+0 به‌ین
زیرنا چالما
دوکتورجئری
کسینلیک‌له سیزده زیرناچیلار اورکستراسی‌نین آدینی ائشیتمیش‌سینیز. نئچه ایل اولار دؤولتین مادی و معنوی دستگی ایله بیز بو موسیقی قروپونو یاراتمیشیق. بیزیم باشلیجا وظیفه‌میز، کولونگ وورما یا آچیلیش مراسیم‌لرینده بولونماقدیر. مملکندین هانیسی نؤقطه‌سینده اولورسا اولسون، بیزیم سسیمیز گلنده، یقین بیلین دونیانین ویا هئچ اولماسا اورتادوغونون بؤیوک بیر پروژ‌ه‌سی آچیلماقدادیر.
بیز هفته‌ده ایکی گون شهرین فردوسی مدنیت ساراییندا تمرین ائدیردیک. تأسوفله بو آغیزی یانمیش خرونا خسته‌لیگی چیخاندان، چالیشمالاریمیز آخساماغا باشلاییب. کئچنلرده، امکداشلارلا آنلاشدیق؛ تمرین‌لریمیزی هر دؤنه بیریمیزین ائوینده گئچیردک. دونن، قلئیچی مورتوض‌گیلین ائوینده ایدیک. زیرنالاری کؤکله‌ییب تزه چالماغا باشلامیشدیق بیردن حیط قاپیسی گورولتو ایله آچیلدی. اوستاد دفتری اوتاغین پرده‌سی‌نین آراسیندان ائشیگه باخدی:
- ائی وای شیخ آغادیر!
قلئیچی مورتوضا اؤفکه‌لندیم:
- بو هارادان تاپلیب گلدی؟.. سن دئییردین به بو ساعات تلویزیوندا چیخش ائده‌جکدیر؟!
اوستاد دفتری ایکی الینی باشینا تاپدادی:
- ائشیتمیشم شیخ آغا بتر موسیقی ایله موخالیف‌دیر.. ایندی گلیب پسه-پوسه‌میزی بیرینه ووروب زیرنالاریمیزی سیندیراجاق..
قلئیچی مورتوض بیزی ساکیتلشدیرمگه چالیشاراق دیوارا آسیلمیش یوغون بیر زیرنانی گؤستریب دئدی:
- قورخمایین جانیم!.. دده‌لیگم زیرنا چالانلارین لاپ یئکه‌سی‌دیر!
بؤلوم: حیكایه و گولمه‌جه‌لر
+0 به‌ین
سیز جهنّمه!
دوکتورجئری
ترس آوا کندی بیر-بیرینه دَیمیشدی. خالق، ایمامزادا
اسحاق‌ین قاباغینا توپلاشیب زور-گوج ایله ایچری‌یه گیرمک ایسته‌ییردی. خرونا خسته‌لیگی
چیخاندان شیخ آغانین بویروغو ایله ایمامزادانین قاپیسی باغلانمیشدی. کندین کلانتری-قوچو
نیظام، جاماعاتی داغیتماغا چالیشیردی آنجاق کرپیچ تیکه‌لری فیرلانماغا باشلایینجا
قاباقدان قاچدی. اوزاقدان بو گؤرونتونو گؤرن شیخ آغا اوزونتو ایله باشینی
توولایاندا قلئیچی موتوض دئدی:
- آغا!.. ایجازه وئرین من گئدیب جاماعاتی
داغیدیم یوخسا ایندی قاپینی سیندیراجاقلار...
شیخ آغا آجی-آجی گولومسه‌دی:
- اوغول!.. قوچو نیظام قاباقدا دایانا بیلمه‌یینجه
سنین الیندن نه ایش گلر آخی؟!...
قلئیچی مورتوض یالواردی:
- آغا!.. ایجازه وئرین ده...
شیخ آغا دینمه‌یینجه، قلئیچی مورتوض قالابالیغا
ساری قاچدی. بیرآزدان جاماعات داغیلیشماغا باشلادی. کیمیلری باشلارینی آشاغی
سالمیشدی. بو سیرادا قلئیچی مورتوض تاپیلیب گلدی. شیخ آغا چاشقین- چاشقین سوروشدو:
- اوغول!.. سن جاماعات نه دئدین داغیلیشدیلار؟!
قلئیچی مورتوضون دیشلری آغاردی:
- دئدیم: سیز جهنمه!.. ایچری‌یه دولوشوب سید
اسحاق خرونا توتسا، بیز هارانین داشینی باشیمیزا سالاجاغیق؟
بؤلوم: حیكایه و گولمه‌جه‌لر
+0 به‌ین
گئچن یازیمیزدا (کرونا آمریکانین ایشی‌دیر!) دئدیک: شیخ آغا خورنا توتوب ساییر-باییر ائتمکده ایدی. ایندی ایسه احوالاتین قالانی...
دردلرین درمانی بیزده دیر
دوکتور جئری
قلئیچی مورتوض‌لا شیخ آغانین باشی‌نین اوسته اوتوروب پیچیلداشماقدایدیق. بیردن قاپی آچیلیب موللا فرضعلی ایچری گیردی. کیم ایسه موللایا خبر وئرمیشدی. دیک آیاغا قالخدیق. موللا فرضعلی دورتمه ایله قلئیچی مورتوضون چیگنینه ووروب قیشقیردی:
- نییه منه خبر وئرمه‌میسن؟.. ایسته‌ییردین بیزی باشسیز قویاسان؟
سونرا نیفرت‌له منیم اوزومه باخاراق آرتیردی:
- پخمه نییه ایسلامی طیبی بوراخیب، گئدیب بو فیرنگیستان دوختورونو گتیریبسن؟.. اوتانمیرسان؟!..
قلئیچی مورتوض باشینی آشاغی سالدی. موللا فرضعلی دیزه اوسته اوتوروب الینی شیخ آغانین باشینا قویدو. آغا گؤزلرینی آچیب گئنه "امی.. امی.." دئمگه باشلادی. موللا فرضعلی جانتاسینی آچیب ایچیندن بیر شوشه چیخارتدی. قلئیچی مورتوضون قولاغینا پیچیلدادیم:
- آلکول‌دور..
موللا فرضعلی اگری- اگری منه باخدی:
- آلکول یوخ.. زکریای رازی دواسی‌دیر!..
سونرا شوشه‌نی شیخ آغانین آغزینا سوخوب قورتا-قورت‌لا بوغازینا بوشالتماغا باشلادی. بیردن شیخ آغانین آغزی قیفیل‌لانیب گؤزلری کله‌سینه چیخدی.
- ائی وای دده‌لیگم اؤلدو..-دئیه قلئیچی مورتوض دیزلرینه تاپدادی.
موللا فرضعلی اؤزونو ایتیرمه‌دی:
- قورخمایین.. بیر شئی دئییل!.. گره‌ک شیخ آغایا ایماله ائله‌یک، تئز اولون آغانی اوزوقویلو چئویرین..
موللا فرضعلی چئویک‌لیکله جانتاسیندان بیر نئچه خیارا بنزه‌ر شئی چیخادیب آلتدان شیخ آغایا یئیرتمگه باشلادی. بیر-ایکی ساعاتدان شیخ آغا اؤزنه گلدی. داها امی.. امی دئمیردی:
- موللا فرضعلی.. سن آللاه قویما اؤلوم.. آخی من آغیزی نجیسلی.. گؤتو یاشلی نئجه آللاهین حوضورونا گئدیم؟..
بؤلوم: حیكایه و گولمه‌جه‌لر
+0 به‌ین
کرونا آمریکانین ایشی‌دیر!
دوکتور جئری
گئجه یاریسی تلفون زنگ چالدی. قلئیچی مورتوض ایدی کسیک-کسیک دانیشیردی:
- دوکتور اؤزونو یئتیر.. دده‌لیگم الدن گئدیر.. بتر قیزدیرماسی وار.. ائله‌بیل خورانا توتوب...
تلم-تلسیک اؤزومو شیخ آغانین باشی اوستونه یئتیردیم. یوخلادیقدا گئج گلدیگیمی آنلادیم. شیخ آغا ساییر-باییر ائتمکده‌ایدی.
- امی..امی..
قلئیچی مورتوضا باخیب ایشاره ایله ایشین-ایشدن گئچدیگینی آنلاداراق دئدیم:
- ائله بیل شیخ آغا عمی‌سینه وصیت ائله‌مک ایسته‌ییر.. عمیسی کیمدیر دئیین گلسین اوتاغا...
قلئیچی مورتوض پیققیلدادی. اگری-اگری باخدیغیمی گؤرونجه اؤزونو ییغیشدیردی:
- دده‌لیگم ماحالدا بیر ترس‌لیک چیخاندا دئیردی "امریکانین ایشی‌دیر". ایندیسه اینجاری قالماییب دئیه، "امریکانین ایشی‌دیر"، امی.. امی.. دئییر.
بؤلوم: حیكایه و گولمه‌جه‌لر
+0 به‌ین
ائتمه، ائدرلر!
دوکتور جئری
دونن آخشام کئفلی ایسکندری گؤردوم. چوخ شنگول گؤرونوردو. ساتاشدیم بیله‌سینه:
- ایسکندر بگ! همیشه بو داماغدا! نه اولوب؟.. اولمایا کرونانی شیکست وئریب‌سن؟
قاققاناق چکیب گولدو:
- اوندان دا بتر!.. موللا فرضعلی‌نی تانییرسان؟
- قونشوزو دئییرسن؟
باشی ایله دوغرولایاراق دئدی:
- موللا فرضعلی‌دن آجیغیمی آچدیم...
- نئجه؟.. نئجه؟..
- من هر واخت دوستلاری ائوه چاغریب بیر- ایکی ایستیکان وورماق ایسته‌ینده مأمورلارا راپورتوموزو وئریردی. من ده بو گون آجیغیمی آچیب اونو مچیدده گیزلیجه جاماعات نامازی قیلاندا پولیسه شئیطانلادیم!
بؤلوم: حیكایه و گولمه‌جه‌لر
+0 به‌ین
بیز اوّل...
دوکتور جئری
خورانا ویروسونون بلاسیندان آماندا قالماق اوچون دونن شیخ آغانین خیدمتینه یئتیدیک بیزیم اوچون کسرلی بیر دوعا یازسین. قوربانی اولدوغوم آغا، باش بارماغی ایله "بیر دقیقه ایجازه وئرین" دئیه اگینیه اوزای آداملاری‌نین پالتارلاریندان گئییب آغزینا یئکه بیر ماسک ووروب اللرینه الچک گئچیریب سونرا ماسانین اوستونده‌کی پیس-پیسی گؤتوروب آپاردیغیمیز قلم-کاغیذین اوزرینه فیسیلداتاراق نسه یازماغا باشلادی. آغا یازا-یازا گؤز آلتی بیزیم چاشقین-چاشقین اونون اگین-باشینا باخدیغیمیزی گؤرونجه بویوردو:
- اوّل ائششگی آغاجا باغلایین سونرا آللاها تاپشیرین!
بؤلوم: حیكایه و گولمه‌جه‌لر
+0 به‌ین
دیش آغریسی
دوکتور جئری
قلئیچی مورتوض شیخ آغانی ماشیندان یئندیرینجه، بئلینه آلیب زیققانا-زیققانا خسته‌خانایا گیردی. بیر ساعات اولاردی دده‌لیگی دیش آغریسیندان هارای تپمکده ایدی. دده‌لیگینی تختین اوستونه اوزادار-اوزاتماز، دوکتور یوخلاماغا گلدی. شیخ آغا سیزیلدایا-سیزیلدایا آغزینی آچیب دوکتورا گؤستردی. دوکتور بویلانیب باخینجا بیردن آلنی قیریشلاندی. تئز شیخ آغانی اوزوقویولو چئویریب ایکی بارماغی ایله تومانینی آشاغی چکیب ناموس ناحیه‌سینی گؤزدن گئچیردیکده دالی-دالی چکیلیب اوتاقدان قاچاندا قلئیچی مورتوضا دئدی:
- سنین بوردا قالماغان گره‌ک یوخ! صاباح گل دده‌لیگین آپار.
ائرته‌سی گونو بیر قوطو شیرنی ایله دده‌لیگینی آپارماغا گلن قلئیچی مورتوض، ائشیتدیکلرینه اینانماق ایسته‌میردی. دده‌لیگی شیخ آغا اؤلموشدو. شیرنی قوطوسو الیندن یئره دوشدو. سارسیلیب یئره اوتوردوقدا ایکی الی ایله باشینا تاپدایاراق اوخشاماغا باشلادی:
- دده!.. دده!.. سن اؤلمزدین، دیش سنی اؤلدوردو؛ دیشین سیـ... (فیلان- فیلان ائله‌ییم!)
بؤلوم: حیكایه و گولمه‌جه‌لر
+0 به‌ین
21 فوریه (2 اسفند) اولوسلارآراسی آنا دیلی گونو
قوتلو اولسون
تاخما دیل
دوکتور جئری
ایکی آی اولار دوکتورلار بیناسیندا دیش مطبی آچمیشام. هم دیش چکیرم همی ده یاخشی تاخما دیش قاییریرام [بو جومله تبلیغات اوچون دئییل!]. ایکی- اوچ گون بوندان قاباق ایش دالیسجا گزن قلئیچی مورتوضدان ایسته‌دیم، مطب یولا دوشوب من یاخشی بیر مونشی تاپینجا، گلیب دفترده پته وئرسین.
دونن ایچریده بیر خسته‌نین دیشینی چکرکن دفتردن بیلیرسیز بیر سسلر ائشیتدیم؛ کیسمه فارسجا دانشیر، قلئیچی مورتوض دا جاوابیندا نمنه‌لر دئییردی. بیرآزدان سسلر کسیلدی. خسته‌نین دیشی چکیب آغزینا بیر یوماق پامبیق باسدیقدا قلئیچی مورتوض چاغیریب جریانی سوروشدوم:
- بیر نفر گلمیشدی یاریم ساعات تورک لهجه‌سی ایله فارسی دانیشدیقدان سونرا قیشقیردی: زبان فارسی نمی‌‌دونی؟ دوزو، من فارس دیلینی یاخشی بیلمیرم آنجاق سؤزلریندن بئله آنلادیم بیله‌سینه قاییردیقلاری تاخما دیل بوغازینی وورور. طرفه دئدیم؛ مطبی یانلیش گلیبسن بوراسی دیش مطبی‌دیر، دوکتور حداد عادیلین مطبی آشاغی قاتدادیر...
بؤلوم: حیكایه و گولمه‌جه‌لر
+0 به‌ین
ایسلام خطرده دئییل!
دوکتور جئری
آللاه حؤکومتدن راضی اولسون، گئنه مجلیس سئچکیلرینی علم ائله‌دی یوخسا لاپ داریخمادان پارتلایاجاق ایدیک! گئچن هفته‌یه‌دک ایشیمیز بو اولموشدو؛ مشه نیظامین قهوه‌خاسینا گئدیب سامانی چایلاریندان ایچه‌رک یازین گلمه‌سینی، شهرده فهله‌لیگین چیخماسینی گؤزله‌یک؛ آنجاق ایندی نئچه گوندور یولوموزو کندین مچیدینه اگمیشیک. ندنی ده مجلیس سئچکیلرینه آدای اولان نوماینده‌لرین، کندیمیزه تؤکولوشمه‌سی‌دیر. آللاه حؤکومت ایله آدایلارا اوزون عؤمور وئرسین، ایندی رنگلی چای ایله شیرنی قاباغیمیزدان اسکیک اولمور، آرا-سیرا ساندویج ده خالقین آراسیندا پایلاییرلار. هله آدایلارین بیری سؤز وئریب جومعه آخشامی گونو دده‌سی نین احسانینا مچیدده کاباب وئره‌جکدیر.
دونن آخشام ، مجلیس سئچکیلری آدایلاریندان ، جناب وکیل‌زاده ، باشلاریندا شیرنی خونو گؤتورن ییرمی بئش نفرین ائشلیگینده مچیده وارید اولدو. ترس‌آوالیلار دریندن جوشقولاندیلار. دوغرودان دا کندلیلر کاتتانین اوغلونون تویوندان، بو قدر خوْن گؤرمه‌میشدیلر. جناب وکیل‌زاده میکروفونون دالینا گئچیب قاباقکی مجلیس نوماینده‌سی‌نین پوخ-سودوگونو ائشیگه تؤکندن سونرا دئدی:
- حؤرمتلی ترس آوالیلار! بوگون اینتیخاباتدا شیرکت ائله‌مک بیر وظیفه‌یی شرعی‌دیر. بؤیوک دوشمن آمریکا جنگی گمیلرینی گتیریب بؤیروموزه دایاییب. ایسلام خطرده دیر...
جناب وکیل‌زاده‌نین سؤزلری‌نین بوراسیندا، جاماعاتین آراسیندان قلئیچی مورتوض آیاغا قالخیب بارماغی ایله مینبرین دیبینده اوتوران کاتتا ایسلامی گؤسته‌ره‌رک اعتراض ائله دی:
- ایسلام هئچ ده خطرده دئییل، ماشالله بئش یوز قویونو وار!
بؤلوم: حیكایه و گولمه‌جه‌لر
+0 به‌ین
هله هاراسی‌دیر؟
دوکتور جئری
ایقتیصادی دوروم گونو-گوندن آغیرلاشماغا باشلایینجا ، بیز ترس آوا کندی‌نین آغ ساققاللاری ییغیشیب بیر چؤزوم یولو تاپماق اوچون دونن شیخ آغانین ائوینه گئتدیک. قاپینی دؤیدوکده، قلئیچی مورتوض ائشیگه چیخدی. احوالاتی آنلاتدیق. اوزونتو ایله باشینی آشاغی سالیب دئدی:
- گؤروش مومکون دئییل؛ دده‌لیگیم ایندی قونشو کندلرین موشکوللرینه یئتیشمکده‌دیر.
یوخ جاوابی ائشیدینجه، قاباقجادان حاضیرلادیغیمیز ایکیجه تراولی چیخاردیب اووجونا باسدیق. گولومسه‌ییب بیزی قوناق اوتاغینا بوراخدی. هاندان-گئجدن شیخ آغا تاپیلیب گلدی. اوستاد دفتری‌نی قاباغا ایتله‌دیک. اوستاد شیخ آغانین الینی اؤپدوکدن سونرا عرض ائله‌دی:
- آغا! باهالیق بئلیمیزی بوکمکده‌دیر، یئیه‌جک باها، ایچه‌جک باهادیر. یئمگه چؤرک بئله چتینلیک‌له تاپا بیلیریک. هله اوسته‌لیک دؤولت هر شئیه، سویا، برقه، گازا، هاوایا وئرگی باغلاییب، ایداره‌لره گئدنده مأمورلار قولاغیمیزی کسمه‌دن بوراخمیرلار. آروادلاریمیز کبینلرینی ایسته‌ییرلر، اوشاقلاریمیز اوزوموزه قاباریریرلار...
اوستاد دفتری ساییب-ساییب یورولاندا، شیخ آغا اوجا سسله اسنه‌ییب دئدی:
- هله هاراسی‌دیر؟
بؤلوم: حیكایه و گولمه‌جه‌لر
+0 به‌ین
دده‌لیک هارادادیر؟
دوکتور جئری
نئچه واختدیر قلئیچی مورتوض یئنی بیر ایش تاپیب. دده‌لیگی شیخ آغانین عاییله شؤفری اولوب سحردن آخشامادک اونون آرواد-اوشاغی‌نین اویان-بویانا آپاریر. جومعه آخشامی شیخ آغانین آروادی حاجیه مصمه خانیم قلئیچی مورتوضو چاغیریب دئدی:
- بالا مورتوض بوگون ایستی سویا گئدک. بیلمیرم نئچه گوندور نییه قیچلاریم آغرییر.
قلئیچی مورتوض الینی گؤزونون اوستونه باسیب ماشینی جامیش گؤلونه سوردو. ایستی سودا، حاجیه خانیم ماشیندان ائنیب گؤله گئدرکن قئلیچی مورتوض ایضافه کار ایشله‌مک اوچون اونون چانتاسینی آختارماغا باشلادی. بیردن پالتارلارین آراسیندا گؤزو بیر مصنوعی دستگاها ساتاشدی. بو سیرادا حاجیه خانیم گؤلدن سسلندی:
- بالا مورتوض گل سن ده چیم...
قلئیچی مورتوض باشینی ماشینین پنجره‌سیندن چیخاردیب قیشقیردی:
- خانیم سیز چیمین، من دده‌لیگیمله اوتورموشام!
بؤلوم: حیكایه و گولمه‌جه‌لر
+0 به‌ین
یالان آدامی
دوکتور جئری
قلئیچی مورتوض مجلیس سئچکیلرینه آدای اولوب. دونن آخشام برنامه‌لرینی آچیقلاماق اوچون ترس‌آوانین مچیدینده خالقا دانیشاجاقدی. ساعات سککیزده اؤزوموزو مچیده یئتیردیک. مچید قیم-قیم قیمیلداییردی. چوخ چکمه‌دی، قلئیچی مورتوض سلام-صلوات ائشلیگینده میکروفونون آرخاسینا گئچیب دانیشماغا باشلادی:
- مچیده گلرکن، حؤرمتلی همشهری‌لریم مندن سوروشوردولار؛ سیز سئچکیلری قازانسانیز نه ایشلر گؤره‌جکسینیز؟ بو سورغونون جاوابیندا دئمه‌لی‌یم؛ عزیزلریم، سیز منی لاییق گؤروب رأی وئرسه‌نیز، چوخ-چوخ بؤیوک ایشلر گؤره‌جگم. باش کنده چاتجاق ایلک اؤنجه اؤزومه بیر قارا شوشه‌لی شاسی بولند ماشین آلاجاغام. شهرین شومالیندا بیر بؤیوک و آبیرلی ائو اؤزومه تداروک گؤره‌جگم. آلتیمی مجلیسده برکیتدیکده شهرین بوتون ایداره‌لری‌نین مسئوللارینی دگیشدیریب اؤز قوهوملاریمی اونلارین یئرینه قویاجاغام. سئچکیلرده منه یاردیم ائدن بوتون دوستلارا رانت وئره‌جگم. هئچ کیمه پورسانت‌سیز ایش گؤرمه‌یه‌جگم...
اوستاد دفتری‌نین اوزونه باخدیم. اودا منیم کیمی چاشیرمیشدی. مچیده ولوله دوشدو. جاماعات بیردن بیره آیاغا قالخیب باسا-باسلا مچیدن ائشیگه چیخماغا تلسدیلر. کیمیلری دوداق آلتی یامان دئییردی. دورمو بئله گؤرن قلئیچی مورتوض اؤفکه‌له‌نرک قیشقیردی:
- سیز، دوز سؤزون آدامی دئییل‌سینیز؛ گئدین یالانچیلارا رأی وئرین!
بؤلوم: حیكایه و گولمه‌جه‌لر
+0 به‌ین
قلئیچی مورتوض هلی گؤپتره مینسه!
دوکتور جئری
بئش-آلتی گون بوندان قاباق، یولداشلارلا تئیمور آغانین قهوه‌خاناسیندا ایرانین آمریکایا نئجه ضربه ووراجاغی قونوسوندا دانیشماقدا ایدیک. بیردن گؤردوم، اوزاقدان قلئیچی مورتوض گلیر. سؤز-صؤحبتین آخیمینی دگیشدیرمک اوچون یولداشلار دؤندوم:
- یولداشلار باخین کیم گلیر؟!.. ایسته‌ییرسیز قلئیچی مورتوضو هلی گؤپتره میندیریم؟!
گولوشدولر. قلئیچی مورتوض ایچری گیردی. اؤپوشوب-گؤروشدوکده بیله‌سینه دئدیم:
- مورتوض آغا! حلال‌زاده‌سن ها! ائله سنین حاقّیندا دانیشیردیق. لاپ سؤزون اوستونه چیخدین.
قلئیچی مورتوض بیر گؤزونو قییدی. سؤزومون آردینی توتدوم:
- بایاق اوستاد دفتری بوردا ایدی. تعریفله‌ییردی: سربازلیقدا قلئیچی مورتوض‌لا بیر جبهه‌ده ساواشیردیق [آردا بونو دئمه‌لی‌یم؛ قلئیچی مورتوض فتق یئلی اوزوندن هئچ سربازلیغا گئتمه‌ییب]. بیر گون بیزیم قورهان عراق‌لیلارین موحاصره‌سینه دوشدو. بیزی قورتارماق اوچون جبهه آرخاسیندان بیر هلی کوپتر گؤندردیلر. سربازلار هلی کوپتره دولوشوب خلبان قالخماق ایسته‌ینده غفیلدن بیله‌سینه گوللـه دگدی. فرمانده اوزونو سربازلارا توتوب دئدی، کیم هلی‌کوپتر سورمک باشاریر. کیمسه‌دن سس چیخمادی. بیردن فرماندهین گؤزو قلئیچی مورتوضا ساتاشدی. گئدیب الینی اونون چیگینه قویوب دئدی، اوغلوم قلئیچی بو ایش تکجه سنین ایشیندیر....
بورایا یئتیشینده، سؤزومو کسیب دریندن بیر نفس آلدیقدان سونرا آرتیردیم:
- تأسوفله بورادا اوستاد دفتری‌یه زنگ ووردولار، گئتدی. سؤز یاریمچیق قالدی، بیلمه‌دیک بو دستانین سونو نه اولدو؟! نه یاخشی سن گلدین...
قلئیچی مورتوضون دیشلری آغاردی:
- هه او جریانی دئییرسیز.. یاخشی یادیمدادیر، یا ابولفض دئییب هلی کوپترین فرمانی‌نین دالیندا اوتوردوم. گازا باسدیم؛ هلی کوپتر بیر-ایکی یول بوللانسادا گؤیه قالخدی. ایرانا طرف گئتمکدنسه هلی کوپتری عراقا ساری سوردوم. فرمانده دئدی، اوغلوم ایران بو یاندادیر سن نییه اویانا گئدیرسن. دئدیم، جناب سروان ایجازه وئرین بو بعثی‌لردن بیرآز اؤلدوروم. سونرا الیمی آفتوماتین تتیگینه قویوب دوشمن سربازلارینی خزل کیمی یئره تؤکمگه باشلادیم. فرمانده گئنه دئدی، اوغلوم داها بسدیر قاییت گئده‌ک بنزینیزمیز قورتولار، قالاریق. دئدیم، جناب سروان ایجازه وئر هلی کوپتری سوورم باغدادا ساری....
کئفلی ایسکندر یانیمی باسیب یاواشجا دئدی:
- اوهووو... ایشه قالدیق! ایندی بونو کیم هلی گؤپتردن آشاغی یئندیره‌جک؟!
بؤلوم: حیكایه و گولمه‌جه‌لر
+0 به‌ین
بیز نییه آمریکادان قورخموروق؟
دوکتور جئری
اوستاد دفتری دئییردی:
جوغا زنبیل زیگوراتی حاقیندا تاریخی
آراشدیرمالاریمی بوتونله‌مک اوچون خوزستانا گئتمیشدیم. شوش شهرینده بیر ماشین
کرایه‌له‌دیم. ماشینین صاحابی جاسم آدلی بوغو بورما، قاش‌قاباقلی و هئیکل‌لی بیر
عرب ایدی. یولون اورتالاریندا بیردن جاسم اگری-اگری منه باخاراق سوروشدو:
- قورخمورسان تک باشینا منیمله بو چؤلون
اورتاسینا گلمیسن؟!
دوداقلاریمی بوزه‌رک دئدیم:
- یووو.. قورخمورام!
جاسم قاشلارینی چاتدی:
- نییه قورخمورسان؟!
گولومسه‌یرک آچیقلادیم:
- آخی سنین نییندن قورخوم!.. اوچ حالدان قیراق
دئییل: یا پول‌لاریمی الیمدن آلاجاقسان یا باشیما پیس ایش گتیره‌جکسن یا دا
اؤلدوره‌جکسن. بیرینجی حالدا، بونو بیل منیم او قدر ده پولوم یوخدور. ایکینجی
حالدا، دؤولت بیزیم باشیمیزا او قدر اویونلار گتیریب سنین پیس ایش گتیرمه‌ن
اونلارین یانیندا هئچ ساییلیر. اوچونجو حالا گلدیکده، من فیکر ائله‌ییرم اؤلموشم خبریم یوخدور چونکو نئچه واختدیر نظریمه
گلیر آلتدان نفس آلیرام!
جاسم قاققاناق چکیب گولدو. آرتیق چوغا زنبیله یئتیشمیشدیک.
بیر-ایکی ساعات گزدیکدن سونرا تکرار شوشا قاییتدیق. نه قدر ائله‌دیم جاسم مندن
کرایه آلمادی کی آلمادی...
بؤلوم: حیكایه و گولمه‌جه‌لر
+0 به‌ین
چیلله‌نین پیسلیگی
بوتون گؤزل‌لیکلره یاناشی بو ایلکی چیلله‌نین بؤیوک بیر پیسلیگی ده واردیر:
میانه و سراب‌داکی زلزله‌زده وطنداشلاریمیز ایکی- اوچ دقیقه آرتیقراق گئجه‌نین شاختا -سویوغونو چادیرلاردا چکه‌جکلر!
بؤلوم: آجی گولوش‌لر