+0 به‌ین
الویداع تویوق!
كؤورلمیشدیم. درددن آغلایاجاقدیم. سیزیلداماغا باشلادیم:
منیم تویوغوم آغ ایدی بالام
دریسی دولو یاغ ایدی بالام
دونن بو زامان ساغ ایدی بالام
سنی یاناسان تویوق آپاران
اودلاناسان تویوق آپاران
-
هوی دوكتور جئری! ... هوووی دوكتور !....
اؤزمه گلدیم. پروفسور نصرالدین ایدی سسله ین. اؤزومو
ساخلایا بیلمه دیم باشیمی چیگنینه دایایاییب آغلایاراق:
عزیزیم قازان آغلار
قبرینی قازان آغلار
تویوق- خوروز یاسیندا
قابلاما قازان آغلار
پروفسور مندیلینی چیخاردیب گؤزومون یاشینی سیله- سیله
سوروشدو:
-
نولوب دوكتور؟ نییه آغی دئییرسن؟!
سیتقادیم:
-
تو..تو..تویوق!!
بونالدی پروفسور؛ اوموزلاریمدان یاپیشاراق سیلكه له دی.
-
تویوغا نولوب؟
باشیمی آشاغی سالیب اوزونتو ایله ائكله دیم:
-
باشین ساغ اولسون یولداش! اوچدو، اوچدو ، تویوقدا سوفرامیزدان اوچدو .
پروفسور دوشونجه یه دالیب اؤز- اؤزونه میزیلدادی:
-
بیلیردیم ، هر گولمگین سونو آغلاماقدیر!
-
پروفسور، نه گولمگی نه آغلاماغی، سن نه دانیشیرسان؟
پروفسور سرتلندی:
-
قولاق آس گؤر نه دئییرم- دئدی- گئچنلرده جمهور باشقانی نین وئردیگی شام
یئمگینده،ایشلرین نئجه گئتدیگی سوروشولاندا، باخانلار باجاریق سیزلیق لارینی دیش(خارجی)
دوشمنین بوینونا آتماغا باشلامیشلار. بو
آرادا سوفرانین اورتاسینداكی قابلامالاردان گؤلمك سسی ائشیدیلمیش، قابلامالارین
آغزی آچیلدیقدا، پیشمیش تویوقلارین گولمه سی آنلاشیلمیش.بو اولایدان بیر پوللوق
اولان باخانلاردا قارشیلیق اولاراق تویوقلاری یوخا چیخارتمیشلار.
پروفسور نصرالدینین آچیقلاماسینی ائشیدجك اوز- گؤزومو
تورشادیب یاخاسیندان یاپیشاراق قیشقیردیم:
-
پروفسور! من سنین بو ترس دوشونجه لرین اوچون چوخ اوزولدوم، تویوغون یوخا
چیخماسی دوشمن لرین قورغوسودور كسین لیك له. جمهور باشقانی دئمیشلی: دوشمن لر اتم
قونوسوندا باشاری سیزلیغا اوغرایینجا آجیقلارینی باشقا یئرلرده چیخارماق ایسته
ییرلر...
پروفسور حیرسله یاخاسینی الیمدن دارتیب اوزاقلاشماق ایسته
ینده سسیمی باشیما آتیب یئنه اوخوماغا باشلادیم:
بیرده دئمه فیلانی
جوجه كاباب، ات هانی؟
تویوغا بارماق قویوب
استكباری جهانی!
بؤلوم: حیكایه و گولمه‌جه‌لر
+0 به‌ین
بیز هارادان گلمیشیك؟
یازان: دوكتور جئری
ناهار اوستو، بالاجا قیزیم اوخولدان قاییداندا، ائوده قزئتله میلچك اؤلدورمكده ایدیم. او چانتاسینی قولتوغون اوستونه بوراخیب دوس- دوغرو گلیب قارشیمدا دایاناراق:
- بیز هارادان گلمیشیك؟- دئیه سوروشدو.
گولومسه ییب دئدیم:
- ائل بیل چوخ آجیقمیشسان گئت ناهارینی یئ سونرا گل گؤروم نه دئییرسن.
- یوخ، آج دئییلم تئز اول دئ بیز هارادان گلمیشیك؟
- آج دئییلسن سه، ندن سالامینی یئیب سالام وئرمه دین؟
- سالام ، بیز هارادان گلمیشیك؟
گونون، گون اورتاسیندا یامان قیسیقدا قالمیشدیم. ایسته دیم دئییم بیزی حاجی لئی لكلر گتیریبلر، دوشوندوم ییرمی بیرینجی یوز ایلین اوشاقلارینی بو كیمی شئی لرله آلداتماق اولماز ، ایسته دیم دئییم بیلمیرم گؤردوم اوندا هئچ اولمایاجاق .بیردن ایلدیریم كیمی بیر فیكیر بئینیمده شاخدی.دئدیم:
- گؤزل قیزیم! گئت قولچاغینی گتیر بورایا.
- قولچاغی نئیله ییرسن؟ قوناقباجی می اوینایاجاغیق؟
- یوخ اونونلا سنین سورغونو یانیتلاماق ایسته ییرم !
قیزیم جلد گئدیب قولچاغینی گتیردی.اونو آلیب بیرآزجیق اوستو اؤرتولو اینسانین دوغوم اورقانلارینی آچیقلادیقدان سونرا قولچاغین قیچلارینی آراسینی گؤستره رك :
- باخ قیزیم بیز بورادان گلمیشیك!- دئدیم.
قیزیم قولونو بوینوما سالیب اؤزومدن اؤپه رك- ساغ اول آتا- دئییب اوزاقلاشماق ایسته دی. اؤزومو ساخلایانمادیم.
- نییه بو سورغونو سوروشدون؟ اوخولدا اوشاقلار بیر شئی می سؤیله میشدیلر؟!- دئدیم.
قیزیم دوداغینی بوزوب دئدی:
- كیلاسیمیزدا روژین آدلی بیر كورد قیزی وار ؛ او دئییر بیز موغولستاندان گلمیشیك! ...خانیم معلم ده اونون سؤزلرینی دوغرولاییر. ایسته دیم گؤروم دوز دئییرلر یا یوخ!
ائله بیل بیر قازان ایستی سو باشیمدان آشاغی ائندیردیلر. پؤرتولدوم؛ قیزغین- قیزغین:
- حتمن خانیم معلیمیزده كورد دور؟- دئدیم
- یوخ، كورد دئییل ، فارس دیر.
آیاغا قالخاراق قیزیما دئدیم:
- بیز هئچ یئردن گلمه میشیك ائله باشلانیشدان بورادایدیق. سن گئت ناهارینی یئی، ایندی منده اینترنت دن بیزیم اسكی دن بورالی اولدوغوموز حاقدا بیر نئچه مقاله چیخادیب روژین و خانیم معلیمینه گؤسترمك اوچون چاپ ائده جگم...
بیلگی سایاری چالیشدیریب گوجلوكله توسباغاسال اینترنته باغلاندیم. آختاردیغیم قونولاری اینسكلوپدیك سایت؛ ویكی پدییادا تاپینجا اوركدن سئویندیم، آنجاق باشلیقلاری آچیب اوخویونجا یوخاریدا سؤیله دیگیم ایستی قازان سولاری یئنیدن باشیما تؤكولمگه باشلادی. آذربایجان یئر آدلاری نین كؤكنلری تورك دیلیندن باشقا بوتون دیللرین ، اؤزلیكله فارس، كورد، ائرمنی، آسوری، یونانی و ... آچیسیندان آچیقلاناراق اؤزو یوخ آدی وار آریا طایفا- تیریغینا باغلانمیشدی. تاریخدن باش چیخاردان یولداشلاریمین بیرینه تئلفون آچیب اولایی دانیشدیم. یولداشیم بیر آه چكیب دئدی:
- اوزگونلوكله مورگو دؤیدوگوموزدن، آذربایجان تورپاقلاری حقیقی و مجازی اولاراق ایشغال اولونماقدادیر.
- حقیقی و مجازی ایشغال !؟
- هه! قوزئی ده ائرمنی قولدورلاری حقیقی اولاراق آذربایجان تورپاقلارینی سیلاح گوجونه ایشغال ائدیب؛ گونئینده ایسه دونن فارسلار بو گونده كوردلر اینترنتین مجازی آلانیندا كند- شهرلریمیزین آد و تاریخینده آپاردیقلاری اویدورولارلا یوموشاق ایشغال سیاستینی یوروتمكده دیرلر.
- بئله ایسه نه ائیله ملی ییك؟
- همن اوزوموزه بیر چیرپی سرین سو ووروب قوزئی ده سیلاحلا، گونئی ده ایسه قلم ایله ایشغالچیلارین قاباغیندا دایانمالی ییق.اؤزلیكله ویكی پدیا و گوكل مَپ كیمی سایتلارا چوخراق اؤزن گؤسترملی ییك...
- سنجه یارین قیزیمی هانسی یانیتلا اوخولا گؤندریم؟
- دئدیم كی، همن ایشه باشلامالی ییق یوخسا یارین اوشاقلاریمیزی قولچاقلا اوخولاگؤنده ره جه ییك!!
بؤلوم: حیكایه و گولمه‌جه‌لر
+0 به‌ین
اعدام گولمجه لری
یازان: دوكتور جئری
سلام دارآغاجی!
بیرینی آساجاق ایدیلار. دار آغاجینا چاتجاق سسلندی:
- سلام دارآغاجی!
دارآغاجی دوداغینی بوزوب اوزونو تورشاتدیقدان سونرا دیله گلدی:
- جناب بزن كانال یك، من تركی بیلمیری!
چین ایپی!
آسیلاجاق بیریندن ، سون آرزوسونو سوروشدولار؛ دئدی:
- منی چین ایپی ایله آسمایین؟
سوروشان شاشقینلیقلا:
- ندن؟ چین ایپینده بیر ساقینجامی وار؟
- یوو... فقط ائشیتمیشم چین ماللاری كیفیت سیزدیرلر بونا گؤره قورخورام قیرتیلا دوشم قول- قیچیم سینسین.
گؤرونتو
قورشونا دوزوله جك بیر شاعیردن سون آرزوسونو سوروشدولار.
- منی بو آغاجدان آچین او بیری آغاجا باغلایین.
- اولمایا ناغیللارداكی كیمی بو آغاجدان آچیلیب او آغاجا باغلانان سوره ده بیر باغیش بویوروغونون گله جگینه اینانیرسان ؟!
- یوخ ، او آغاجین گؤرونتوسو چوخ گؤزل دیرده اوندان!
جنتین قاپیسی
آسیلمادان اؤنجه بیرینی، قاموگؤزو اؤنونده شاللاق وراجاقمیش لار. حاكیم اعدامی نین شالوارینی آشاغی سیییریب خالقا دئییر:
- هر كیم بیر قامچی بو آللاه سیزین گؤتونه وورسا جنته گئده جك دیر.
بئش- اون نفر گلیب اعدامینی شاللاقلاییر. شاللاق وورانلارین آردی كسیلینجه اعدامی اوزونو جاماعاتا توتاراق دئییر:
- جنته گئدن یوخدورسا قاپینی باغلاییرام !
كات
قورشونا دوزوله جك اویونچو تدیرگین گؤرونوردو. دوستاقچیلاردان بیری اونا یاخینلاشیب قولاغینا پیچیلدادی:
- اؤلومدن قورخاجاقدینسا نییه بورنونو سیاسته سوخوردون؟
اویونچو گؤلومسه دی:
- اؤلومدن قورخمورام، قورخورام "آتش" دئییلن یئرده "كات" دئسینلر!
آزادلیق
پروفسور نصرالدین دن ،" قزئته چی قونشونوزو دوستاقدان بوراخدیلارمی؟" دئیه سوروشدولار.
- هه، دونن قیرخی ایدی!- دئدی.
نیسیه دفتری
مشدلی قصابی اعدام ائده جك ایدیلر. سون آرزوسونو سوروشدولار.(مشدلی قصاب ایله آرتیقراق تانیشماق ایسته ییرسینیزسه "ائششك اتی" آدلی پوستو اوخویون)
دئدی:
- نامازیمی موللا حاق وئرمز اوخوسون.
- نییه به او؟!
- ائوی ییخیلمیش اوچ آیدیر بئش كیلو ات آپاریب هله پولونو وئرمه ییب، ایسته ییرم بئله لیكله حئسابینی پاكلاتمیش اولام!
فیكیرلی كیشی
اعدام ائدیله جك یوخسول بیر كیشی دن سون آزوسونو سوروشدولار.
- منی آیین اون بئشیندن اویانا اعدام ائتسینلر.
- باشا دوشمه دیك آیین اون بئشی نین اوتایی ایله بوتایی نین نه فرقی وار ؟
- باشا دوشمه یه جك نه واركی، ایسته ییرم یارانه م یانماسین!
گولمه لی حؤكم
محكمه ده بیرینه آسیلاجاق حؤكمو وئردیلر. اوجادان گؤلمگه باشلادی. ندنینی سوروشدولار.
- حؤكمه گولورم، آلتدان نفس آلانی اوستدن بوغماق ایسته ییرلر!
ساو
دوستاقچیلار یازارین قولاریندان یاپیشیب آپاریركن :
- هارا گئدیریك؟
- هارا گئتمیریك جهننمه گئدیرسن.
- بئله ایسه، آتا- بابانیزا سؤز- ساوینیز وارسا وئرین آپاریم!
بؤلوم: حیكایه و گولمه‌جه‌لر
+0 به‌ین
ایشكنجه گولمَجه لری
یازان: دوكتور جئری
شاللاق
ایشكنجه چی اوزونو اوچ سانیغا (متهمه) توتوب دئییر:- همشهری، همشهری نین دردینه بو كیمی یئرلرده دَیَر. همشهری چیخدیغیمیز اوچون ایشكنجه آلتینی اؤزنوز سئچه بیلرسینیز!
بیرینجی سانیق:- منی شاللاقلایین همشهری!- دئییر.
ایشكنجه چی شاللاغی گؤیده فیرلادیب بیرینجی نین بئلینه ائندیرینجه گؤیده ایكییه بؤلونور. ایشكنجه چی اونون قولوندان یاپیشیب ایشكنجه اوتاغیندان ایشیگه بوراخاراق:- شاللاغین قیریلدیغینا گؤره بو گون جانین ایشكنجه دن قورتولدو، بو ایشكنجه نین یاسالاریندان دیر- دئییر.
ایكینجی سانیغا گلینجه او دا شاللاغی سئچیر. یئنه شاللاق گؤیده قیریلیر، یئنه سانیق باغیشلانیر. دورومو بئله گؤرن اوچونجو سانیق دئییر:- ایندیكی شاللاقلاریز خاراب دیر آمبیرلا دیرناقلاریمی چكین!
اوتوله مك
ایشكنجه چی باش بارماغی ایله اوتونون ایستیسینی دئنه دیكدن سونرا سانیغا دئییر:- تئز اول كؤینگینی چیخارت...
سانیق گؤلومسه ییر:- كؤینگیمی می اوتوله مك ایسته ییرسن؟!
ایشكنجه چی حیرسلی- حیرسلی:- یوخ! اولوسلار آراسی باغیش اؤرگوتوندن دوستاقخانامیزا گله جكلر. كورگینده كی شاللاق ایزلرینی صافالتماق ایسته ییرم...
سورپریز
آمبیر الینده ایشكنجه چی سانیغا یاخینلاشیب دئییر:- تئز اول جورابلارینی چیخارت.
سانیق:- سن آللاه آیاق ایشكنجه سی یوخ ، منیم قیدیغیم گلیر!- دئییر.
ایشكنجه چی ،"سیرتیلما اولان!" دئیه جورابین بیر تایینی سانیغین آیاغیندان چیخاردیر.
سانیق قهقهه چكه رك دئییر-: سورپریز! دیرناقلاریمی بیر ایل بوندان قاباق چكیب لر!...
ایشكنجه چی ایله دردلشمك!
ایشكنجه چی سانیغی یورمورق تپیكله دیكدن سونرا ایكی سیگار آلیشدیریب دئییر:- اوغلوم نییه منی یوروب اؤزونو اینجیدیرسن اعتراف ائله قوی ایكیمیزینده جانی قورتولوسون.
سانیق سیگاری دریندن سوموروب دئییر:
هله تئزدیر، اعتراف ائله یه جگم!
-: آخی هاچان؟! اعتراف ائله یه جكسن نییه اؤزونو اینجیدیرسن؟!
-: چونكو ایسته ییرم اوشاقلاری نین سوفراسینا آپاردیغین چؤرك حلال اولسون... بیرآز ایشله یه سن!...
گؤز وورماق!
بیرینجی دلیقانلی-: دوستاقخانادان چیخاندان بری گونده نئچه قیزلا تانیش اولورام.
اینكینجی دلیقانلی-: حتمن موباریز اولدوغونو بیلیب سنله دوست اولورلار.
-: یوخ بابا، دوستاقخانادان وئریلن شوك اوزوندن هردن گؤزوم آتیر، قیزلاردا گؤز ووردوغومو سانیرلار!
اعتراف
ایشكنجه چی سانیغین قولونو بوراراق سوره كلی، "اعتراف ائله" دئییردی. سانیق قولونون سینماق اوزره اولدوغو آنلاییب قیشقیریر:- " اعتراف ائله ییرم، اعتراف ائله ییرم ..."
ایشكنجه چی سانیغین قولونو بوراخیب، "هه! بیلیردیم اعتراف ائله یه جگینی.." دئییر. سانیق قولونواووا- اووا میزیلداییر:- " اعتراف ائله ییرم چوخ آجیماسیزسینیز(رحم سیز)...." .
برادر پیشیك
ایشكنجه اوچون قوللانیلان حئیوانلاردان بیری ده پیشیك دیر. بئله كی، پیشیك ایله سانیغی بیر بوشقایا سالیرلار یا پیشیگی سانیغین تومانینا بوراخیرلار! ایشده بیر حیكایه...
ایشكنجه اوتاغی نین پنجره سیندن بیری بویلانیب سوروشور:- برادر مرتضی بوردادیر؟!
گؤیدن آسلانمیش سانیق یانیتلاییر:- یوخ بوردا منله شالواریمداكی برادر پیشیكدن باشقا كیمسه یوخدور!
بؤلوم: حیكایه و گولمه‌جه‌لر
+0 به‌ین
ائششك اتی!
یازان: دوكتورجئری
میللت آغادیر. دؤولت میللتین نؤكری دیر. میللت نؤكرینی اؤلكـﻪنین ایشلرینی گؤرمگه گؤرَولندیریر. دؤولت هردن میللتین نوكری اولدوغونو اونودور اؤزونو آغا سانیر؛آیاغینی میللتین چیگنینه قویوب گؤیه دیرمانیر.
دؤولت ایشینده دیرسه كیمسـﻪنین اونونلا ایشی یوخدور آنجاق اؤلكـﻪنین ایشلرینده بیر آخساقلیق چیخیرسا میللت ایكییه بؤلونور. چوخونلوغو اولوشدوران بیرینجی بؤلوك، دؤزومسوزجـﻪسینه بو نؤكرین قولاغیندان توتوب ائشیگه آتاراق باشقاسینی ایش اوستونه گتیرمك ایستـﻪییر آنجاق آزینلیقدا اولان ایكینجی بؤلوك، قوللارینی چیرمالاییب دؤولتین الیندن یاپیشاراق اونون یاردیمینا قوشور، اونو آیاقدا ساخلاییر. اؤرنگین؛ گئچنلرده اؤلكـﻪده قیرمیزی ات باهالاشیب تاپیلمیردی. بو اوزدن دئیندیگیمیز بیرینجی بؤلوك، یئدیكلری آیدا یوز قرام اتین اوستونده دؤولتی ییخیب جهانی استیكباری سئویندیرمك ایستـﻪییردی آنجاق دویارلی اولان ایكینجی بؤلوك، دؤولت ال- آیاق ائدیب برزیل دن بوفالو اتی وارید ائدینجه بونلار خالق پروتئین سیز قالماسین دئیه ائششك اتلرینی قناره لردن آسلادیلار...
دویارلی یورداشلاریمیزدان بیری محلـﻪنین اتچیسی مشدَلی قصاب دیر. پروفسور نصرالدین، مشدلی قصابین موشتریسی دیر. مشدلی قصاب هرزامان پروفسورا مایا قویوب اتین سوموكسوزوندن، قره سیندن وئرر. پروفسور یاسدا ، تویدا اتدن سؤز دوشنده مشدلی قصابین اتلریندن تعریف ائده رك، "مشدلی قصابین اتی، چؤلمكده قاینایاناده عطیرلی ایگی یئددی قونشونو كارخ ائدیر! دئیَر.
دونن مشدلی قصابین دوكانی نین قاباغیندان گئچنده اتچینی باغلی، قاپیسینا ایسه بیر یازیلی پارچانی آسیلی گؤردوم. قونشو دوكاندان اولانی سوروشدوم. دوكانچی هیریلدایا- هیریلدایا،
-: دؤولت، مشدلینی ات قیتلیغیندا میللته خدمات وئردیگی اوچون زیارته گؤندریب!- دئدی.
بو موشتولوغو پروفسور نصرالدینه وئرمك اوچون هر یئری الك- ولك ائدیب سونوندا اونو میللت باغیندا تاپدیم. نئچه نفری باشینا ییغیب پروفسورلوق كورسوسونه چیخمیشدی. اوخوم داشا دگدی. اولایدان خبری وار ایدی. سؤز آچیلینجا پروفسور اؤزونتو ایله،
-: دوكتور ایندی كیمسه یه اینانماق اولمور، كؤپك اوغلو مشدلی قصاب، اوچ مین تومنلیك ائششك اتینی، سیغیر اتی آدینا اون بئش مین تومنه بیزه سوخوردو!- دئدی.
-: ایندی نئیله ییرسن ات- مَت یئییرسن یا یوخ ؟- دئیه سوروشدوم.
پروفسور نصرالدین ساققالینا تومار وئریب،
-: اتسیز یاشاماق اولماز كی دوكتور! بیر یول موسی ساللاخدان ات آلدیم قارت ایدی پیشمَگه گلمیردی، داها آلمادیم. ایندی بئش- اوچ تانیشلا ییغیشیب آرا-سیرا بیر جاوان ائششك آلیب كسیریك، بایاق دئدیگیم كیمی اتی اوچ مین تومنه دوشور، ایستـﻪسن بیر پایدا سن اول. دوكتور بیلمیرسن كی نه وار، اتی، چؤلمكده قاینایاناده عطیرلی ایگی یئددی قونشونو كارخ ائدیر!- دئدی.
بؤلوم: حیكایه و گولمه‌جه‌لر
+0 به‌ین
یایی ایشچی، قیشی دیلنچی!
یازان: دوكتور جئری
آسلان یورولموشدو. بیر آیدان چوخ ایدی ائو ایله ایش مئیدانی آراسیندا گل - گئت ائتمكده ایدی.قیش ایدی ایش یوخ ایدی؛ اولاندا ایسه قوللو - بیلكلی گنجلری اؤتوروب اونو ایشه آپاران یوخ ایدی. بو گون ده ایش تاپا بیلمه میشدی. الی بوش ائوه قاییدیب آرواد - اوشاغی نین گؤزونه باخماقدان اوتانیردی.دونن گئجه، چومچه نین قازانانین دیبینه دگدیگی سسی ائشیتمیشدی؛ بو گئجه ایسه ائو- اوشاغی نین آش قازانی نین(معده سی نین) هارایینی ائشیده جكدی كسین. اؤزونه گلدی. مئیدان داغیلمیشدی . كور - پئشمان شهره دؤندو.مركزه چاتجاق بیردن قالابالیق بئینینه قیغیلجیم آتدی سانكی. اولماسا دیلنسین! بو دوشونجه دن قیزاریب بوزاردی. اوتانج مونجوقلاری آخیب گؤزلرینی آجیشدیردی. بیر سوره دالغین – دالغین دایاندی سونرا قرارینی وئردی. خالقین قاباغیندا باشی آشاغی اولماق، آرواد - اوشاغین یانیندا اوزو قارا اولماقدان یاخشی دیر، دئدی اؤز- اؤزونه. خیابانین قیراغینداكی قارا آغاجین دیبینه چكدی اؤزونو. بوینو بوكوك دایاندی. ال آچا بیلمیردی. ایندییه دك كیمسه یه ال آچمامیشدی. آداملار گئچیردیلر آنجاق ائله بیل اونو گؤرموردولر. اوزاقدان بیر كیشی گلیردی . اویان بویانا باخیردی ، غریبه كیمی گؤرونوردو. دردیمی بونا آچیم گئچدی اورگیندن آسلانین. كیشی گلیب دوز قاباغیندا دایاندی. سالام وئردی. آسلان سالامینی قایتاردی آنجاق سسی چیخمادی. بوغازی قوروموشدو. كیشی الینی قولتوق جیبینه سوخوب بیر دَمَت پول چیخارتدی؛ هامیسی دا بئش مین لیك ، اون مین لیك .یاریمچیق بیر گولوش یاخیلدی آسلانین دوداغینا. كیشی پوللارین آراسینی آختاردی. سونرا ایسته دیگینی تاپیب آسلانا اوزاداراق :- حاجی باغیشلایین، بو چكی هانسی بانكدان آلاجاغام!- دئیه سوروشدو...
بؤلوم: حیكایه و گولمه‌جه‌لر
+0 به‌ین
اورمو گؤلونون دردیندن اَتلنمك!
دوكتور جئری
بیر- ایكی گون ایدی پروفسور نصرالدین دن ایز- توز یوخ ایدی. 1.خورداد گؤستریسینده، سو ماشینلارینی اورمو گؤلونه آپاراجاغینی سؤیلـﻪمیشدی. اولمایا یئترینجه سو آپاریلدیغیندان، اورمو گؤلونون سویونا غرق اولوب زیغینا باتیب قالمیشدی او، دئدیم اؤز- اؤزومه. سالیغینی توتماق اوچون ائولرینه گئتدیم.قاپینی چالدیم. پروفسور اؤزو قاپینی آچدی. بیلـﻪسینی اؤنجه تانیمادیم دوغروسو. باشی آغا مچیدی نین گونبذیندن یئكه اولموشدو دئسَم یانیلمامیشام! "پروفسور نییه به بئله؟" دئیه سوروشدوم. گؤیرمیش دوداقلاری قاچدی. "اورمو گؤلونون دردیندن اَتلنمیشم"- دئدی. تپـﻪدن دیرناغادك بدنینه ات دؤشـﻪندیگینی آنلادیم. ایچرییه گئچمـﻪمی ایستـﻪدی. "یوخ، دینجلیگیزی پوزماق ایستـﻪمیرم" دئدیم. قاپی آغزینداكی سككیده اَیلشدیك. قونوشدوغوموز سوره ده نئچه سوموسوك پیشیك باشیمیزا ییغیشیب پروفسورون پیشته دئمـﻪلرینه باخمایاراق ماویلداماغا باشلادیلار. اولایلاردان سوروشدوم.سولوغونو دریب دئدی:
- او گون كوچه- پاجادا آرا- سیرا سو ماشینلاری دایانمیشدی. خالق یئنجه خیابانلارا آخیشماغا باشلامیشدی. سو سَپَن ماشینلارین بیرینه یاخینلاشیب سوروجو ایله دانیشماغا باشلادیغیمدا آرخادان بیری، "نه ایستـﻪییرسیز؟" دئیه سسلندی. دؤندوگومده قارا یاخا بیر مامورلا قارشیلاشدیم. یانیندا ایكی الی دگنكلی دایانمیشدی. اودقوندوم. "هئچ، ایستـﻪییردیم سوروجونو ماشینین سویو اورمو گؤلونه بوشالتماق اوچون بلدچیلیك ائلـﻪیم" دئدیم. مامور دوه نالبنده باخان كیمی منه باخیب قیشقراراق، " گؤروكن كنده نه بلدچی. سن ائله بیلیرسن بیز كوروقدا اورمو گؤلونو گؤرموروك؛ بو سولاری آیری ایشه گؤره گتیرمیشیك. تئز جهنم اول گئت بورادان!" دئدی. قانی سویوقلوقلا دئدیم:- "هارا گئدیم، گئدنده، هارای- داد سالیرسیز بئیینلر اؤلكــﻪدن قاچیر..."
دیشی- دیشینی كسن مامور بونو ائشیدجك یانینداكیلارا هیم وئردی. یئرین بوش الی دگنكلیلر دوشدولر جانیما،هایان گلدی وورماغا باشلادیلار. گؤزومو آچدیغیمیدا اؤزومو ائوده یورقان- دوشكده گؤردوم. حیات یولداشیم دؤولت خانیم دگنكلرین آجیسینی آلماق اوچون بدنیمه ات دؤشـﻪمیشدی. تانیشلار ساغ اولسونلار؛ منی او دورومدا گؤرونجه مامورلارین اوستونه یومولاراق منی قاچیردیب ائوه گتیرمگی باشارمیشدیلار. یوخسا بللی دئییلدی ایندی سسیم هانسی داشین آلتیندان گلیردی.
اؤزونتومو بیلدیرمك اوچون یالنیز باشیمی توولاماغا یئتیندیم. پروفسور بیردن گؤزلرینی گؤزلریمه تیكـﻪرك سوروشدو:
- دوغرودان سن اؤزون هارالاردا ایدین؟
- قوناقلیغا گئتمیشدیم!- دئدیم.
- قوناقلیغا؟! آدام بو چكیش- بكیشده هئچ قوناقلیغا گئدرمی؟
- گئتمیردیم؛ زور ایله آپاردیلار!
- هارایا؟!
- آدی یوخ ایداره سینه. آیین 31-ینده آدی یوخ قارداشلار گلیب منی ایكی گونلوك قوناق آپاردیلار. یوخسا ایندی منده سنینكی كیمی اَتلنمیشدیم. پروفسور دوزونو دئ هئچ عؤمرونده بو قدر اتی بیر یئرده گؤرموشدون مو؟ بللی دیر دؤولت خانیم خطیرینی چوخ ایسته ییر!
آیاغا قالخدیق. ایشده آیریلماق سیراسی گلمیشدی. اؤپوشوب گؤروشدوك. بیرآز اوزاقلاشاندان سونرا دؤنوب باخدیم. پروفسور نصرالدین گئتمیشدی آنجاق پیشیكلر هلــﻪده قاپی نین قاباغیندا ماویلداییردیلار...
بؤلوم: حیكایه و گولمه‌جه‌لر
+0 به‌ین
بزیرگان ایله طوطوقوشو
یازان: مولانا دوكتور جئری
بیر گون وار ایدی بیر گون یوخ ایدی. تئهران شهرینده بیر وارلی بزیرگان یاشاییردی. بزیرگانین شیرین دیللی بیر طوطوقوشوسو وار ایدی. طوطوقوشو، اورمونون فارسجا اؤیره دیلمیش تورك اوشاقلاری كیمی فارسجانی لهجه‍‍سیز دانیشاردی. او، آتماجا آتماقلا بازیرگانی گولدورب ائیلندیرردی. قارشیلیغیندا بزیرگان اونا نوغول وئرردی. طوطوقوشو نوغولو هر شئیدن چوخ سئوردی.
گونلرین بیر گونونده، طوطوقوشونو یامان داریخما باسدی. دار قفسدن یورولدوغونو آنلادی. اوچوب گزمك ایستـﻪییردی. بزیرگان گلنده، اورك آرزوسونو دیله گتیردی. بزیرگان، قوش آلدادارجاسینا، "سئوگیلیم، من سنی چوخ ایسته دیگیمدن بو گؤزل قفسه سالمیشام؛ بورادا گوونده سن؛ باییردا قورد- قوش سنی یئیه بیلر!" - دئییب دَن قابیسینی نوغوللا دولدوردو. طوطوقوشو اوممادیغینی ائشیدجك آرخاسینی نوغوللارا چئویریب بیر شئی دئمـﻪدی. بزیرگان، " اولمایا چوخ نوغول یئدیگیندن، شكر دیلینده قونوشدوغوندان قند مرضی توتوب؟ یاخشسی بودور نوغولونو بئش- اون گون كسه م." دئیه دوشوندو.
گونلر گئچدی. طوطوقوشو كوسوب آرتیق دانیشمیردی. بیرگون بزیرگان اونون اورگینی اله گتیرمك اوچون یانینا گلیب دئدی:
- اوزاق بیر یولجولوغا گئده جگم، نه سووقات ایسته ییرسن سؤیله سنه گتیریم؟
طوطوقوشو بیر آز دوشونوب سونرا دانیشما اوروجونو سیندیریب دئدی:
- من سووقات ایسته میرم یالنیزهیندیستاندا منیم قوشداشلاریمی گؤرنده من دیلیمدن اونلارا سؤیلـﻪ،نئجه دؤزورلر من بورادا دار قفسده قالیم اونلار اورادا اؤزگورجه سینه اوچوشسونلار؟
بزیرگان بونو ائشیدینجه اوجادان گولمگه باشلادی. بونا شاشیران طوطوقوشو سوروشدو:
- نییه گولورسن، بیر گولمه لی سؤزمو دئدیم ؟
بزیرگان زورلا گولمـﻪسینی ساخلاییب دئدی:
- آخی رحمتلیگین قوشو، منیم هیندیستاندا نه اؤلوم اؤلوب، چینه گئدیرم بیرآز قیویر- زیویر گتیرم آنجاق عیبی یوخدور اورادا طوطو گؤرسم سؤزلرینی اونلارا چاتدیرارام.
بزیرگان بوخچاسینی باغلاییب قونالغایا یوللاندی. قونالغادا اوچاقچی شاگیردلاری سس سسه وئریب، "تئهران – پئكن فوری، تهئران- پئكن حركت ! " دئیـﻪرك چیغیر- باغیر سالمیشدیلار. بزیرگان پاپاغان ائیرین مشتریسی ایدی. اونون یئری هر زامان اؤن سیرادا، اوچاقچی نین یانیندا ساخلی ایدی. بزیرگان اوتورغوجونا یئرلشینجه اوچاقچی فلاكسیندان اونا بیر چای سوزوب اوچاغی چالیشدیردی....
بزیرگان بیر ایكی گونون ایچینده آلاجاقلارینی آلیب قاییتماق ایسته دی آنجاق بیردن طوطوقوشونا وئردیگی سؤز یادینا دوشدو.گئچن كز ، اویونجاق آلدیغی توكاندا بیر طوطوقوشو گؤردوگونو آنیمسادی. تئز تاكسییا آتلانیب توكانین ایزلیگینی وئردی. اویونجاق ساتان بزیرگانی گؤرجك سئوینیب سینیق- سالخاق فارسجا ایله اونا باش چكمه دیگیندن گیلئیلندی. بزیرگان، اویونجاق بازاری‍نین كاساد اولدوغونو بو اوزدن قبیرداشی ایشینه باخدیغینی سؤیله دی سونرا ایسه طوطوقوشوسونا وئردیگی سؤزدن دانیشدی. توكانچی، بزیرگانی طوطوقوشوسونون یانینا آپاردی. توكانچی نین طوطوسو چینجه قونوشوردو بو اوزدن بزیرگان بیردیلمانج توتاراق قوشونون ساوینی چاتدیردی. چینلی طوطوقوشو اولایی دویونجا دریندن بیر آخ چكیب دئدی:
- بیز طوطوقوشلاری دیلمیزین كؤتگینی یئییریك، بیز گؤزل هیندجه میزی بوراخیب اؤزگه لرین دیلینی یامسیلاماغا باشلامیشیق بواوزدن قفس‍لرین بوجاغی یئریمیز اولوبدور. گئت منیم او قوشداشیما دئ : اؤزگورلوك ایسته ییرسن سه یا اؤز دیلینده دانیش یا دا لال اول !
بزیرگان یوكلرینی چاتیب اؤلكـﻪیه دؤندو.اوچاق تئهران هاواسیندا چاتجاق، بزیرگان خارچیلتی سسیندن یوخودان دیسكیندی. اسنه یه- اسنه یه اوزونو اوچاقچییا توتوب دئدی:
- بلدییه بو هاوا یوللاری نین چالا- چوخورونا هئچ باخمیر خارچیلتی سسی ائشیتدیم سانیرام اوچاغین كؤمكریندن سینمیش اولا.
اوچاقچی گولومسه یرك:
- خارچیلتی،كؤمكلرینكی دئییل اؤرتیجیلریمیزین بئلی نین سینماسی‍نین سسی‍دیر من بو سسلره هر پكئكندن دؤندوگومده آلیشمیشام...- دئدی
بزیرگان الینی دیزینه چالیب بركدن قیققیلدایا- قیققیلدایا :
- بئله ایسه گلن دؤنه یادیما سال چیندن بئل گتیریم یاخشی بازاری اولا بیلر!- دئییب اوچاقچی نین فلاكسیندان اؤزونه بیر چای سوزدو.
بزیرگان گتیردیكلرینی بیره- نئچه بازاردا اریتدیكدن سونرا طوطوقوشونون یانینا گئدیب چینلی طوطوقوشونون سؤزلرینی اونا ایلـَتدی. طوطوقوشو بزیرگانی دینله دیكدن سونرا اؤز- اؤزونه دئدی:
- چینلی طوطوقوشو غریبه قوش‍بئیین بیر قوش ایمیش. فارسی كیتابیندا اوخودوغوم كیمی او گرەك اؤزونو اؤلومه وورماقلا قورتولوش یولونو منه گؤسترردی. هله اوتوروب منه لال اول دئییر. لال اولسون نه كی وارین! ائله یاخشیسی بودور اؤزومو اؤلوم یوخوسونا وورماقلا قفسدن قورتارام..
طوطوقوشو بو دوشونجه ایله شیپ دئیب قفسین تركینه ییخیلدی. بزیرگان قوشون اؤلدوگونو سانیب باش گؤزونه تاپدایاراق اوزون سوره وایسیندی. سونوندا طوطوقوشونو قفسدن چیخاردیب پنجرەدن ائشیگه آتماق ایسته دی آنجاق بیرآز سال-چیخ ائدندن سونرا قراریندان واز گئچدی. بزیرگان طوطوقوشونو، قوش قورودانلار بازارینا گؤتوردو.
بؤلوم: حیكایه و گولمه‌جه‌لر
+0 به‌ین
حاجی لارین یارانه سی كسیله جك
یازان: دوكتور جئری
خیاباندا پروفسور نصرالدینی گؤردوم دئیینه- دئیینه گئدیردی. سسله دیم:
- پروفسور، اوووی... پروفسور!
منی گؤرجك قاشلاری نین دویونو بیر آز آچیلدی. دئدیم:
- اولان دئیینگه توتموسان نه باشینی آشاغی سالیب اویوده- اویوده گئدیردین؟
- اووووه... دوكتور بیگ! نه یاخشی سنی گؤردوم آزقالا دردن پاتلایاجاقدیم.
ساتاشدیم:
- نه دردی؟ گئنه كیمین دردینی سالمیسان قارنینا؟
پروفسور نصرالدین قولومدان یاپیشیب چكدی دیوارین كؤلگه سینه. الی نین دالی ایله آلنینین ترینی سیلیب دئدی:
- ایبیش كیمی میلیون میلیون آلیب ایش بیلمز میللت وكیل لری نین دردینی!
- نئجه مگر؟
- هئچ، اوچ دؤرد آیدیر یارانه لر مسله سینی سالیبلار هَوَنگه، بیلمیرلر كیمه یارانه وئرسینلر كیمینكینی كسسینلر... حاجی علی اصنافی تانییرسان؟
- هه، یاخشی آدامدی، نئجه مگر اولمایا یارانه سینی كسیبلر؟
- یوووو... حاجی علی نین توكانی نین قاباغیندا قنبرآلی آدلی بیر سیگارساتان وار بیزیم قونشودور.دونن گلمیشدی بیزه . دئییردی، پروفسور قوربانیم اولوم بیر ایش گؤر، ائویم ییخیلدی .
دئدیم: زاریما دئ گؤروم نه اولوبدو؟
دئدی: حاجی علی اصنافین پوخونا یاندیم.
دئدیم: نئجه ؟
دئدی: بیلدیگین كیمی من حاجی علی نین توكانی نین قاباغیندا سیگار ساتیرام، سحر چاغی یارانه لر ایداره سی نین ائس ائم ائسی كاریخیب حاجی علی نین عوضینه منیم موبایلیما گلیب.
سونرا چیخاردیب موبایلیندا منه گؤستردی: آغایی قنبرآلی، " تمكُن مالی"- نیز اولدوغو اوچون یارانه نیز كسیله جك ، اعتراضی نیز وارسا یارانه سایتینا موراجیعت ائدین.
دئدیم : قورخما گئدیب سایتدا اعتراض وئره رم .
دئدی: پروفسور، آتان رحمتده ، منده ائله بونا گؤره موزاحیم اولدوم آز قالیر باغیریم چاتلایا....
گوله گوله دئدیم:
- هر ایشده یانلیشلیق اولار یازیق میللت وكیل لری نئیله سینلر؟ ایراندا كیسمه -منیم واریم وار- دئمز، كیمدن سورشسان دئیه جك من دیله نیرم.
پروفسور یئنه قاشلارینی چاتدی.
- ائله منده بونا گؤره دئیرم مجلیسده اوتورانلار هئچ نه دن باش چیخارتمیرلار. آللاه قویسا ایچلرینده نئچه دنه ده دین آدامی وار!
دوغروسو لاپ شاشیردیم.
- پروفسور من لاپ قاتدیم بونلارین بیر بیر ایله نه ایلیشكیسی وار بیلمیرم.
پروفسورون دوداغی قاچدی.
- باخ دؤولت دوشوب اونون بونون دالینا ، یئتنه :- سنین تمكن مالین وار گل بو یارانه آلماقدان واز گئچ– دئییر. حال بوكی ، تمكن مالی اولانلارین آدی اوستونده دیر!
- كیمی دئییرسن ؟ آقازاده لری، رئیس رؤسانی ؟...
- یوخ دئدیگین كیمی اونلار تمكن مالی لری اولدوقلارینی بویونلارینا آلمایاجاقلار، دئدیم كی، آدلاری اوستونده دیر!
- واللاه منیم ده میللت وكیل لری كیمی عاغلیم بیر شئیه چاتمیر، اؤزون دئ.
پروفسور كؤكسونو آریتلاییب شست ایله دئدی:
- حاجی لار
- حاجی لار؟!!...
- هه، حاجی لار. بیلدیگیمیز كیمی، دین و شرعیمیزده تكجه تمكن مالی لری اولانلار آللاهین ائوینه گئده بیلرلر. بو اوزدن اؤلكه ده اولان میلیونلار حاجی نین سورغو- سوال سیز یارانه لری كسیله بیلر. بونا گؤره یاخشی دئییل ائس ائم ائس گؤندرمكله خالقی راحات سیز ائتسینلر.
پروفسور نصرالدینین عاغلینا چپیك چالاراق ائكله دیم:
- دوز دئییرسن پروفسور، ائشیتدیگیمه گؤره ایندی نئچه میلیون تمكن مالی اولان آللاه ائوینه گئتمك اوچون آد یازدیراراق نؤبته ده دیر. اگر بو نؤبته ده كیلرین و قاباقكی حاجی لارین یارانه لرینی كسیب بیزه وئرسه لر بیزده آللاه ائوینه مشرف اولا بیله ریك!
پروفسور باشی ایله اونایلادی. بو قونو اوزه رینده بیرآز دوشوندوكدن سونرا دئدیم:
- پروفسور، بو ایشین آمما بیر بؤیوك عیبی وار.
- نه عیبی؟!
- عیبی بودور كی، فیلیم لرده " حاجی، بیا كه سیدو كشتند" دئینده كیمسه سئیییدین یاردیمینا قوشماییب اؤلوسو یئرده قالاجاق!...
بؤلوم: حیكایه و گولمه‌جه‌لر
+0 به‌ین
فهله گونو احوالاتی
یازان : دوكتور جئری
مایرام!
بیلدیگینیز كیمی، 1.مای دونیالیق فهله گونو، بایرامی دیر. زحمت چكن فهله لر! ساغ، سولا اویماییب باشینیز ایشینیزده اولسا گلن ایلده بوگونه تای، ال- آیاغینیزدان اؤپوب دئیه جه ییك:
مایرامینیز قوتلو اولسون!
فهله نین آلنینین تری
حاق وئرمز بیر حاجی یا دئدیلر:
-دینیمیزده فهله نین آلنینین تری سویومادان حاققینی وئر، دئمه ییب لرمی؟
- نییه دئییب لر!
- اوندایسا، نییه ایشلتدیگین فهله لرین حاققینی وئرمیرسن؟
- فهله لرین آلنینین تری سویوماییب كی! ایشده تر ایچینده ، بازارا چیخاندا تر ایچینده ، ائو-اوشاغی نین یانیندا تر ایچینده، حیط صاحابی نین یانیندا تر ایچینده؛ بو تئزلیكده ده بو ترلر سویومایاجاق من حاققلارینی وئریم!...
فهله گونو چاغیریشی
فهله گونو چاغیریش سیز (شوعارسیز) اولماز . ایشده بو ایلین چاغیریشی :
دونیا فهله لری گرنه شین!
بیلدیریش
فهله گونو موناسیبتینه گؤره ، اون مین دنه فیل نیشان بئل، دؤولتی قیمت له ، ایش آختارانلارین آراسیندا پایلاشاجاق. دوكتورا، فوق لیسانس و لیسانس مدرك لری اولانلارین باشقالارینا اوستونلوگو واردیر. تبریز بلدیه سی
بؤلوم: حیكایه و گولمه‌جه‌لر
+0 به‌ین
اورمو گؤلونون جانی قورتولدو!
دوكتور جئری
مجلسده ، میللت وكیل لری ، اورمو گؤلونون قورماسی نین قارشیسینی آلماق اوچون یوللار آراماقدادیرلار.
بیرینجی میللت وكیلی: منجه ، تانكئرلرله ، آراز چاییندان اورمو گؤلونه سو آپارمالی ییق.
مجلیس باشقانی : اوزگونم قارداش! تانكئرلریمیز گئجه- گوندوز نفت داشیماقدادیرلار بونا گؤره بو ایش اولاسی دئییل، هله اوسته لیك بودجه میزده یوخدور.
ایكینجی میللت وكیلی: تانكئرله آرازدان اورمو گؤلونه سو آپارماق چتیندیرسه، اورمو گؤلونو آرازین یانینا آپاراق .
مجلیس باشقانی شاشقینلیقلا: نئجه؟
ایكینجی میللت وكیلی: اؤنجه اورمو گؤلونو تورپاقلا دولدوراق سونرا گئدیب آراز چایی نین قیراغیندا بیر آیری اورمو گؤلو قازاق، بونونلا تانكئره گره گیمیز اولمایاجاق!
مجلیس باشقانی : قارداش اؤنرینیزه سؤز اولا بیلمز آنجاق اؤلكه نین مركزی بؤلگه لرینده گئدن آوادانلیق ایشلری اوجوندان لودئر- بولدئزئریمیز یوخدور هله اوسته لیك بودجه میزده یوخدور.
اوچونجو میللت وكیلی: دؤولت آذربایجاندا، بودجه و تجهیزات باخیمیندان سیخینتی دا دیرسا اورمو گؤلونون سورونونو، ائكوسیستئمی بیربیرینه وورمادان، خریطه اوزرینده چؤزه بیله ریك!
مجلیس باشقانی ماراقلا: بیر آز آچیقلایا بیلرسینیز؟
اوچونجو میللت وكیلی: بو ایش اوچون جغرافیا قورومو خریطه ده ، اورمو گؤلو ایله لوت كویری آدلارینی تای دئییشیك ائله ملی دیر سونرا خزر دنیزیندن راحاتلیقلا اورمو گؤلونه سو آپارماق اولار.
میللت وكیل لری هامیسی آیاغا قالخیب چپیك چالیرلار، مجلیس باشقانی دا چپیك چالیر سونرا اگیلیب میزین آلتیندان قیرمیزی روبانلی بیر كولونگ چیخاردیب اوچونجو میللت وكیلینه اوزداراق دئییر:
- تئز بیر دربست تاكسی توتوب جومهورباشقانی نین ائوینه گئت؛ اونو خزر دنیزینه گؤتور بیزده دالدان گلیریك! بو پروژه نین كولونگو بوگون وورولمالی دیر!
سون خبر:
بیز ال آیاق ائدیب بو اولایی نئته وئرینجه، جومهورباشقانی كولونگو ووردو! موبارك دیر.
بؤلوم: حیكایه و گولمه‌جه‌لر
+0 به‌ین
مش اسماعیل نئجه پان توركیست اولدو؟
دوكتور جئری
مش اسماعیلی محلله ده هامی تانیر. سحر آلا قارانلیقدان ائودن چیخیب آخشام قاش قارالاندا ائوینه قاییدار. اوزون ایللردیر، اسكیمیش یوك ماشینیلا بیرگه روزگارین ایستی- سویوغونو، چؤل - باییردا چكمكده دیر. ایندی اونو یالنیز تویلاردا توی بیگی ، یاسلاردا ایسه چای-سماور تزگاهی نین دولاندیریجیسی كیمی گؤرمك اولور آنجاق كئچمیشده، یایی بیر نئچه سفر قاپی قونشونو ماشینینا دولدوروب اورمو گؤلونه آپاراردی. اورمو گؤلو مش اسماعیلین هر شئی ایدی. اوزمكدن دویمازدی . یورولاندا ایسه زیغ- چامورا قویلانیب شیرین خاطیره لریندن دانیشیب گولدورردی؛ هردنسه اوخویوب هامینی شنلندیره ردی.
مش اسماعیل بؤیوك-كیچیگین سئویملیسی دیر محلله ده . بونا گؤره اونون توتولما خبری هامینی سارسیتدی. محلله یه ولوله دوشدو. دئییلنلره گؤره، مش اسماعیل پان توركیست لیك اتیهامینا گؤره یاخالانیب آدی یوخ ایداره سینه آپاریلمیشدی. مش اسماعیلی ائشیگه چیخارتماق اوچون آغ ساققاللار سفربر اولدو. اولمایان- قالمایان یئرلره باش وورولدو. بو چابالامالار بیر آی سونرا سونوجلانیب مش اسماعیل یوز الی میلیونلوق وثیقه ایله آزاد اولدو. بیر قوطو شیرینی باغلاییب شامدان سونرا آتاملا گؤروشنه گئتدیك. ماراقدان ایچیم ایچیمی یئییردی. گؤره سن مش اسماعیلی نه اوچون توتموشدولار؟ بیلدیری می داغیدیب ؟ كیتاب- درگی می یاییب ؟ یووو..خ ، مش اسماعیل آدینی زورلا یازیر ! بو اولا بیلمز. كامیونچولوغودا تراختورچولوغونون گونوسودور! اولمایا اورمو گؤلونه گؤره بیر شئی دانیشیبدا الینه ایش وئریب؟ هه! بئله اولمالی دیر. آناسی نین قیرخیندا سؤز اورمو گؤلونون قوروماسیندا دوشنده او ، "اورمو گؤلونون قورماسی آنامین اؤلوموندن منه آغیر گلیر " دئمیشدی. بو فیكرلره مش اسماعیل ائوینه یئتیشدیك. اوتاق قوهوم- قونشو ایله دولو ایدی. ایچری گئچدیكده ، مش اسماعیل آیاغا قالخیب بیزایله اؤپوشوب گؤروشدو. ساتاشاراق:- مش اسماعیل، ماشاآللاه بتر كؤكلمیسشن!- دئدیم.
قیققیلدایا- قیققیلدایا:- "یوخ بابا ، كؤكه لن یئرین آدی زیندان دیر؛ من گئدن یئرده آدام آریقلار، گؤمورسن تومان اگنیمدن دوشور!" دئدی. هامی گولوشدو.
شیرنیلر یئییلدی. چایلار ایچیلدی. قوناقلارین بیری، " مش اسماعیل نئجه اولدو توتولدوز؟" دئینجه مش اسماعیلین آلنی قیریشلاندی. سیگاری نین كؤتویونو كول قابینا باساراق ،"هامینی برق توتاندا بیزیده جین چیراغی توتدو" دئیه سؤزه باشلادی مش اسماعیل: - او گون ناهار چاغی آریغین-یورغون ائوه گلیردیم خیاباندا آغیر تیخاج وار ایدی. ماشینلار یاواش- یاواش گئدیردیلر. قاباغیمداكی پرشیا ماشینی بیردن تورموزا باسینجا دالدان اونا توخوندوم. آشاغی آتلاندیم. ائله بیر شئی اولمامیشدی. پرشیاداكی لاردا ائندیلر. دؤرد گنج اوغلان ایدیلار. ساغ الیمی دوشومه قویوب بیر آز اگیله رك:- باغیشلایین تقصیر منده ایدی، خسارتیز نئچه اولسا حاضیرام وئریم- دئدیم. كئچی ساققاللی پرشیانین سوروجوسو حیرصلی – حیرصلی قیشقیردی:
- ای بر پدرت لعنت افراسیاب!
" ائله بیل ،منی بیر آیریسی ایله یانلیش توتموش " دئدیم اؤز- اؤزومه سونرا:
ببخشید آغا من افراسیاب نیستم ایسمی من مش اسماعیل است.
گئچی ساققال اوغلان سایمازیانا :
- تورو نمی گم جد اعلایتونو می گم – دئدی سونرا دا بیر ایكی دنه كیفیر سؤز افراسیابین بؤیرونه دوگونله دی.
چاش- باش قالمیشدیم. اوغلانین نه دئدیگینی ایچ ائله یه بیلمیردیم. بیرآز دوشوندوم . بیردن هیندی فیلیم لرده كی كیمی قاییتدیم اوتوز- اوتوزبئش ایل قاباغا. شاه زامانی، اورمو رادیوسوندا شاكری آدلی بیریسی هر آخشام شاهنامه نین ناغیللارینی دئیردی. بو ناغیللاری چوخ خوشلادیغیمدان هر گون اونلارا قولاق آساردیم. بیردن سانكی یاتمیش ایدیم ، اویاندیم. بو ناغیللاردا افراسیاب توركلرین شاهی، بؤیوگو ایدی. بونو خاطیرلایینجا قانیم بئنیمه داشلاندی. گؤزلریمی یوموب آغزیمی آچدیم:
- اولان روستمین آغزینی...
اونون آروادینی ...
اونون دده سی نین سومویونو....
سهرابین قانینا ایشیییم، اونون نوشداروسونا سیچیم...
گنجلر یامانلاری ائشیدجك اوستومه یومولدولار.فیرلانان یومورق اولدو آتیلان تپیك. مامورلار اوزومه بیبرلی اسپری فیشقیراندا اؤزومه گلدیم. یولدان گئچنلر، دؤرد فارسین بیر یاشلی توركله ووروشدوغونوگؤرونجه ساواشا قاتیشاراق گنج لری دؤیوب پرشیانی دارما- داغین ائتمیشدیلر. بیزی پولیس ایداره سینه آپاردیلار.گتیرمزلیك دن پولیس ایداره سی نین رئیسی، روستم و گنج لرله همشهری چیخدی! نه باشیزی آغریدیم. پولیس ایداره سینده حلل اولا بیلن پرونده نی، "بو موضویا یئتیشمك بیزیم صلاحیبتیمیزده دئییل" دئیه آدی یوخ ایداره سینه گؤندردیلر....
مش اسماعیل یئنه سیگار آلیشدیردی. قوناقلارین بیری دؤزمه ییب، " اورادا نه اولدو؟" دئیه سوروشدو. مش اسماعیل توستونو بورنون دلیكلریندن ائیشیگه بورولایاراق سؤزونون آردینی توتدو:
- هئچ اورادا پوخو قویدوق سبده. مملكتده، توركلرله فارسلارین آراسینی وورماق ، ایغتیشاش سالماق گوناهینی، بیلدیگیز كیمی بوینوما قویدولار، خولاصه پان توركیست دئییلن شئیین كوت - شالوارینی اگنیمه بیچدیلر. یولداشلار ساغ اولسونلار اونلارین كؤمگی ایله ضامینه بوراخیلدیم. پرونده نی دادیگاها گؤنده ره جكلر. گؤره ك دادیگاه نه حوكم وئریر. هله هله گؤزله ملی ییك...
واخت گئچمیشدی. قوناقلار آیاغا قالخیب دیل-آغیز ائده رك مش اسماعیل لا ساغ اوللاشدیلار. هامیدان سونرا من چیخدیم . قاپی آغزیندا مش اسماعیل دان سوروشدوم:
- مش اسماعیل بو آرادا گوناهلی كیمدیر؛ نییه باشیمیزا بو اویونلار گلیر؟
مش اسماعیل الینی چیگنیمه قویوب گولومسه یرك دئدی:
- گوناهلارین هامیسی سازمانی میللین بوینونا دیر! چومچه قازانا دگنده بو كؤپك اوغلولار تئز بیر قطعنامه چیخاردیرلار آنجاق نئچه مین ایللیك ایران - توران ساواشینا بیرجه دنه بئله اولسون قطعنامه صادیر ائله مه ییب لر هم بیزیم جانیمیز قورتولسون هم بو فارسلارین!
1391/1/14
بؤلوم: حیكایه و گولمه‌جه‌لر
+0 به‌ین
دؤولتی پورتاغال!
اوشاقلاری نین هئچ یامان اؤیرنمه سینی ایسته مه ین بیر آنا، اوغلونو بازارا گؤندرمیش. بو سیرادا، بلدیه مامورلاری ایله ال آراباسی اوستونده آیین- اویون ساتانلارین آراسیندا توققوشما چیخیب رنگلی- رنگلی یامانلار آلیش وئریش اولموش.اوغول ائوه دؤنونجه آناسیندان سوروشموش:
- آنا ...یك نه دئمك دیر؟
آناسی :- پورتاغال اوغلوم پورتاغال ! - دئمیش.
بایرام اولموش.قوناقلارین باشی آچیلمیش. آنا اوغلونا :- اوغلوم دور قوناقلاریمیزا میوه توت – دئمیش. اوغلان ، میوه قابینی قوناقلارین قاباغیندا توتاراق:
- دؤولتی ...یك لردن یئین ، همی شیرین همی سولودورلار!
اخلاقی سونوج: بو ایل "دؤولت قیمت لره نظارت ائده جك" وعده سیله میللته یاخشی پورتاغال ووردو!
شور گؤز قوناق!
بایرام قوناغی گئدندن سونرا، آرواد حیرصله اریندن سوروشموش:
- بو گلن كیم ایدی؟ آز قالیردی گؤزلری ایله آنامی یئسین؟
كیشی گولومسه یرك:
- عتیقه چی دوستوم ایدی!- دئمیش
قیمت لره نظارت
بایرام قوناغی پوسته لره ال اوزادینجا، ائو یییه سی:
- پوسته اوتوز مین اولدو، آللاه دؤولتدن راضی اولسون نظارتی اولماسایدی قیرخ مینه ده آلا بیلمزدیم- دئمیش.
قوناق پوسته لردن بیر سیخیم گؤتوره رك اونایلامیش:
- هه ! آللاه دؤولتدن راضی اولسون ، اون مین وئردیم تاكسی منه بورایا گتیردی. نظارتی اولماسایدی اون بئش مینه ده گله بیلمزدیم.
امكلی وئرن بایراملیغین صیفرلرینی سایمازلار!
7 یاشلی نوه ، بایراملیق آلاركن بیر پولا بیر77 یاشلی بؤیوك باباسینا باخیب دئمیش:
- بؤیوك بابا ، ائله بیل تورم دن خبریز یوخدور!
بؤیوك بابا نوه سی نین باشینی تومارلایاراق :
- اوغلوم، منیم خبریم وار ائله بیل دؤولتین خبری یوخدور!
ایبیشین بایرام گؤروشو
میللت وكیلی ایبیش بایرام گؤروشو اوچون داناباش كندینه گئدیب گئجه نی یولداشی قیبیش گیلده قالمالی اولور. گئجه یاریسی توالئته گئدملی اولان ایبیش، قاپی آغزینداكی كؤپكی گؤرونجه اوتاغا دؤنوب گولو تورپاغی ایله چیخارداراق گولدانین تركینه سیچیر .
اون بئش گون سونرا ایبیش تهراندان قیبیشا تئلفون آچاراق حالینی سورشماق ایسته ییر. قیبیش حیرصلی-حیرصلی :
- كئف احوالی بوراخ، دئ گؤروم هارا سیچمیسان،سن گئدندن، گونده ائوین بوتون اثاثلارینی ایئشیگه تؤكوب یویوب آرتیلاییریق گئنه پوخون ایگی كسیلمیر!
یئنی مودئل ار
ایبیشین باجیسی، هر ایل باشی ائوی نین بوتون اثاثلارینی دگیشدیریب یئنی موداسینی آلاردی. بایرامدان بایراما باجی گؤروشونه گئدن ایبیش بو كره یانیلیب قونشونون زنگینی باسیر. قاپی آچیلیب كوركن لری نین یئرینه غریبه بیر كیشی ائشیگه چیخیر. ایبیش بارماغینی دیشله یرك دئییر:
- آمان آللاهیم ، باجیم بو ایل ارینی ده دگیشیب!
بایرام قوناقلاری
اوشاق بایرام قوناغیندان سوروشور:
- باغیشلایین سیز هاچان گئده جك سیز؟
- نئجه مگر؟!
- هئچ، آنام دئییر قوناق گئدندن سونرا شامیمیزی یئیه جه ییك .
بؤلوم: حیكایه و گولمه‌جه‌لر
+0 به‌ین
آدم- ین گونده لیكلری
یازان : مارك تواین
كؤچورن : دوكتور جئری
بیرینجی بؤلوم
اویاندیغیمدا یالقیز دئییلدیم آرتیق. اوزون ساچلی بیر یاراتیق تاپیلمیشدی یانیمدا.
سود گونو
او درین یوخویا دالدیغیم سیرادا باشیما بیر اویونلار گلمیش اولمالی. كؤكسومون سول یانینداكی یارا ایزیندن آنلاییرام بونو. آغری – ماغری یوخدور آنجاق یئنی یاراتیغین داها ایلك اورتایا چیخیشییلا بئله بیر یارا ایزی بوراخماسی، موتلو اولایلاری گؤزله مه جگیمی گؤستریر.
دوز گونو
.............
آردیندا اوخویون
بؤلوم: حیكایه و گولمه‌جه‌لر
+0 به‌ین
نه پیس نه یاخشی!
دوكتور جئری
كوچه ده گئدیردیم بیری آرخادان سسله دی.
- دوكتور.. دوكتور!
دؤنونجه، اسكی قونشوموز پروفسور نصرالدینی گؤردوم. " آللاه ائله سین سحرین بو واختیندا بورج-مورج ایسته مه سین " – گئچدی اورگیمدن،
- اوووه .. خوش گؤردوك نصرالدین بیگ! هارالاردان بئله؟- دئدیم.
- واللاه دوزونو ایسته سن بیرینی آختاریدیم بیرآز دردله شم سنی گؤردوم- دئدی.
بیر قهوه خانایا گئچیب اَیلشدیك. پروفسور گؤزونو قاباغینداكی چایا زیلله یرك سؤزه باشلادی:
- گئچنلرده یاز گلیر دئیه ائوین بوتون اسكیمیش اثاثلارینی ائشیگه تؤكوب تزه سینی آلدیم
دئدیم : نه یاخشی!
دئدی: یاخشی دا دئمك اولماز، چونكو آتامی دا قوجالار ائوینه گؤندریم.
دئدیم : نه پیس!
دئدی: پیس ده اولسا عوضینده تزه بیر آرواد آلدیم!
دئدیم: نه یاخشی!
دئدی: یاخشی ایدی آمما ننه سینی ده اؤزو ایله بیرگه ائویمه گتیردی.
دئدیم : نه پیس!
دئدی: پیس ده دئییلدی چونكو آیدا رحمتلیك اری نین بیر میلیون تومن حوقوقونو آلیردی.
دئدیم : نه یاخشی!
دئدی: یاخشیلیغی باشینا دگسین! قیتمیرین بیری ایدی قیران خرجله میردی!
دئدیم : نه پیس!
دئدی: پیس ده اولسا گئدیب آتامی قوجالار ائویندن چیخاردیب اونونلا ائولندی.
دئدیم : نه یاخشی!
دئدی : یاخشی اولدو آمما، ***الاماغا ائو تاپمایینجا گلیب منیم ائویمه یئرلشدیلر.
دئدیم : نه پیس!
دئدی: پیس اولسادا یئنه آتاملا بیرلیكده اولدوق.
دئدیم : نه یاخشی !
دئدی: یاخشی دا اولمادی ؛ آتاملا آروادیم یولا گئتمه ییب گونده داوا – دالاش ائدیردیلر. آروادیم دا آتامین اوزوندن كبینینی ایجرایا قویوب حیطیمی الیمدن چیخارداراق بیزی ائشیگه اؤتوردو.
دئدیم : نه پیس!
دئدی: پیس اولسادا ، آللاه عوضینده سن كیمی یاخشی دوستلاری مندن اسیرگه مه ییب .
دئدیم : نه یاخشی!
دئدی: البتته یاخشی دیر دوكتور! ایجازه وئرسز ائو ***ایه ائده نه دك آتام، آتامین آروادی و من بیر نئچه گون سیزه قوناق اولاق !
ایسته دیم دئیم،" نه پیس!" دیلیم دیشیمه دولاشیب قند بوغازیما آتلاندی...
بؤلوم: حیكایه و گولمه‌جه‌لر