول قوه خدا هامییا نوبه یئتیشه و اما بعد، من ایبیش داناباشلی بنا به حسی مسئولییتی كی در قبال قارداش ، باجی ، قارداش اوغلو ، قارداش قیزی، باجی اوغلو ، باجی قیزی ، عمی ، عمی اوغلو،عمی قیزی ، عمی آروادی و اقوام سببی - نسبی عمی آروادی، خالا، خالا اوغلو ، خالا قیزی ، خالا اری و اقوام سببی - نسبی خالا اری ، عمه ، عمه اوغلو ، عمه قیزی ، عمه اری و اقوام سببی - نسبی عمه اری و طایفانین بوتون كوركن ، باجاناق ، بالدیزلاری و بخصوص میللتی شریفیمیز ائله دیم در امری خطیری حضور در صحنه انتخاباته اقدام ائله دیم.
جئری نیوز: انتخاباتدا چیخاساز میلتیمیزه نه ایشلر گؤره جك سیز؟
ایبش: اگر میللتی شریفیمیز منی لایق گؤروب اؤز خدمتگزارلیقلارینا قبول ائتسه لر تصمیم توتموشام داناباش كندینده اولان بوتون مال و املاكیمی ساتیب اونون پولو ایله شهرده بیر قیر یا قوم كارخاناسی جهت اشتغال زایی جوانان عزیز ایجاد ائله یم و اما بعد، مجلسده ، جاده لرمیزین گئنیشلندیریب و آسفالت اولونماسی اوچون الیمدن گلن قدر اقدامات لازیمی گؤروب بودجه یی لازیمه نی بو امری خطیره اخذ ائله یم. چون بیلدیگیز كیمی جاده لریمیزین دار و خاراب اولدوغو اوچون گونده اونلار نفر جانلارینی بو یوللاردا الدن وئرمكده دیرلر.
جئری نیوز: بیلدیگیز كیمی اورمو گؤلو قوروماقدادیر. وكیل سئچیلسه ز بو معضله گؤره نه ایشلر گؤره جكسیز؟
ایبیش: اورمو گؤلونون قورماسی یكی از بلایای طبیعی دیر كی هئچ ایش گؤرمك اولماز و گؤرمكده لازیم دئییل و اؤزوده چوخ اهمیت سیز بیر مسئله دیر . بو موضوعون بؤیوتمه سینده بی شك دست اجانبی خارجی نومایان دیر. آمما بیز واختی گلنده، بوتون گوجوموزله طرح های كویرزدایینی منطقه ده اجرا ائله یه جه ییك. مردم نیگران اولماسینلار.
جئری نیوز: قانون اساسی نین 15 نجی ماده سینه گؤره فیكیرلریز نه دیر؟
ایبیش: باغیشلایین ! من قانونی اساسی نین بوتون اصل لرنینی ازبرله میشم آنجاق بیلمیرم نییه بو اصل منیم هئی یادیمدان چیخیر زحمت اولماسا اونو منه بیر كره ده اوخویاسیز.
جئری نیوز: زبان و خط رسمی و مشترك مردم ایران فارسی است . اسناد و مكاتبات و متون رسمی و كتب درسی باید با این زبان و خط باشد ولی .....
ایبیش : هه ! به نظرمن، بیز گره ك در جهت پاسداشت زبان فارسی بو اصلین "باید"-ینین گوجلنمه سینه وار گوجوموزله چالیشاق و الیمیزدن گلنی اسیرگه مه یك و گلمیییه جه ییك ده!
جئری نیوز: جاوانلاریمیزین ایشسیزلیگینه نه ایشلر گؤره جكسیز؟
ایبیش: آغایی محترم، بیزیم مملكتده ایشسیزلیك آدیندا بیر موشكول یوخدور . بیلدیگیز كیمی محترم رئیس جمهوروموز هامینی ایش باشینا قویوب اگر بیر نفری پیدا اولا بونون خلافینی ثابیت ائله یه من حاضیرام اونون الینی داییمین یانیندا بند ائله یم.
جئری نیوز: دایی نیز نه ایش گؤرور؟
ایبیش : داییمدا داییسی نین یانیندا چالیشماقدادیر.
جئری نیوز: موصاحیبه میز قورتولماقدادیر اگر سون سؤزوز وار و مشت محكمیزی ایستیكباری جهانی نین آغزینا وورماق ایسته ییرسیز بویورون.
ایبیش : من از كلیه همكندی و همشهریان عزیز درخواست و خواهش ائلیرم ال- اله و سس سسه وئریب منی مجلسه گؤندرمك له بو حقیری در امر خدمتگزاری به مردم فهیم منطقه یاری ائله سینلر و من قول وئریرم بعد از انتخاب شدن در مجلس هر گون مشت محكم لریمی حواله دهان ایستیكبار جهانی ائله یم. آللاه قیامتده سیزین عوضیزی وئرسین. والسلام.
.......
سؤیله شی سونراسی
قبیش ایبیشی بیر یانا چكیب حیرصلی – حیرصلی:
-اده ! او نه چئشید دانیشماق ایدی لاپ ائله عبارتی قیریلدادیردین ؟!
ایبیش ماییل – ماییل :
-واللاه منده تاخصیر یوخدو هر نه وار او میراتا قالمیش میكروفوندادیر، آدامین قاباغینا توتاندا سؤزلر ائله او سایاق آغیزدان چیخیر...
بؤلوم: ساتیریک یازیلار
+0 به‌ین
ننه - دده سیز چیلله!
دوكتور جئری
گئجه دیر. یاشلی لار ائوی نین بوروسوندان كفنسی توستو توتمكده دیر. قوجالار میزین اوستونده كی قارپیزا گؤز تیكه رك چیلله آنی لاریندان دانیشیرلار؛ كورسو باشی نین سیجاقلیغی ، خان ننه نین ناغیلی، بؤیوك بابانین قارپیز كسمه سی ، یئر- یئمیشلرین قاپان قاپیشی ، اوشاقلارین قهقهه سی...
آنی لار گؤزلرده اولدوزلاشیر . بیردن یاتاقخانانین قاپیسی گورولتو ایله آچیلیر. گؤزلر قارپیزدان قاچیر؛ گئچمیش ایندی له شیر.
-گلن كیمدیر؟- گئچیر اوركلردن - اوغول ، قیز یوخسا تورونلار؟
- یابانجی دئییل تانیش دیر...- دئییر عزرائیل ..
قوجالار بیر- بیرلری نین اوزونه باخیرلار.
عزرائیل گولومسه ییر :
-شئی!... قارپیزین جانینی آلماغا گلمیشدیم بو كره...
1390.9.29
آنی : خاطیره
تورون : نوه
بؤلوم: حیكایه و گولمه‌جه‌لر
+0 به‌ین
" پان" – لار دونیاسی!
دوكتور جئری
موللانصرالدین، بالانصرالدینین قولتوغونداكی كیتابی گؤستَره رك سوروشور:
- توركجه كیتاب اوخویورسان؟! اولمایا سنده پان توركیست اولوبسان؟
- نه دخلی وار آتاجان ؟ باخین سیزده فارسجا قزئت آلیب سیز، بئله ایسه سیزده پان فارسیست سیز...
موللانصرالدین گولومسه ییر:
-یوخ اوغول! من پان فارسیست دئییلم، قزئتی یالنیز شوشه لری سیلمك اوچون آلمیشام.
بؤلوم: حیكایه و گولمه‌جه‌لر