دوکتور جئری
ساتاشما ادبیاتی
گؤروش‌لر : 0
تاريخ : شنبه 31 فروردین 1398 | یازار : دوکتور جئری
+0 به‌ین

ایشله‌سم ده، ایشله‌مه‌سم ده

دوکتور جئری

بیزیم بو اوستاد دفتری‌نین کیچیک اوغلو چوخ چالیشقان بیر اوشاق‌دیر. یوکسک تحصیلاتینی بیتیریب ایش تاپا بیلمه‌ینده، چوخلاری‌نین ترسینه، مدرکینی بیر قیراغا قویوب بنّا یانیندا کرپیچ آتماغا باشلامیشدی. تیکینتی ایشی اولمایاندا ایسه خیابان قیراغیندا جوراب ساتیردی. دئمک اولار ایندی‌یه‌دک من اونو بوش-بئکار گؤرمه‌میشدیم. آنجاق بایرامدان بو یانا، او هر گون قزئته قولتوغوندا تئیمورآغانین قهوه‌خاناسینا گلیب بولماجا چؤزمکله واختینی سورتور! دونن بیله‌سینه یاناشیب اویان-بویاندان دانیشاندان سونرا ایش-گوجوندن سوروشدوم.

-‌ ایشله‌میرم!- دئدی.

اوزونتو ایله باشیمی توولایا-توولایا:

-‌ بوگونلر ایش تاپماق چتیندیر هر حالدا!- دئدیم.

گولومسوندو:

-‌ ایش اولسادا، اولماسادا من ایشله‌میرم!

شاشیردیم، چالیشمادیغی‌نین ندنی سوروشدوقدا دریندن بیر سولوق آلیب دئدی:

-‌ بیلدیگین کیمی قاباقجالاری بنا یانیندا ایشله‌ییردیم. بیلدیر آتام اللریمین قابارینا دؤزمه‌ییب اویان-بویاندان بئش میلیون تومن جورله‌دی، بیر ایش یولا سالیم. یولداشلاریم دئدیلر، قیزیل سیکّه آل. بئش میلیون‌لا اوچ دنه سیکّه آلماق اولاردی.من اونلارین سؤزلرینه قولاق آسماییب بیر جوراب توخوما دزگاهی آلیب گئجه-گوندوز ایشله‌مکله بئش میلیونلوق سرمایه‌می اون بئش میلیون ائله‌دیم..

دانیشیغینی کسیب آلقیشلاماغا باشلادیم:

-‌ ساغ اول واللاهی!!..نه دئمیشم بئله ایشه...

اوستادین اوغلو گولدو:

-‌ دوزدور من بئش میلیونو بیر ایلده اون بئش میلیون ائله‌میشدیم آنجاق بو ایل، اون بئش میلیون‌لا گئنه تکجه اوچ دنه سیکّه وئریردیلر! یعنی، منیم بیر ایللیک تاقا-تاققیم هاوایا گئتمیشدی! بو اوزدن فیکیرلشدیم؛ مادامکی ایشله‌سم‌ ده، ایشله‌مه‌سم ده سرمایه‌م اوچ دنه سیکه‌دیر، اون بئش میلیونو وئریب اوچ دنه سیکه‌ آلدیم!



آچار سؤزلر : ایشسیزلیک, ایقتیصاد, ایش, پول,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 23 فروردین 1398 | یازار : دوکتور جئری
+0 به‌ین

بیرآز دا اوغرولارین فیکرینده اولون!

دوکتور جئری

کاتتا ایسلامین اوغلو، باغلاری ائششگین بئلینه چاتیب گئتمک ایسته‌ینده، حاجی محمدعلی آغا برزگر توزاناق سالاراق اؤزونو یونجالیغا یئتیردی. موتوردان آشاغی ائندی. دیشی باغیرساغینی کسیردی. بیر هفته ایدی، قان تر ایچینده تک باشینا یونجانی بیچیب، تاغالاییب، بوکموشدو. آنجاق باغلارین  قوروماسینی گؤزله‌یندن ، کیمسه گونده-گونده گلیب یونجالاری اوغورلاییردی. نئچه گون پوسقودا یاتدیغی ایشه یاراماسا دا، ایندی‌ آلدیغی بیر راپورت ایله اوغرونو سوچ اوسته یاخالامیشدی.

حاجی محمدعلی یومروغونو سیخاراق دیشی‌نین دبیندن چیخانی دئمک ایسته‌ینده، کاتتا ایسلامین اوغلو تئز اونو قاباقلادی:

-‌ حاجی محمدعلی آغا اوتانمیرسان؛  نییه به باغلاری کیچیک سالمیسان؟!



آچار سؤزلر : کئفلی ایسکندر, ایقتیصاد, ایختیلاس, اوغورلوق,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 16 فروردین 1398 | یازار : دوکتور جئری
+0 به‌ین

جهنّم گولمک یئری دیر!

دوکتور جئری

کئفلی ایسکندر ایله جنّت‌ده گزمکده ایدیک. بیردن قلئیچی مورتوض یادیما دوشدو. اوزونتو ایله دئدیم:

-‌ ایسکندر بگ گؤردون قلئیچی مورتوض اؤز الی‌له اؤزونو نه گونه سالدی. نه قدر بیله‌سینه دئدیک، دیوارین چاتیندان قونشونون آروادینا باخما، جومعه آخشاملاری مچیدده چاخیر ایچمه، دستمازسیز جاماعات نامازی قیلما، محرمکلیکده خالقدان ییغدیغین پوللاری سیم-سانجاق‌لا کوله ائله‌مه، آیاق اوسته ایشه‌مه، بی‌بی‌سی رادیوسونا قولاق آسما، دونیا مالیندان برک یاپیشما، روشوت وئرمه، آغازاده‌لرین یولونو گئتمه، دده‌لیگین جیبیندن پول اوغورلاما...

سونرا دریندن بیر سولوق آلاراق آرتیردیم:

-‌ قلئیچی مورتوض بیزیم کیمی شیخ آغانین سؤزلریندن چیخماسایدی، ایندی بورادا  بیزیم‌له کئفه باخیب جهنّمه گئتمزدی!

بو سؤزلریمدن کئفلی ایسکندر کؤورلدی:

-‌ دئییرم، بیزده قلئیچی اوچون یاخشی یولداش اولمادیق ها! بورایا گلندن بیرجه دؤنه بئله اولسون گئدیب اونون حالینی سوروشمامیشیق!

دانیشیق بو یئره چکینجه واختی ایتیرمه‌دن جنّتین ملک‌لریندن ایذین آلیب جهنّمه یوللاندیق. جهنّمده قورخونج بیر صحنه ایله قارشی قارشی‌یا گلدیک. قلئیچی مورتوضو خیرتدگه‌جن قوما قویلامیشدیلار. آنجاق بونونله بئله او، آرا وئرمه‌دن  قاققاناق چکه‌رک گولمکده ایدی!

شاشقین-شاشقین سوروشدوق:

-‌ جهنّمین اورتاسیندا، بؤیوک عذابین ایچینده اورکدن گولورسن‌می؟!!

قلئیچی مورتوض زولوقلا گولمه‌یینی ساخلادی:

-‌ شیخ آغا، آلتدان آیاغیمی قیدیقلاییر!

 



آچار سؤزلر : قلئیچی مورتوض, کئفلی ایسکندر,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 10 فروردین 1398 | یازار : دوکتور جئری
+0 به‌ین

آللاه شیخ آغانی بیزه چوخ گؤرمه‌سین!

دوکتور جئری

شیدیرغی یاغیشلارین اوزوندن، بئش-آلتی گون ایدی ائوین دامی بتر دامجیلاییردی. نئچه-نئچه ایزوگامچی گتیرسم ده هامیسی دامین یئنیدن ایزوگام ائدیلمه‌سینی اؤنرمیشدی.  قیمتلری سوروشدوقدا ایسه آیاقلاریم یئره یاپیشمیشدی. یئنی ایلده من او قدر پولو هارادان جورله‌یه بیلردیم؟! الیم هر یئردن اوزولموشکن بیردن قلئیچی مورتوض یادیما دوشدو. قلئیچی مورتوض اینگیلیس آچاری‌دیر! الیندن گلمه‌ین ایش یوخدور. اؤز-اؤزومه دئدیم، یاخشیسی بودوراونو تاپیب گتیریم دامین، دلیک-دئشیگینی  اوچ-دؤرد متر ایزوگاملا یاماقلاسین. سالیغینی توتدوم. دئدیلر؛ نئچه واختدیر، دده‌لیگی شیخ‌ آغانین دفترینده چالیشماقدادیر. تلسیک اؤزومو ایش یئرینه یئتیردیم. باشی برک قالابالیق ایدی. بؤیوک بیر میزین آرخاسیندا اگلشمیشدی. مراجیعه ائله‌ینلری بیر-بیر شیخ آغانین اوتاغینا گؤندیر، ائشیگه چیخانلارین دا حئساب-کیتابلارینا یئتیشیردی.

منی گؤرجک سئوینیب یانیندا اوتورتدوردو. الینده بیتگ بیر کیشی شیخ آغانین اوتاغیندان ائشیگه چیخدی. قلییچی  سیرادا گؤزله‌ینلرین بیرینه ایشاره ائدره‌ک ایچرییه اؤتوردو. ائشیگه چیخان کیشی‌نین الینده‌کی بیتگینی آلیب گؤزدن گئچیره‌رک دئدی:

-‌ سنین بیر سئل قاباغی کسمه‌ن وار، بیر دولو آغزی باغلامان، بیرده شاختا-چووغون سوومان..

سونرا شاققاشاقلا چؤرتکه‌‌یه سالیب آرتیردی:

-‌ ائله‌دی، بیر میلیون دؤرد یوز اللی بئش مین تومن!

کیشی جیبیندن پول کارتینی چیخاردیب  قلئیچی مورتوضا اوزاتدی.

کیشی گئتدیکده، قلئیچی مورتوض سورغولو باخیشلاریمی گؤرونجه اؤزو آچیقلادی:

-  طبیعی فلاکت‌لرین قارشیسینی آلماق اوچون دؤولت ایله شیخ آغا بیر آنلاشما ایمضالاییب. بو آنلاشمایا گؤره شیخ آغا طبیعی فلاکت‌لرین آزالماسی اوچون معنویتین رولوندان یارارلانمالیدیر. بو آنلاشما ایمضالاناندان، شیخ آغا بوتون ایشلرینی بیر قیراغا بوراخاراق  بو ساحه‌ده چالیشماقدادیر.

قلئیچی مورتوضون آچیقلاماسی بیتینجه، باشیما گلنلری آنلادیب سوروشدوم:

-‌ شیخ آغا بیزیم ائوین دامجیلاماسی اوچون بیر ایش گؤره بیلر؟!

قلئیچی اؤفکه‌ ایله یئریندن قالخاراق، "نییه گؤره بیلمز؟!" دئییب شیخ آغانین اوتاغینا گئچدی. بیرآزدان الینده بیر بیتگ ائشیگه چیخدی. 

-‌ آلا.. ایشده مین ایزوگاما دگر!

سئوینجک الیمی اوزاتدیم:

-‌ دوغرودان کسرلی‌دیر؟!!

قلئیچی گولدو:

-‌ کسرلی‌دیر.. تکی یاز چیخینجا، بیر آنلیق بئله اولسون معنویاتی یاددان چیخارتمایاسان!

بیتگی آلیب اؤپه‌رک جیبیمه قویدوقدا، اللریمی گؤیه قوزاییب دئدیم:

-‌ آللاه شیخ آغانی بیزه چوخ گؤرمه‌سین او اولماسایدی بیز نئیله‌یه‌جک ایدیک؟!




اتک یازی:

آفتاب‌‌نیوز :آفتاب: معاون وزیر کشور و رئیس سازمان مدیریت بحران کشور، از امضای تفاهمنامه با حوزه علمیه برای کاهش بلایای طبیعی خبر داد و خاطرنشان کرد: در مرحله اول با حوزه‌های علمیه قم، مشهد، اصفهان و شیراز تفاهمنامه همکاری امضا کردیم تا از حوزه‌های علمیه برای به کارگیری نقش معنویت در کاهش بلایای طبیعی استفاده شود. 




آچار سؤزلر : قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 2 فروردین 1398 | یازار : دوکتور جئری
+0 به‌ین

آللاه ائله‌مه‌سین!

دوکتور جئری

ایل دَییشینجه، قلئیچی مورتوض تاکسی تیلفون‌لا تئز اؤزونو دده‌لیگی- شیخ آغانین ائوینه چاتدیردی. هر ایلده‌کی کیمی ایکی قات اَییلیب شیخ آغا‌نین الینی مارچا-مارچ‌لا اؤپه‌‌رک یئنی ایلینی قوتلادی. بایرام سوفره‌سی‌نین قیراغیندا اَیله‌شیب دادلی باسلیقلاری یاواش-یاواش اَریتمگه باشلایاندا، شیخ آغا اؤلکه‌نین آغیر ایقتیصادی دوروموندان دانیشماقدا ایدی. سؤزلر سونا یئتیشینجه، شیخ آغا الینی اوزادیب سفره‌نین اورتاسیندان کیتابی گؤتوردو. قلئیچی مورتوضون اورگی دؤیونمگه باشلادی. ایندی، شیخ آغا هر ایل اولدوغو کیمی، شاخ بیر اللی مین‌لیک چیخاردیب بیله‌سینه وئره‌جکدی. آنجاق شیخ آغا بو کز کیتابی آچیب آراسیندان گؤی بیر ایکی مین‌لیک چیخاردیب قلئیچی مورتوضا اوزادراق:

-‌ آللاه ایشینه رونق وئرسین- ‌دئیه خئییر دوعا ائله‌دی.

باسلیق قلئیچی مورتوضون بوغازینا تیخیلان کیمی اولدو. گؤزلری دولدو. بلکه ده تاکسی تیلفونا وئردیگی بئش مین تومن یادینا دوشموشدو. تیتره‌ک سسله دئدی:

-‌ آللاه ائله مه‌سین آغا!.. آللاه ائله‌مه‌سین!

بو یانیتدان شیخ آغا شاشیردی:

-‌ اوغلوم!.. آداما خئییر دوعا ائله‌ینده، دئییر: آمین. آللاه ائله‌مه‌سین نه دئمکدیر؟!!

قلئیچی مورتوض باشینی آشاغی سالدی:

-‌ آغا ائله بیل ائشیتمه‌میشسن؛ نئچه گوندور کندیمیزین اؤلو یویانی آللاهین رحمتینه گئدیب من اونون وظیفه‌سینده چالیشیرام!



آچار سؤزلر : بایراملیق, بایرام, ایقتیصاد, قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 25 اسفند 1397 | یازار : دوکتور جئری
+0 به‌ین

 

قورخمایین، هامیمیزین یئری جنّت‌دیر!

دوکتور جئری

قیامت گونو ایدی. میزان-تره‌زی قورولوب عمل‌لر دارتیلماقدا ایدی.‌ اینسانلار صفده چوخ گؤزله‌مه‌سینلر دئیه، اوچ-اوچ حئساب-کیتاب ملگی‌‌نین قارشیسیندا چیخیردیلار. سیرا بیزه یئتیشدی. ملک تره‌زی‌یه تکان وئردی. پیس عمل‌لریمیز آغیرلیق باسینجا، گؤزونون قیراغی ایله ایکی مأمورا ایشاره ائله‌دی:

-‌ جهنّم‌لیک‌دیرلر، آپارین!

بو حؤکمدن قلئیچی مورتوضون رنگی قاچدی، کئفلی ایسکندرین دیزلری تیتره‌دی، منیم هوشوم باشیمدان چیخدی!

گؤزومو آچدیقدا گؤردوم؛ قلئیچی مورتوض اوزومه  سو چیله‌ییر. کئفلی ایسکندر ایسه چیلتیک چالاراق شن بیر ماهنی اوخویور. اویان-بویانا باخدیم. اؤزومو اولدوقجا گؤزل بیر یئرده گؤردوم. چاشقین-چاشقین سوروشدوم:

-‌ بیز هاراداییق؟!

-‌ جنّت‌ده‌ییک!.. سانیرام، مأمورلار ملگین سؤزونو ترسه ائشدیب بیزی جهنّم یئرینه جنّته گتیریبلر- دئیه قلئیچی مورتوض یانیت وئردی.

کئفلی ایسکندر ماهنی اوخوماغینی کسدی:

-‌ یوخ! ترسلیک اولماییب. منجه، ساتیراچی اولدوغوموزدان تانری دا بیزیمله ظارافات ائله‌مک ایسته‌میش!

یولداشلارین سؤزلری بئینیمه باتمادی. یئنه اویان-بویانا باخدیم. بیردن گؤزوم او یاخینلاردا گزن بیر گؤزتچی‌یه دوشدو. چاغیردیم:

-‌ آی قارداش!..آی قارداش!.. بورا جنّت‌دیرمی؟

گؤزتچی بیزه یاخینلاشدی:

-‌ سیز ده ایرانلی‌سینیزمی؟!

اوچوموز بیرگه سسلندیک:

-‌ هه! سیز هارادان بیلدینیز؟!

گؤزتچی گولومسوندو:

-‌ بورا جهنّم‌دیر آنجاق بیلمیرم نییه هر یئنی گلن ایرانلی بورانی جنّت سانیر؟!



آچار سؤزلر : قلئیچی مورتوض, کئفلی ایسکندر, ایران,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 17 اسفند 1397 | یازار : دوکتور جئری
+0 به‌ین


قوتور ایت

دوکتور جئری

نئچه واخت ایدی اؤرت باسدیر ماحالی‌نین باش کندی - ترس‌آوا بؤیوک بیر فلاکته اوغرامیشدی. هارادانسا بیر آزغین مئیمون  تاپیلیب کندین اکینه‌جکلرینی یئره سورتمگه باشلامیشدی.  اهالی‌نین فیکرینجه، دوشمنلر اؤرت باسدیر ماحالی‌نین ایقتیصادیاتینی کورلاماق اوچون بو مئیمونو ترس آوایا آزدیرمیشدیلار. بو فلاکته قارشی ترس‌آوا باشچیلاری‌نین تدبیرلری ایشه یارامایینجا، کاتتا ایسلام چاره‌سیز قالاراق شیخ آغانین حوضورونا چاتیب گؤستریش ایسته‌دی. شیخ آغا قاشلارینی چاتاراق درین بیر دوشونجه‌یه دالدی. بیردن قاش-قاباغی آچیلدی:

-‌ گئدین قلئیچی مورتوضون یانینا. بو یولسوزون عؤهده‌سیندن تکجه او گله‌ بیلر!

یاریم ساعات سونرا، کاتتا ایسلام‌لا نئچه آغ ساققال قلئیچی مورتوضون قاپیسیندا دایانمیشدی. هاندان-گئجدن یاراقلانمیش قلئیچی مورتوض ائودن ائشیگه چیخدی. چیگنینده بیر توفنگ، یانیندا ایسه هئیوه‌ره بیر قوتور ایت وار ایدی. برابرجه اووون سوراغینا گئتدیلر. مئیمون گوندوزلری کندین قیراغیندا اولان هوندور چینار آغاجی‌نین باشیندا گیزله‌نیردی. آغاجین دبینه یئتیشنده، قلئیچی مورتوض توفنگی کاتتا ایسلاما وئره‌رک دئدی:

-‌ من آغاجا چیخیب مئیمونونو یئره آتاجاغام. ایت، مئیمونو زورلا-زورلایا اؤلدوره‌جکدیر!

کاتتا ایسلام شاشیردی:

-‌ بئله ایسه توفنگ نه‌یه گره‌ک دیر؟!

قلئیچی مورتوض میزیلدادی:

-‌ آللاه ائله‌مه‌میش، مئیمون منی آشاغی آتسا، سیز ایتی ووراسیز!



آچار سؤزلر : قلئیچی مورتوض, ایقتیصاد,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 11 اسفند 1397 | یازار : دوکتور جئری
+0 به‌ین

کوپی برابر اصل

خوجالی فاجیعه‌سی‌نین 27.نجی ایل دؤنومونده،ائرمنیستانین باش ناظیری نیکول پاشینیان  ایراندا، رسمی سفرده اولوب. ایران طرفی‌نین سؤزچوسو دانیشیقلار سیراسیندا،" ما با شما اشتراکات فراوانی داریم! " دئینده، ائرمنی طرفی گولومسه‌یه‌رک دئییب:

-‌ شکسته نفسی نفرمایید، شما عین ما هستید!

*

وئریلن خبره گؤره گؤروشلرین سونوندا، ائرمنیستانین باش ناظیری درین تشکورلرینی بیلدیرمک اوچون تاریخی آغدام جامع مسجدی‌نین شکیل‌لرینی ایران طرفینه هدیه وئریب:



آچار سؤزلر : ائرمنی, سوی‌قیریم, فاشیزیم, ائرمنی, ایران, آذربایجان, شئونیزم,

    بؤلوم: آجی گولوش‌لر
گؤروش‌لر : 0
تاريخ : شنبه 4 اسفند 1397 | یازار : دوکتور جئری
+0 به‌ین


یاساق آرزولار

دوکتور جئری

اوستاد دفتری‌نین کیتاب ائوینده اوتورموشدوق. دانیشیقلار آراسیندا، دریندن بیر سولوق آلاراق دئدیم:

-‌ صاباح، اسفندین ایکیسی، دونیالیق آنادیلی گونودور. کئشگه بیر سالون اولایدی ییغیشاردیق بو گونو قوتلایاردیق.

بو آندا قاپی آچیلیب ایکی "آدی یوخ" برادر ایچری گیردی:

-‌ اؤلکه‌نین میللی گوونلیگی تهلوکه‌یه دوشمه‌سین دئیه سیزدن ایسته‌ییریک صاباح هر چئشید ییغینجاقدان چکینه‌سینیز!

اوستاد دفتری چاش-باش منیم اوزومه باخدی:

-‌ رحتملیک موللا نصرالدین دئمیشلی، آدی یوخ برادرلر بیزیم آرزولاریمیزین ایگینی* ده  آلیرلار!



* ایشاره‌دیر موللا نصرالدینین بو حئکایه‌سینه:

موللا ائوده اگلشمیشدی. اورگیندن گئچدی: بیر کاسا آش اولسایدی چوخ یاخشی اولاردی. بو آندا قاپی چالیندی. گئتدی گؤردو، قونشونون قیزی‌دیر. الینده‌کی کاسانین موللایا اوزاداراق دئییر: آنام خسته‌دیر، سیز آش پیشیرمیشسینیزسه بیر کاسا دا بیزه وئرین. موللا اؤز-اؤزونه دئدی: بیزیم قونشولار آرزولاریمیزین ایگین آلیرلار!




آچار سؤزلر : شئونیزم, دیل, آنادیلی,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 27 بهمن 1397 | یازار : دوکتور جئری
+0 به‌ین

اینقیلاب گولمه‌جه‌لری

دوکتور جئری

فرقی ندیر؟

اینقیلابین قیرخینجی ایل دؤنومونده، موخبیر گؤستریجیلرین آراسیندا قوجا بیر کیشی‌یه یاخینلاشیب سوروشدو:

-‌ حاجی عمی! سورشا بیله‌رم شاه زامانی ایله ایندی‌نین نه فرقی وار؟

قوجا الینده‌کی بایراغی یئله‌ده‌رک دئدی:

-‌ چوخ فرقی وار! شاه زامانی بیر عیدده، بیر عیدده‌نین وار-یوخو تالاییب قانلارینی شوشه‌یه‌ توتوردولار...

موخبیر قوجانین سؤزونو کسدی:

-‌ هه.. اینقیلابدان سونرا نه جور اولوب؟!

- ایندی تام ترسینه‌دیر!

***

کیشی‌نین باشی آغرییردی!

اینقیلابین ایل دؤنومو موناسیبتینه خسته‌خانالاردا خالقا پولسوز خیدمت وئرنده بیر کیشی دوکتورون یانینا گئدیر.

-‌ هاران ٱغریییر؟-‌دئیه دوکتور سوروشور.

کیشی بیر آز فیکبرله‌شیب دئییر:

-‌ دوکتور دوزونو ایسته‌سن بیلمیرم گؤزوم آغرییر یا قولاغیم!

دوکتور چاش-باش قالینجا کیشی آچیقلاییر:

-‌ قیرخ ایلدیر، مسئوللاردان ائشیتدیگیم باشقا، گؤردوگوم باشقا!

***

تلویزون ایله یخچال

ییرمی ایکی بهمن گؤستریسیندن قاییداندا اوستاد دفتری دئینمگه باشلادی:

-‌ تلویزیون گونده دؤولتین بازاردا، اوجوزلو ات داغیتدیغی خبرینی وئریر آنجاق آلتی آیدان چوخدور بیزیم یخچالدا اتدن خبر یوخدور!

اوزونتو ایله باشیمی توولادیم:

‌-‌ مگر سن یخچالی، تلویزیونون پریزینه تاخمامیسان؟!

***

کیم اینقیلاب ائله‌دی؟

تئیمور آغانین قهوه‌خاناسیندا یولداشلارلا چایلاشماقدایدیق. سؤز-صؤحبت باهالیغا چکیلدی.هامی اوی بیرلیگی ایله باشلادیلار حؤکومتی تنقید ائتمگه. آتماجایلا دئدیم:

- بو سؤزلر ندیر دئییرسیز، اینقیلاب ائله‌ین بوکیمی چتینلیکلره دوزمه‌لی‌دیر؟!

بو سؤز آغزیمدان چیخار-چیخاماز یولداشلار،" من اینقیلاب ائله‌مه‌میشم " دئیه باشلادیلار دارتیشماغا. سونوندا کاسا-کوزه‌نی اوستاد دفتری‌نین باشیندا سیندیریب دئدیلر:

-‌ بو اینقیلاب ائله‌ییب!

اوستاد دفتری نسه دئمه‌ییب باشینی آشاغی سالینجا قولاغینا پیچیلدادیم:

-‌ اوستاد دوغرو دئییرلر؟

اوستاد دفتری باشینی توولادی:

-‌ ‌یوخ بابا!.. منیم دیواریم آلچاق‌دیر. ائوده ده هر کیم اوسدورسا، آتار منیم بوینوما!



آچار سؤزلر : اینقیلاب, دؤولت, مسئوللار, باهالیق, ایران,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 19 بهمن 1397 | یازار : دوکتور جئری
+0 به‌ین

حاجی لئ‌لگین آرتیق بالاسی

دوکتور جئری

قاپی زیپ-زیپ دؤیولوردو. گئچن قیرخ  ایلده قاپیمیز بئله برک دؤیولمه‌میشدی. اؤز-اؤزومه دئدیم،"سن اؤلمه بو یا میللی-مدنی حاق-حوقوقلارمیزدیر گتیریبلر قاپی آغزیندان وئره‌لر یا نفت پولودور!". آیاق یالین ائشیگه قاچدیم. تلم-تله‌سیک قاپینی آچدیقدا، قونشوموز مشه خوجاوئردی ایله بورون-بورونا گلدیم. اوخو داشا دگمیشلر کیمی سوروشدوم:

-‌‌ خئیر اولا مشدی، نه خبردیر؟!

الینده‌کی کاغیذی منه اوزاداراق دئدی:

-‌ دوختور! زحمت اولماسا آلا بو کاغیذی، منیم دیلیمدن حؤکومته بیر عریضه یاز!

بوش کاغیذی آلاراق دئدیم:

-‌ قاپی آغزیندا پیسدیر، هله بویور ایچرییه گؤروم نه دئییرسن؟..

ایچرییه گئچر-گئچمز دردی دئشیلدی:

-‌ دوختور اؤزون یاخشی بیلرسن، من گون‌موزد فهله‌یم. سحر تئزدن مئیدانا گئدیرم، بیر گون ایش اولور بئش گون اولمور. بیمه‌میز ده یوخدور. بللی دئییل باشیمیزا بیر قضا-قدر گلسه نئجه اولاجاغیق.هله بونلار بیر یاندا قالسین. بیز ائله بو آز ایله گئچینمکده‌ ایدیک حؤکومت باشلادی اوچ میلیوندان آشاغی گلیری اولانلارا "سبد کالا" وئرمگه. بو "سبد کالا" اود اولدو دوشدو بیزیم ائوه. بئش – اون گون گؤزله‌دیک بیزه ده سبد وئره‌لر، خبر اولمادی. بیر آی گؤزله‌دیک خبر اولمادی. ائوه گلنده آرواد باشلاییردی دئیینمگه؛ فیلان قونشون اوچ میلیون آیلیغی وار سبد کالا آلدی، بئهمان قونشونون دونقوزو اسکیک‌دیر سبد کالا آلدی؛ بیزه نییه وئرمیرلر؟ سونرا کاسا-کوزه نی منیم باشیمدا سیندیرماغا باشلادی. سنین عورضه‌ن یوخدور حاققینی آلماغا. "سهام عدالت" وئرنده ده هامی آلدی سن دالییا قالدین حاققیمیز یاندی؟..

 ایندی دوختور سندن خواهیش ائدیرم منیم دیلیمدن حؤکومته بیر عریضه یازیب حاققیمی دیریلده‌سن!!

بیرآز دوشونجه‌یه دالدیقدان سونرا ایسته‌دیم دئییم، "‌مشدی! سنینکی نه "تامین اجتماعی" بیمه‌ن وار، نه "کمیته امداد" دا " اداره بهزیستی" ده آدین وار، نه...." دئمه‌دیم؛  دئدیم:

-‌ مشدی! عریضه یازماغا گره‌ک یوخ، "سبد کالا" سنی توتمور!

مشدی خوجاوئردی شاشیردی:

‌‌-‌ آخی نییه! مگر بیز ایرانلی دئییلیک، منیمکی آیلیق گلیریم یئددی-سککیز مین تومندن ده آزدیر!!

باشیمی آشاغی سالاراق دئدیم:

-‌ آخی سیز حاجی لئ‌لگین آرتیق بالاسی‌سیز!



آچار سؤزلر : حاق, حوقوق, ایش, عدالت,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 12 بهمن 1397 | یازار : دوکتور جئری
+0 به‌ین

قره 

دوکتور جئری

قلئیچی مورتوض مینی‌بوسدان ائندی.  اویان-بویانا باخدی. کندلری- ترس‌آوا ایگنه اوجو قدر دَییشمه‌میشدی. بوخچاسینی قولتوغونا ووروب ائولرینه ساری یؤنلدی. قالاقلاری آرخادا قویوب باسمانلیغی گئچنده ائولری گؤرنمگه باشلادی. دده‌لیگی شیخ‌آغا، قاپی‌‌‌ آغزیندا، سککی‌نین اوستونده اوتورموشدو. یاخینلاشیب ایکی قات أییله‌رک سایغیلا سالام وئردی. شیخ آغا باشینی قووزاییب دیل اوجو نسه فیسیلدادی. قلئیچی مورتوض چاش-باش اولدو:

-‌ دده منم قلئیچی مورتوض، تانیمادین؟!!

شیخ آغا آلتدان-اوسته قلئیچی مورتوضو سوزدو. تانیمامیشدی سانکی. قاشلارینی چاتدی:

-‌ قلئیچی مورتوض؟!!

قلئیچی مورتوض جوشغو ایله اؤزونو تانیتدیرماغا چالیشدی:

-‌ هه! قلئیچی مورتوضام.. سنین اوغوللوغون! یادیندادیر، سککیز ایل بوندان قاباق منه پول وئردین گئدیب شهردن سنه قره آلیم؟.. شهرده، ایستمه‌دن اؤزومو بؤیوک بیر قالابالیغین ایچینده گؤردوم. خالق اورمو گؤلونون قوروماسینا گؤره اعتراض ائتمکده ایدی. بیردن الی دگنکلی گزمه‌لر تؤکولوشوب خالقی ووروب یاخالاماغا باشلادیلار. منی ده توتدولار. محکمه‌ده منه سککیز ایل زیندان کسدیلر. بوگون زیندانیم قورتولدو...

شیخ آغانین چاتیق قاشلارینی آچیلدی. آیاغا قالخدی. الینی قلئیچی مورتوضا اوزاداراق دئدی:

-‌ قره هانی؟



آچار سؤزلر : اورمو گؤلو, دوستاق, قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 5 بهمن 1397 | یازار : دوکتور جئری
+0 به‌ین

داناباش کندینده شفّافلیق

دوکتور جئری

اوزون سوره ایدی، اوستاد دفتری،"بیز هاچانادک یوخسوللوق ایچینده یاشامالی‌ییق؟ گل بیز ده خزینه آختاراق!" دئیه قیلیغیما گیرمیشدی. سؤزلرینه گوله‌رک:" اوستاد سنکی تاریخ اوخوموسان! آخی سن نییه بو سؤزلردن دانیشیرسان؟ هانسی خزینه؟ بو شایعه‌لری میللتیمیزین آراسیندا یاییرلار، بیز اؤز اللریمیزله تاریخی یئرلریمیزی سؤکوب داغیداق، ایندییه‌دک کیم خزینه تاپیب، کیم زنگین اولوب؟"دئییردیمسه قولاغینا باتان دئییلدی؛ ترسینه اونون قولاغیما اوخومالاری یاواش-یاواش ائتکی بوراخماقدا ایدی.

بیر گون سوروشدوم:

- هله دئ گؤرک سنین بو آرادیغین خزینه‌ هارادا گؤمولوب؟

 اوستاد دفتری راحات بیر سولوق آلدی:

-‌  خزینه سیزین داناباش کندینده گؤمولودور.

من داناباش کندینده دوغولسامدا، اوزون ایللر ایدی شهرده یاشاییردیم. آیامدا-سایامدا داناباش کندینده گئتسمه‌ ده، ایندییه‌دک بو قونودا کندلیلردن نسه ائشیتمه‌میشدیم. ماراقلا سوروشدوم:

- هله سنین بو خزینه‌ن داناباشین هاراسیندا گؤمولودور؟ خریطه‌ن وار؟.. بیر شئی ائشیتمیسن؟

اوستاد دفتری آرخایینجا دئدی:

-‌ ایمامزادا بعقوب‌دا.

-‌ ایمامزادا یعقوب‌دا؟!!

اوستاد دفتری باشی ایله دوغرولادی:

-‌ آراشدیردیقلاریما گؤره بو ایمامزادا قاچا قوشولوق ایللریندن اورتایا چیخیب. نظره گلیر بیرینجی دونیا ساواشی سیراسیندا جیلولار، موسلمانلاردان تالادیقلاری قیزیلاری، سونرا گلیب چیخارتسینلار دئیه بو ایمامزادا گیزلتمیشلر.

قاققاناق چکیب گولدوم:

-‌ سن ده ایسته‌ییرسن، بئل-کولونگ گؤتوروب، گئدک داناباشلیلارین گؤزونون قاباغیندا قبیری سؤکوب قیزیلاری چیخارداق؟! اولان بیلیرسن داناباشلیلار  آدامین باشینا نه ایش گتیررلر؟!

اوستاد دفتری دوداقلارینی بوزوشدوره‌رک:

-‌ داناباشلیلارین گؤزونون قاباغیندا خزینه‌نی چیخارتمایاغیق کی، گئجه چیخارداجاغیق!- دئیه آرتیردی:

- مشه فیروزی تانیییرسان ؟

مشه فیروز منیم چوخ اوزاق قوهوملاریمدان ایدی. اوستاد دفتری آچیقلادی:

-‌ مشه فیروز ایمامزادانین میجوری‌(خادیمی)دیر. مشه فیروزون بئینی‌نین اوستونه ایشله‌مک سنین ایشیندیر. اونو قاندیرسان گئجه گئدیب قبیری سؤکوب قیزیللاری چیخارداریق!

***

 مشه فیروز اؤنجه بو ایشه راضی اولموردو. بیزی آللاهین عذابیندان، آغزیمیزین اگیلمه‌سیندن، یئر گؤیون بیربیرینه قووشاجاغیندان قورخودوردو، آنجاق سوندا خزینه‌ اونو دا اووسونلادی.

 اوچ گون سونرا گئجه یاریسی، داناباش کندی‌نین قیراغیندا گؤزله‌مکده ایدیک. گؤزلریمیزی قارانلیغا زیلله‌میشدیک. هاندان-گئجدن اوزاقدان بیری ال چیراغی ایله علامت وئردی. ماشینلا علامت وئرن یئره یاخینلاشدیق. مشه فیروز ایدی. اوزونو مندیل ایله باغلامیشدی. تکجه گؤزلری گؤرونوردو.

-‌ ماشینی کنده گتیرمه‌یین!

ماشیندان دوشوب کنده ساری یورودوک. کندین گیریشینده بیردن سؤیولرین دالیندان ایکی الی دگنکلی قارالتی قاباغیمیزا چیخدی. قورخا-قورخا فیروزدان سوروشدوم:

-‌ بونلار کیمدیلر؟!

- قورخمایین، بونلار منیم قارداشلاریمدیرلار.

-‌ بونلارا نییه دئمیسن؟

مشه فیروز اؤفکه‌لندی:

-‌ من هئچ نه‌یی قارداشلاریمدان گیزلتمه‌رم!

اوستاد دفتری‌نین اوزونه باخدیم. بیر شئی دئمه‌دی. یولوموزون آردینی توتدوق. کندین أیری-بوروق کوچه‌لری‌نین بیرینده، قالاقلارین دیبینده بئش-آلتی کیشی بوسموشدو. هوروت-هوروت مشه فیروز اوزونه باخدیق.

-‌ نیگران اولمایین عمی اوغلولاریم‌لا بی‌بی اوغلولاریم‌دیر! گؤزتچی قویموشام مأمور زات گؤرسه‌لر بیزه خبر وئرسینلر.

ایمامزادایا یئتیشدیک. ایشیق ائشیگه چیخماسین دئیه پنجره‌لرینی پتو ایله اؤرتموشدولر. ایمامزادانین قاپیسیندا بیری گؤزله‌مکده ایدی. بیز سوروشمادان مشه فیروز اؤزو تانیشلیق وئردی. کوره‌کنلری ایدی. یئنه اوستاد دفتری‌نین اوزونه باخدیم. تومموشدو. کورکن ایمامزادانین قاپیسینی آچیب بیزی ایچرییه بویور ائتدی. ایچرییه آیاق باسدیقدا، ائله بیل بیز قازان ایستی سو باشیمیزا تؤکدولر. ایمامزادادا یئتمیش-سکسن آغساققال کیشی اوتورموشدو. بیزی گؤرجک آیاغا قالخیب خوش گلدین دئدیلر. چاش-باش یاواشجا مشه فیروزدان سوروشدوم:

-‌ بونلار بورادا نه قاییریرلار؟!

مشه فیروز فیسیلدادی:

-‌ هر نه اولسا داناباشلیلارین هامیسی‌نین بو خزینه‌ده حاققی وار. بیز ائله‌یه بیلمه‌ریک قیزیللارین بوتونونو اؤزوموزه گؤتورک؟!

مشه فیروزون گؤستریشی ایله ضریحه یاخینلاشدیق. قبیر اوزون سوو، بوتؤو بیر قارا داش ایدی. اوستاد دفتری‌نین اوزونه باخدیم. رنگ-روفو قاچمیشدی. دوداقلاری تیر-تیر تیتره‌ییردی. یاواشجا قولاغیندا پیچیلدادیم:

-‌ بیلیرسن قبیری سؤکوب قیزیل یئرینه سوموک تاپساق نه اولاجاق؟ داناباشلیلار اویغون یئریمیزه آغاج سوخاجاقلار!

بیر ایشلر گؤرمه‌سه‌ ایدیم اوستاد دفتری‌نین روحو بدنیندن چیخاجاق ایدی. بیردن بیر شئی فیکریمه یئتیشدی:

-‌ مشه فیروز! بیزی تلسدیردیگیندن، اونوتدوق قیزیل آختاران دزگاهی ماشیندان گؤتورک. سیز بورادا گؤزله‌یین بیز تئز گئدیب دزگاهی گتیرک!

سونرا مشه فیروزون یانیتینی گؤزله‌مه‌دن اوستاد دفتری‌نین قولوندان یاپیشیب ایمامزادادان ائشیگه چکدیم.

آز سونرا،  سؤنوک ایشیقلارلا ماشینی شهره ساری سوروردوم.





    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 28 دی 1397 | یازار : دوکتور جئری
+0 به‌ین

قیمتلرده می کئفله‌نیب؟!

دوکتور جئری

قلئیچی مورتوض، قیرخ یاشلی سون بئشیک خالاسینی اره وئرمیشدی. گنجلر حیطده یاللی گئدیردیلر. بیز، بیر قیراقدا دایانیب گوندمده اولان  ایقتیصادی دوروما گؤره دارتیشماقدایدیق. اوستاد دفتری دئییردی:

-‌ اؤلکه ایقتیصادیاتیندان باش چیخارتماق اولمور؛ دولار باهالاشدیقدیجا جینسلرین قیمتی ثانیه‌دن ثانیه‌یه آرتیردیردی آنجاق ایندی دولارین اوجوزلاشدیغینا باخمایاراق جینسلرین قیمتی اؤز باهالیغیندا دایانیب؟!

بو قونودا هره اؤز دوشونجه‌سینی ایره‌لی سورمکده ایکن، قلئیچی‌ مورتوضون بؤیوک خالا اری- کئفلی ایسکندر حیط قاپیسیندان ایچری گیردی. دانیشیغین ‌آخیمینی دَییشدیریمک اوچون دئدیم:

- یولداشلار! ایسته‌ییرسیز ایسکندری کئفلندیریب بیرآز اگله‌نک؟

اوستاد دفتری ایله پروفئسور نصرالدین گوله-گوله،" هه..هه"دئینده قلئیچی مورتوض دیللندی:

-‌ یوخ اولماز! دده‌لیگیم شیخ آغا بیزه ایچکینی قاداغان ائدیب، بیلسه پیس اولار.

گولومسه‌یه‌رک دئدیم:

-‌ نیگران اولما...

ایسکندری قارشیلاییب اؤپوش-گؤروشدن سونرا دئدیم:

-‌ یولداشلار! بو قوتلو موناسیبته گؤره، سیزی بیر بارداق شرابا قوناق ائله‌مک ایسته‌ییرم، نه دئییرسیز؟!

هامی باشی ایله "یاخشی" دئینده ایسکندرین دوداغی قاچدی. ایچرییه گئچیب مطبخدن بئش بارداق گیله‌نار شربتی گتیردیم. بارداقلاری چاخناشدیب باشیمیزا چکدیکدن سونرا گؤزلریمیزی کئفلی ایسکندره تیکدیک. ایچکی همن ائتکیسینی گؤستردی. کئفلی ایسکندر دبرجه‌لنه-دبرجه‌لنه گئدیب یاللی باشی وظیفه‌سینی اوزه‌رینه گؤتوره رک عؤمروموزده گؤرمه‌دیگیمیز ادابازلیقلاری ایفا ائتمگه باشلادی. گولونج بیر بیچیمده، مندیلی الینده فیرلاداراق اگیلیب-دوروردو. هردن توخ ووروب یانینداکیلاری یئره سره‌‌له‌ییردی. گولمکدن قارنیمیزین اتلری آغریماقدایدی. بیردن ایسکندر اویناماغین بوشلاییب اورتالیغا گئچه‌رک کئفلی-کئفلی اوخوماغا باشلادی. هامی ماتدیم-ماتدیم یئرینده قورودو. ایسکندر اوخوماغیندا اؤلکه مسئوللاری تنقید آتشینه توتموشدو. من ایندییه‌دک بو  تنقیدلرینی  بی‌بی‌سی رادیوسوندان بئله ائشیتمه‌میشدیم! قلئیچی مورتوضون رنگ-روفو قاچدی. منه قاش-گؤز ائله‌دی، بیر ایشلر گؤروم. تئز ایسکندره یاناشیب قولومو بوینونا سالاراق قولاغینا پیچیلدادیم:

- ایسکندر! ایچدیگین شراب دئییلدی گیله‌نار شربت ایدی!

ایسکندر گؤزلرینی آخدیراق کئفلی-کئفلی فیسیلدادی:

-‌ بونو تئزراق دئییدین، من آرتیق کئفلنمیشم! 



آچار سؤزلر : مسئوللار, ایقتیصاد, کئفلی ایسکندر, قلئیچی مورتوض, باهالیق,

    بؤلوم: حیكایه و گولمه‌جه‌لر
گؤروش‌لر : 0
تاريخ : یکشنبه 23 دی 1397 | یازار : دوکتور جئری
+0 به‌ین

خویلو خانیم مسئول اولوب!

دوکتور جئری

چیغیر-باغیر سسینه کؤچه‌یه تؤکولوشدوک. قلئیچی مورتوض ایله آروادی خویلو خانیم دالاشیردیلار. قلئیچی مورتوض کؤپورموشدو؛ آغیزینا گله‌نی دئیه‌رک خویلو خانیمین اوستونه یومولوردو. زور-گوج ایله قولتوغونا گیریب بیزیم ائوه گتیردیک. قونشولارین بیری دوداقلاری‌نین آراسینا یاریمچیق بیر سیگار قویدو. بیر- ایکی درین سولوق ووردوقدا بیرآز حیرصی سویویان کیمی اولدو.

یوموشاق-یوموشاق سوروشدوم:

-‌ مورتوض آغا  گئنه نه اولوب؟!

سیگارین دومانینی بورنونون دلیکلریندن ائشیگه فیسقیراراق دئدی:

-‌ نه اولاجاق؟!..بیزیم آرواد دا مسئول اولدو!..

شاشیردیم:

-‌ بوکی لاپ یاخشیدیر!.. بوگونلری، بیر حوقوقلا ائوی گئچیندیرمک چتیندیر. ایندی گره‌ک هم کیشی ایشله‌یه، همی آرواد. اولمایا سن آروادین ائشیکده ایشله‌مه‌سینه قارشیسان؟

آجی-آجی گولدو:

-‌ نئچه واختدیر؛ من آخشام آرغین-یورغون ایشدن قاییداندا، آرواد دیبی قاپمیش، دادسیز-دوزسیز شامی قاباغیما قویوب، من دیللنمکدن اؤزو ویر-ویر تؤکه‌رک دئیینیر: "نییه شامیمیز یانیق دادی وئریر؟.. نییه ائویمیز سوپورولمه‌میش قالیب؟ نییه ائوده پالتارلار یویولمور؟ نییه پوللاریمیز فالچی‌نین، دوعایازانین جیبینه گئدیر؟ " . بایاق یوموشاقجاسینا بیله‌سینه دئدیم: "آی خانیم! نییه اؤلکه مسئوللاری کیمی دانیشیرسان؟ سن شامی پیشیریرسن! سن ائوی سورپورملی‌سن! سن پالتارلاری یومالی‌سان! پولو خرجله‌ین سنسن! بو ایشلری باجارمیرسانسا، بیر قوللوقچو توتوم؟ بو سؤزومدن اؤفکه‌نیب قاپ-قاجاغین بیربیرینه چالاراق قیشقیر-باغیر سالدی:‌  دئنن‎‎ْ‏‏ْ‎‏ُ، ایسته‌ییرم ائویمیزی داغیداسان؟ دئنن، ایسته‌ییرم سنین اوستونه گونو گتیرم؟.. دئنن، ایسته‌ییرم...

قلئیچی مورتوض یاواش-یاواش قیزیشیردی. دیواربیر قونشوموزا گؤز ائله‌دیم؛ بیر سیگار یاندیریب دوداقلاری‌‌نین آراسینا قویدو.



آچار سؤزلر : قلئیچی مورتوض, ایقتیصاد, مسئوللار,

    بؤلوم: حیكایه و گولمه‌جه‌لر
یارپاق‌لار: [1] [..] [12] [13] [14] [15] [16] [..] [38]
آرشیو
سون یازی‌لار
یولداش‌لار
سایغاج
ایندی بلاقدا : نفر
بوگونون گؤروشو : نفر
دونه‌نین گؤروشو : نفر
بوتون گؤروش‌لر : نفر
بو آیین گؤروشو : نفر
باخیش‌لار :
یازی‌لار :
یئنیلنمه چاغی :